ދަނޑުވެރިކަމަށް ދޫކޮށްފައިވާ އަދި ދޫކުރާ ބިންތަކުން ކުރިއަށް އޮތް 3 އަހަރު ކުލި ނުނަގާނެ : ރައީސް
ރާއްޖޭގެ މީހުން ދިރިއުޅޭ ރަށްރަށުން ދަނޑުވެރިކަމަށް ދޫކޮށްފައިވާ ބިންތަކާއި، އަލަށް ދޫކުރާ ބިންތަކުން ކުރިއަށް އޮތް ތިން އަހަރުގެ ތެރޭގައި، އެއްވެސް ކުއްޔެއް ނުނެގުމަށް ނިންމަވާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެ މަނިކުފާނު މިހެން ވިދާޅުވެފައި ވަނީ މި އަހަރުގެ ދަނޑުވެރިންގެ ދުވަހުގެ މުނާސަބަތުގައި، ފޮނުއްވި ޚިޠާބުގައެވެ.
މި އަހަރުގެ ދަނޑުވެރިންގެ ދުވަހުގެ ޝިޢާރެއްގެ ގޮތުގައި ސަރުކާރުން ކަނޑައަޅާފައިވަނީ "ފަރުދީ ދަނޑުވެރިކަން - ކާނާގެ ޔަޤީންކަން" މި ޝިޢާރެވެ. ދަނޑުވެރިކަމުގެ ދުވަހުގެ ޚިޠާބު ފަށްޓަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، ރާއްޖެއާއި މުޅި ދުނިޔެ މިހާރު ކުރިމަތިލާން ޖެހިފައިވާ ކޯވިޑް-19ގެ ބަލިމަޑުކަމުގެ ތެރޭގައި ކުރެވޭ ތަޖުރިބާތަކުންވެސް، އެ ޝިޢާރާ އެއްގޮތަށް، މުޅި ޤައުމު އެކުގައި މަސައްކަތް ކުރުމުގެ މުހިންމުކަން ބޮޑުކަމަށެވެ.
ޤައުމެއްގެ ފުދުންތެރިކަމާއި އަމިއްލަވަންތަކަން ކަށަވަރުވެގެންދާނީ، އެ ޤައުމަކީ ކާބޯތަކެތީގެ ޔަޤީންކަން ލިބިފައިވާ ރައްޔިތެއް ދިރިއުޅޭ ޤައުމަކަށް ވެގެންކަން ފާހަގަކުރައްވާ ރައީސުލްޖުމްހޫރިއްޔާވަނީ ސަރުކާރުގެ ސިޔާސަތު ބިނާވެފައިވަނީ، ޤައުމަށް މެދުވެރިވާ ކޮންމެ ޙާލަތެއްގައިވެސް، އެޔަޤީންކަން ރައްޔިތުންނަށް ލިބިދިނުމަށްކަމަށް ވިދާޅުވެފައެވެ.
ދަނޑުވެރިކަމަށް ފަހި މާޙައުލެއް ޤާއިމުކޮށްދިނުމަކީ، ސަރުކާރުން ވަރަށް ބޮޑު އިސްކަމެއް ދީގެން ތަންފީޒުކުރަމުން އަންނަ ސިޔާސަތެއްކަމަށާއި، އަހަރުތަކެއްގެ މެދުކެނޑުމަކަށްފަހު، ކޮންމެ އަހަރެއްގެ އޮކްޓޫބަރު މަހުގެ 15 ވަނަ ދުވަސް، ރާއްޖޭގެ ދަނޑުވެރިންގެ ދުވަހުގެ ގޮތުގައި ފާހަގަކުރުމަށް، ސަރުކާރުން ނިންމެވީ އެ ޞިނާޢަތަށް ޚާއްޞަ ސަމާލުކަމެއް ދިނުމުގެ ބޭނުމުގައިކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އެމަނިކުފާނުގެ ވާހަކަފުޅުގައި ދަނޑުވެރިކަމަށް ފަހި ފުރުޞަތުތައް ހޯދައިދިނުމުގެ ގޮތުން، މީހުން ދިރިއުޅޭ ރަށްރަށުން ދަނޑުވެރިކަމަށް ދޫކޮށްފައިވާ ބިންތަކާއި، އަލަށް ދޫކުރާ ބިންތަކުން ކުރިއަށް އޮތް ތިން އަހަރުގެ ތެރޭގައި، އެއްވެސް ކުއްޔެއް ނުނެގުމަށް ސަރުކާރުން މިހާރު ނިންމާފައިވާކަން ވަނީ ހާމަކުރައްވާފައެވެ. އަދި ދަނޑުވެރިކަން ފުޅާކުރުމަށް އެހީތެރިވެދިނުމުގެ ގޮތުން، އިތުރު 6 ފަޅުރަށެއް ކުއްޔަށް ދޫކުރުމަށް، މިދިޔަ ހަފުތާގައި އިޢުލާނުކޮށްފައިވާކަން އެމަނިކުފާނު ފާހަގަކުރެއްވިއެވެ.
