އިލެކްޝަންސް ކޮމިޝަންގެ ނާއިބު ރައީސް އަޙްމަދު އަކްރަމް މަޤާމުން ވަކިކުރުމަށް ނިންމެވީ ސުލޫކީ މައްސަލައެއްގައިކަމަށް މިނިވަން މުއައްސަސާތަކުގެ ކޮމިޓީގެ މުގައްރިރު ރޮޒައިނާ އާދަމް ވިދާޅުވެއްޖެއެވެ.
އިލެކްޝަންސް ކޮމިޝަންގެ މެންބަރުކަމުން އަކްރަމް އިސްތިއުފާދެއްވާފައިވަނީ މިމަހުގެ 19ވަނަ ދުވަހުއެވެ. އޭނާ މަޤާމުން އިސްތިއުފާދެއްވާފައިވަނީ އޭނާގެ މައްޗަށް ތުހުމަތުކޮށް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީއަށް ހުށަހެޅިފައިވާ މައްސަލައަކާ ގުޅިގެން އެކޮމެޓީން އޭނާ މަޤާމުން ވަކިކުރުމަށް ފެންނަކަމަށް ނިންމާފައިވާކަމުގެ މައުލޫމާތު ލިބިވަޑައިގެންފައިވާތީކަމަށް އަކްރަމް ވިދާޅުވެފައިވެއެވެ.
އަކްރަމްގެ މައްޗަށް ތުހުމަތުކުރެވެނީ ޖިންސީ ފުރައްސާރަ ކުރުމުގެ މައްސަލައެއްކަމަށް އަޑު ފެތުރިފައިވަނިކޮށް، މިނިވަން މުއައްސަސާތަކުގެ ކޮމިޓީގެ މުގައްރިރު ރޮޒައިނާ އާދަމް ވިދާޅުވީ، އީސީގެ މެންބަރުކަމުން އަކްރަމް ވަކިކުރުމަށް އެކޮމިޓިން ނިންމެވީ އޭނާގެ ސްލޫކީ މައްސަލައެއްގައިކަމަށާއި، މުވައްޒަފުންނާ ވާހަކަ ދެއްކުމުގައި ކޮމިޝަންގެ މެންބަރެއްގެ ހިފަހައްޓާންޖެހޭ އަޚްލާގީ މިންގަނޑު ހިފަހައްޓާފައި ނުވާކަމަށް ކޮމިޓީގެ މެންބަރުންނަށް ޤަބޫލުކުރެވިގެންކެމަަށެވެ.
އިލެކްޝަންސް ކޮމިޝަންގެ މެންބަރުކަމުން އިސްތިުފާ ދެއްވާ އަކްރަމް ނެރެފައިވާ ބަޔާނުގައި ވަނީ ރައްޔިތުންގެ މަޖިލީހުގެ މިނިވަން މުޢައްސަސާތަކާ ބެހޭ ކޮމިޓީގެ އިތުބާރުނެތި މިނިވަން މުޢައްސަސާއެއްގެ މެންބަރުކަމުގައި ދެމިހުރުމަކީ އެންމެ ރަނގަޅު ގޮތްކަމުގައި ދެކެވަޑައިނުގަންނަވާކަމަށެވެ.
ނަމަވެސް އޭނާގެ މައްޗަށް ތުހުމަތުކޮށް ރައްޔިތުންގެ މަޖިލީހުގެ މިނިވަން މުޢައްސަސާތަކާ ބެހޭ ކޮމެޓީއަށް ހުށަހަޅާފައިވާ މައްސަލައަކީ ވަކި ބަޔެއްގެ ރޭވުމެއްގެ ތެރެއިން ކަނޑައެޅިގެން ޙަޤީޤަތާ ޚިލާފު ވާހަކަތަކެއްގެ މައްޗަށް ބިނާކޮށް ހުށަހަޅާފައިވާ މައްސަލައެއްކަމަށާއި، އެމައްސަލާގައި ތުހުމަތުކޮށްފައިވާ އެއްވެސްކަމެއް އޭނާގެ ފަރާތުން ހިނގާފައިނުވާކަމުގެ ފުރިހަމަ ޔަޤީންކަން ދެއްވާކަމަށްވެސް އަކްރަމްގެ ބަޔާނުގައިވެއެވެ. އަދި އެކަން ހިނގާ ދިޔަ ގޮތުގެ ތަފްޞީލް މަޢުލޫމާތު ރައްޔިތުންގެ މަޖިލީހުގެ މިނިވަން މުޢައްސަސާތަކާ ބެހޭ ކޮމެޓީއާ ހިއްސާކޮށްފައިވާނެ ކަމަށްވެސް އަކްރަމް ވިދާޅުވެފައިވެއެވެ.