ރާއްޖޭގެ 67 ރަށުގައި ކުޑަކުދިންގެ ޕާކު ހެދުމަށް ބޭނުންވާ ސާމާނު އިންޑިއާ ސަރުކާރުން ދިވެހިރާއްޖެއަށް ހަދިޔާކޮށްފިއެވެ. މިތަކެތި ރަމްޒީގޮތުން ދިވެހި ސަރުކާރާއި ހަވާލު ކުރުމަށް ޚާއްސަ ރަސްމިއްޔާތެއްވަނީ ބާއްވާފައެވެ.
ކުޑަކުދިންގެ ޕާކު ހެދުމަށް ބޭނުންވާ ސާމާނު ހަދިޔާކުރުމަށް ބޭއްވި ރަސްމިއްޔާތުގައި އިންޑިއާގެ ފޮރިން ސެކްރެޓަރީ ހަރްޝް ވަރްދަން ޝްރިންގްލާއާއި، ރާއްޖޭގެ ފޮރިން މިނިސްޓަރ ޢަބްދުﷲ ޝާހިދުއާއި، މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓް އަޙުމަދު މަޙުލޫފު ބައިވެރިވެ ވަޑައިގެންނެވިއެވެ.
ޕާކު ހެދުމަށް ބޭނުންވާ ސާމާނާއި ހަވާލުވެ ވަޑައިގަތުމަށްފަހު ވާހަކަފުޅު ދައްކަވަމުން މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓް އަޙްމަދު މަޙުލޫފު ވިދާޅުވީ، އެކި މަސައްކަތްތަކުގައި ރަށްތަކަށް ކުރި ދަތުރުތަކުގައި، ރަށްރަށުގައި ރައްޔިތުން ހިތްހަމަޖައްސާލަން އެއްވެ އުޅެވޭނެ ތަންތަން ނެތްކަން ފާހަގަކުރެވުނުކަމަށެވެ.
ކުޑަކުދިންގެ ޕާކުފަދަ ތަންތަނަކީ އާއިލާތައް އެކުގައި، ކުޑަކުދިން ގޮވައިގެން ވަގުތު ހޭދަކޮށްލުމަށް، މުހިންމު ތަންތަންކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވި މި ހަވާލުކުރި ތަކެތި ރަށްރަށުގައި އިންސްޓޯލް ކުރުމުގެ މަސައްކަތް ވަރަށް އަވަހަށް ފަށާނެކަމަށެވެ. މިއީ ކުޑަ މަޝްރޫޢުއެއްކަމަށް ހީވިނަމަވެސް މުހިންމު މަސައްކަތެއްކަމަށާއި، ރައީސް ޞާލިޙުގެ ސަރުކާރުގައި ހުރިހާ ރަށެއްގައި ކުޑަކުދިންގެ ޕާކު ހަދާނެކަމަށް މިނިސްޓަރ ވިދާޅުވިއެވެ.
"މާލެއަށްވެސް އަދި ރަށްރަށުގައިވެސް މިފަދަ އިޖްތިމާއީ ކަންކަމަށް ހަމަހަމަ ފުރުޞަތު ލިބެންޖެހޭ. ޕާކު ހެދުމަށް ގެންދިޔަ ފުރަތަމަ ބުރުގައި 37 ރަށުގައި ޕާކު ހެދިން. މިހާރު މި ހަދަނީ 67 ޕާކު. މިއާއިއެކު 104 ރަށުގައި ޕާކު ހެދޭނެ." މިނިސްޓަރ މަޙުލޫފު ވިދާޅުވިއެވެ.
ޕާކު ހެދުމުގެ މަޝްރޫޢުއަކީ އިންޑިއާގެ 13 މިލިއަން ޑޮލަރުގެ އެހީގެ ދަށުން ރާއްޖޭގައި ކުރިއަށްގެންދާ 30 މަޝްރޫޢުގެ ތެރޭގައި ހިމެނޭ ދެ މަޝްރޫޢުއެވެ.
ޕާކު ހެދުމަށް ބޭނުންވާ ސާމާނު ރަމްޒީކޮށް ހަވާލުކުރުމަށް ބޭއްވި ރަސްމިއްޔާތުގައި އިންޑިއާގެ ފޮރިން ސެކްރެޓަރީ ހަރްޝް ވަރްދަން ޝްރިންގްލާ ވިދާޅުވީ އިންޑިއާގެ އެހީތައް، އެންމެ ބޮޑެތި މަސައްކަތްތަކުން ފެށިގެން އެންމެ ކުދި ދާއިރާތަކުންވެސް ފޯރުކޮށްދެމުންދާކަމަށެވެ. މިފަދަ މަޝްރޫޢުތަކަކީ ރަށްރަށުގެ ރައްޔިތުންނަށް ސީދާ ފައިދާ ލިބޭނެ ކަންތައްތައްކަން އޭނާ ފާހަގަކުރެއްވިއެވެ.
"ޕްރޮޖެކްޓްތައް މި ހިންގަނީ މުޅި ރާއްޖެއަށް ބަހާލައިގެން. މިކަމުންވެސް ކުޑަކުދިންނާ އާއިލާތަކަށް ބޮޑު ފައިދާއެއް ކުރާނެ." ޝްރިންގލާ ވިދާޅުވިއެވެ.
މިއަހަރުގެ ޖުލައިމަހު އިންޑިއާއިންވަނީ 37 ރަށުގައި އައުޓް ޑޯރ ޖިމް ހެދުމަށް ބޭނުންވާ ސާމާނުވެސް ރާއްޖެއަށް ހަދިޔާކޮށްފައެވެ.
ޢަޒްރާ ޢަލީ
ކިތަންމެ އެހީއެއްދިނަސް މިގައުމުން ތަންފުކެއްވެސް އިނޑިއާ އަސްކަރިއްޔާއަށް ދެވިގެންނުވާނެ