ރާއްޖޭގެ 67 ރަށެއްގައި ކުޑަކުދިންގެ ޕާކް ތަރައްްީކުރުމަށް ބޭނުންވާ ސާމާނު ހޯދުމަށް ކުންފުންޏަކާ ހަވާލުކޮށްފިއެވެ.
މި މަސައްކަތް ހަވާލުކޮށްފައިވަނީ ބްރިލިއަންޓް ކޮމްޕެނީ ޕްރައިވެޓް ލިމިޓޭޑާއެވެ. އެ ކުންފުންނާއި މި މަސައްކަތް ހަވާލުކޮށްފައިވަނީ 7.9 މިލިއަން ރުފިޔާއަށެވެ. މިއީ އިންޑިއާ ސަރުކާރުގެ މާލީ އެހީތެރިކަމާއެކު ކުރއިަށް ގެންދިއުމަށް ހަމަޖެހިފައިވާ މަޝްރޫޢުތަކެކެވެ. ޕާކްތައް ތަރައްޤީކުރުމަށް ބޭނުންވާ ސާމާނު ސަޕްލައިކުރުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ޔޫތް، ސްޕޯޓް އެންޑް ކޮމިއުނިޓީ އެމްޕަވާމަންޓް އަޙްމަދު މަޙްލޫފެވެ.
މި އެއްބަސްވުމުގެ ދަށުން 67 ރަށެއްގައި ކުޑަކުދިންގެ ޕާކް ތަރައްޤީކުރުމަށް ބޭނުންވާ ޕާކްސެޓް ރާއްޖެ ގެނެސް މިނިސްޓްރީން އަންގާތަނަކަށް ޑެލިވަރކޮށްދޭން ޖެހޭނެއެވެ. މި އެއްބަސްވުމުގެ ދަށުން މި ތަކެތި 35 ދުވަހުގެ ތެރޭގައި ސަޕްލައިކޮށްދޭން ޖެހެއެވެ.
ރާއްޖޭގެ 67 ރަށެއްގައި ކުޑަކުދިންގެ ޕާކް ތަރައްޤީކުރުމަށް ބޭނުންވާ ސާމާނު ގެނައުމަށް ކުންފުންޏަކާ ހަވާލުކޮށްފައިވާއިރު، މިއަހަރުގެ ޖޫންމަހުގެ 9 ވަނަ ދުވަހުވެސް ވަނީ 15 ރަށެއްގެ ކުޑަކުދިންގެ ޕާކު ހެދުމަށް ބޭނުންވާ ސާމާނު ރާއްޖެ ގެނެސްފައެވެ.
މުޖުތަމަޢު ބާރުވެރިކުރުމަށް މިނިސްޓްރީން ކުރަމުންދާ މަސައްކަތުގެ ތެރެއިން ޖުމްލަ 50 ރަށެއްގައި ކުޑަކުދިންގެ ޕާކް ޤާއިމްކުރުމުގެ މަސައްކަތް މިހާރުވެސް ދަނީ ކުރަމުންނެވެ. އެގޮތުން ބައެއް ރަށްރަށުގައި ޕާކް ގާއިމްކުރުމަށް ބޭނުންވާ ސާމާނު މާލެއަށް ގެނެސްފައިވާއިރު މިނިސްޓްރީން އަންނަނީ މިހާރު އެސާމާނުތައް ރަށްރަށުގެ ކައުންސިލްތަކަށް ދޫކުރަމުންނެވެ. މިހާތަނަށް ވަނީ 15 ރަށަކަށް ޕާކް ސެޓް ދޫކޮށްފައެވެ.