އަތޮޅުތަކުގައި މަސައްކަތްކުރާ ފުލުހުންނަށް، އިންޓަޕޯލްގެ ޑޭޓާތަކަށް އެކްސެސްދޭނަން : ސީޕީ ޙަމީދު
އަތޮޅުތަކުގައި މަސައްކަތްކުރާ ފުލުހުންނަށް، އިންޓަޕޯލްގެ ޑޭޓާތަކަށް އެކްސެސްވެވޭނެ އިންތިޒާމް ހަމަޖައްސާނެ ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ފާއިތުވި ދެއަހަރު ދުވަހުގެ ތެރޭގައި ފުލުހުން ހޯދާފައިވާ ކުރިއެރުންތަކާއި ކުރިއަށް ރޭވިފައިވާ ކަންކަމާއި ގުޅޭގޮތުން ޕީއެސްއެމް ނިއުސްއާއި ވާހަކަ ދައްކަވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ، ބައިނަލްއަޤްވާމީ ފުލުހުންގެ އިދާރާ އިންޓަޕޯލްގެ އެކި ވަސީލަތްތަކަށް ވަދެވޭނެ އިންތިޒާމް ފުލުހުންގެ މުއައްސަސާގައި ފާއިތުވި ދޮޅު އަހަރެއްހާ ދުވަހުގެ ތެރޭގައި ހަދާފައިވާކަމަށެވެ. އިންޓަޕޯލަށް އެކްސެސް މިހާރު އޮންނަނީ ފުލުހުންގެ ތެރޭގައި އޮންނަ ވަކި ޚާއްޞަ ޑިޕާޓްމަންޓަކަށް ކަމަށާއި، ނަމަވެސް އިންޓަޕޯލަށް އެކްސެސްވެ އޭގެ މަޢުލޫމާތުތަކާއި ވަސީލަތްތައް ހޯދޭނެ އިންތިޒާމް ފުލުހުންގެ އެކި އޮޕަރޭޝަންތައް ހިންގާ ޑިޕާޓްމަންޓްތަކަށް ދިނުމުގެ ވިސްނުން ގެންގުޅުއްވާކަމަށްވެސް ސީޕީ ވިދާޅުވިއެެވެ. އެގޮތުން މާލޭގެ އިތުރުން އަތޮޅުތެރޭގެ ރަށްތަކުގައި ޤާއިމްކުރެވިފައިވާ 85 ޕޮލިސް ސްޓޭޝަނުގައި މަސައްކަތްކުރާ ފުލުހުންނަށް އިންޓަރޕޯލަށް އެކްސެސްވެވޭނެ ގޮތް އަންނަ އަހަރު ފަހިކޮށްދެއްވާނެކަމަށެވެ.
"ކުރިން އިންޓަރޕޯލަށް ޚާއްޞަ ކުޑަކުޑަ އޮފީހެއް ހަދާފަ ހުންނާނެ އިންޓަޕޯލްގެ ކަންކަމަށް ސަމާލުވެ އެމަސައްކަތްކުރަން. ނަމަވެސް ތަހުގީގީ ނުވަތަ އޮޕަރޭޝަނަލް ލެވެލްގައި މަސައްކަތްކުރާ ފުލުހުންގެ އިތުރުން އަތޮޅުތެރޭގަ ޤާއިމްކޮށްފައިވާ 85 ޕޮލިސް ސްޓޭޝަނަށް އިންޓަރޕޯލް ސިސްޓަމަށް އެކްސެސް ދޭނަން ތަފާތު ޑޭޓާބޭސްތަކަށް. އިންޓަރނޭޝަނަލް ކުށްކުރާ ފަރާތްތައް އެއީ ކުޑަކުދިންނާބެހޭ ފަރާތްތަކުންވެސް، ޓެރަރިސްޓުންކަމަށްވިޔަސް، އޯގަނައިޒްޑް ކްރައިމްތައްވިޔަސް މިހުރިހާ ފަރާތްތަކަށް މަޢުލޫމާތު އަތޮޅުތަކުގެ ރަށްތަކުގެ ޕޮލިސް ސްޓޭޝަންތަކުގެ ފުލުހުންނަށްވެސް ބަލައިލެވޭނެ."ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވިއެވެ.
ކޮމިޝަނަރ އޮފް ޕޮލިސް ވިދާޅުވީ ރަށްރަށުގައި ގެސްޓް ހައުސް ވިޔަފާރިއާއި، އެނޫން ގޮތްގޮތުންވެސް ބޭރު މީހުން އައިސް ހަރަކާތްތެރިވާއިރު، ބައިނަލްއަޤްވާމީ ކުށްކުރާ ފަރާތްތަކާމެދު ސަމާލުވުމަކީ މިވަގުތު ވަރަށް މުހިންމު ކަމަކަށް ވާނެކަމަށެވެ.
އިންޓަޕޯލުން ކުރާ މަސައްކަތުގެ ތެރޭގައި، ދުނިޔޭގެ އެކި ކަންކޮޅުތަކުން ފިލައިގެންދާ މީހުން ހޯދުމުގައި އެހީތެރިވުން ހިމެނެއެވެ. ބައިނަލްއަޤްވާމީ ފުލުހުންގެ އިދާރާ ނުވަތަ އިންޓަޕޯލްގެ ދައުރަކީ، ބޯޑަރ ހުރަސްކޮށް ހިނގާ ކުށްތައް ހައްލުކުރުމުގައި އެކި ގައުމުތަކުގެ ފުލުހުންނަށް އެހީތެރިކަން ފޯރުކޮށްދިނުމެވެ. އިންޓަޕޯލްގެ ކޮންމެ މެންބަރު ގައުމެއްގައި، ނެޝަނަލް ސެންޓްރަލް ބިއުރޯ (އެންސީބީ) ގެ ނަމުގައި އިންޓަޕޯލްގެ އޮފީހެއް ހުންނަ އިރު، މި އޮފީހުގެ ބޭނުނަކީ އެއް މެންބަރު ގައުމާއި އަނެއް މެންބަރު ގައުމުގެ ފުލުހުން ގުޅުވައިދިނުމެވެ. އަދި މިއީ އިންޓަޕޯލުން ކުރާ މައިގަނޑު ތިން މަސައްކަތުގެ ތެރެއިން އެއް މަސައްކަތެވެ. މި މަސައްކަތް ކުރަނީ މެންބަރު ގައުމުތަކުގެ އެންސީބީއާއި ގުޅިގެނެ އެ ގައުމުގެ ފުލުހުންގެ އެހީތެރިކަމާއެކުގައެވެ.
ފާއިތުވި ދެ އަހަރު ދުވަހުގެ ތެރޭގައި ފުލުހުންގެ މުއައްސަސާއިން ހޯދާފައިވާ ކުރިއެރުންތަކާއި ކާމިޔާބީތައް އަދި ކުރިއަށް ރޭވިފައވާ ކަންކަމާއި ގުޅޭގޮތުން ކޮމިޝަނަރ އޮފް ޕޮލިސް ދެއްވާފައިވާ އިންޓަރވިއު މިއަދު ހަވީރު 16:30 ގައި ޕީއެސްއެމް ނިއުސްއިން ދައްކާނެއެވެ.