"ދަނޑުވެރިކަމަށް އެތެރެކުރާ ތަކެތިން، މީގެ ކުރިން ނަގަމުން އައި އިމްޕޯޓް ޑިއުޓީވެސް، ސަރުކާރުގެ ވަޢުދާ އެއްގޮތަށް، މިހާރު ވާނީ ކަނޑާލާފައެވެ. އަދި މިދިޔަ އަހަރުން ފެށިގެން، އެސް.ޑީ.އެފް.ސީ މެދުވެރިކޮށް، ދަނޑުވެރިކަމަށް ސަރުކާރުން އަންނަނީ ލޯނު ދޫކުރަމުންނެވެ. މީގެ އިތުރުން، ދަނޑުވެރިންގެ ފަންނީ ޤާބިލުކަން އިތުރުކުރުމަށްޓަކައި، ތަމްރީނު ޕްރޮގްރާމްތައް އިތުރުކޮށް، ޒަމާނީ ވަސީލަތްތަކުގެ އެހީގައި، ފަންނީ މަޢުލޫމާތު ފެތުރުމުގެ މަސައްކަތްވެސް ވަނީ އިތުރަށް ފުޅާކުރެވިފައެވެ." ރައީސުލްޖުމްހޫރިއްޔާގެ ޚިޠާބުގައި ވެއެވެ.
ދަނޑުވެރިންނަށް ކުރިމަތިވާ އެންމެ ބޮޑު ގޮންޖެހުމަކީ، ދަނޑުވެރިން އުފައްދާ ތަކެތި، ރަނގަޅު އަގުގައި ތާޒާކަމާއެކީ، ބާޒާރަށް ނެރެވޭނެ ފަސޭހަ ގޮތްތަކެއް ނެތުންކަމަށްވާއިރު، އެ ދަތިކަން ޙައްލުކޮށްދިނުމަށް މި އަހަރުގެ އޭޕްރީލް މަހުގެ ތެރޭގައި އެގްރޯ ނޭޝަނަލް ކޯޕަރޭޝަންގެ ނަމުގައި، ސަރުކާރުގެ 100 އިންސައްތަ ޙިއްޞާވާ ކުންފުންޏެއް އުފައްދާފައިވާކަންވެސް ރައީސުލްޖުމްހޫރިއްޔާގެ ޚިޠާބުގައި ފާހަގަކުރެއްވިއެވެ.
"އިޤްތިޞާދަށް ކުރިމަތިވެފައިވާ މި ހީނަރުކަމުން އަރައިގަތުމަށްޓަކައި، ދަނޑުވެރިކަމުގެ ދާއިރާ އިތުރަށް ތަރައްޤީކުރުމާ ގުޅޭ މަޝްރޫޢުތަކަށް، ބޭރުގެ އެހީދޭ ޖަމްޢިއްޔާ ޖަމާޢަތްތައް މެދުވެރިކޮށް އެހީ ހޯދުމުގެ މަސައްކަތްވެސް، ސަރުކާރުން އަންނަނީ ކުރަމުންނެވެ. އެގޮތުން މިހާރުވެސް ޖަޕާން ސަރުކާރުގެ ދީލަތި އެހީތެރިކަމާއެކު، ޔޫ.އެން.ޑީ.ޕީ މެދުވެރިވެގެން، ރާއްޖޭގެ ދެކުނުގައި ދަނޑުވެރިން އުފައްދާ ތަކެތި ގަނެ، ތާޒާކަމާއި ރައްކާތެރިކަމާއެކު، ބާޒާރަށް ނެރެވޭނެ ފުރިހަމަ ނިޒާމެއް ޤާއިމުކުރުމުގެ މަސައްކަތް މިއަންނަނީ ކުރަމުންނެވެ."ރައީސުލްޖުމްހޫރިއްޔާގެ ޚިޠާބުގައި ވެއެވެ.
ރައީސުލްޖުމްހޫރިއްޔާގެ ޚިޠާބުގައި އިންޓަނޭޝަނަލް ފަންޑް ފޮރ އެގްރިކަލްޗަރ ޑިވެލޮޕްމަންޓް (އިފާޑް)ގެ އެހީގައި، ރާއްޖޭގެ އުތުރުގެ 3 އަތޮޅު ޝާމިލުވާ ގޮތަށް، ދަނޑުވެރިކަން ފުޅާކުރުމުގެ މަޝްރޫއެއްގައި މި އަހަރުގެ އޮގަސްޓު މަހުގެ ތެރޭގައި ސޮއިކޮށްފައިވާކަމަށް ވިދާޅުވިއެވެ. އަދި ޚިޠާބު ނިންމަވާލެއްވީ އެ އެއްބަސްވުމުގެ ސަބަބުން، ދަނޑުވެރިކަމުގެ ޒަމާނީ ޓެކްނޮލޮޖީއަށް ދިވެހި ދަނޑުވެރިން އަހުލުވެރިކުރުވައި، ދަނޑުވެރިކަމުގެ އުފެއްދުންތައް ވިއްކައި މާކެޓް ކުރުމަށާއި، ދަނޑުވެރިންނަށް ފަންނީ އެހީތެރިކަން ފޯރުކޮށްދެވޭނެ ފުރިހަމަ ނިޒާމެއް ޤާއިމުވެގެންދާނެ މަޝްރޫޢަކަށް ވެގެންދާނެކަމަށް ވިދާޅުވަމުންނެވެ.