ކުށުގެވެށީގެ ޙާލަތަށް ބަލައި އިތުރު "ލެސް ލީތަލް" ހަތިޔާރު ބޭނުންކުރުމުގެ ވިސްނުން އެބަހުރި - ސީޕީ ޙަމީދު
ރާއްޖޭގެ މުޖުމަތަޢުގައި އަލަށް އުފެދެމުން އަންނަ ކުށްތަކާއި ކުށްކުރާ މީހުންގެ ކިބައިން ފެންނަ އަނިޔާވެރިކަމަށްބަލައި އިތުރު ބާރު ފުލުހުންނަށް ލިބެންޖެހޭކަމަށް ޤަބޫލުފުޅުކުރައްވާކަމަށާ، އިތުރު "ލެސް ލީތަލް" ހަތިޔާރު ބޭނުންކުރުމުގެ ވިސްނުން ފުލުހުންގެ އެބަހުރިކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ. ސީޕީ ޙަމީދު މިހެން ވިދާޅުވީ ފުލުހުންގެ އޮޕަރޭޝަންތަކުގައި "ޓޭޒަރ ގަން" ބޭނުންކުރުމާ ގުޅޭގޮތުން ވާހަކަފުޅު ދައްކަވަމުންނެވެ.
ޕީއެސްއެމް ނިއުސްގެ ކޯވިޑް-19، ލައިވް ކަވަރޭޖުގައި ފޯނުން ވާހަކަފުޅުދައްކަވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ، ފުލުހުންގެއޮޕަރޭޝަންތަކުގައި ބޭނުންކުރުމަށް ނިންމާފައިވާ "ޓޭޒަރ ގަން" ބޭނުންކުރާނެ ގޮތް ލިޔެވި ފުލުހުންނަށް އެކަމުގެ ތަމްރީންތައް ދޭނެ ޕްލޭނެއް ތައްޔާރުކުރެވިފައިވާކަމަށެވެ. މި ހަތިޔާރު ޢާންމުން އެއްވާތަންތަނާއި، މަގުތަކުގައި ގިނަބަޔަކު އެއްވެ އުޅޭ ތަންތަނުގައި ބޭނުން ނުކުރާނެކަމަށް ސީޕީ ވިދާޅުވިއެވެ. މި ހަތިޔާރު ބޭނުންކުރަން ނިންމާފައިވަނީ ވަކިވަކި މީހުންގެ ފަރާތުން ފެންނަ ނުރައްކާތެރިކަމާއި، ހަތިޔާރު ބޭނުންކޮށްގެން ފުލުހުންނަށް ނުވަތަ ރައްޔިތުންގެ ފުރާނައަށް ނުރައްކާވާފަދަ ހަމަލާއެއް ދީފާނެކަމަށް ބެލެވޭ ހާލަތްތަކަށް ރިޔާޢަތްކޮށްކަމަށްވެސް ސީޕީ ވިދާޅުވިއެވެ. މިއީ ސަރަހައްދީ އެހެން ޤައުމުތަކުގައިވެސް ބޭނުންކުރާ ހަތިޔާރެއްކަމަށާއި، 100އަށްވުރެ ގިނަ ޤައުމުގައި "ޓެއިޒަރ ގަން" ބޭނުންކުރާކަން ކޮމިޝަނަރ ފާހަގަކުރެއްވިއެވެ.
މިހަތިޔާރު ފުލުހުން ބޭނުންކުރާނެކަން ހާމަކުރުމުން ޢާންމުންގެ މެދުގައި އޮތް ނުތަނަވަސްކަމާގުޅޭ އިތުރު ތަފްސީލް ހިއްސާކުރައްވަމުން ޙަމީދު ވިދާޅުވީ، އެއްވެސް ބާވަތެއްގެ ބާރެއް ފުލުހުންނަށް ދޭއިރު ޢާއްމުން ޝައްކުގެ ނަޒަރުން ބަލާނެކަމަށެވެ. ނަމަވެސް އެބާރެއް ފުލުހުން ބޭނުންކުރާއިރު، އެބާރު ބޭނުންކުރާ ފުލުހުން ޖަވާބުދާރީކުރުވުމާއި ބޭނުންކުރަނީ އެކަށީގެންވާ ބާރުތޯ ބެލުމަކީ ފުލުހުން ބަލައިގަންނަނަ ހަމައެއްކަންވެސް ހަމީދު ފާހަގަކުރެއްވިއެވެ.
ރައްޔިތުންގެ ރައްކާތެރިކުރުމަށް ފުލުހުން ތިބޭއިރު، މާޙައުލުގައި ހުންނަ ކުށްތަކާއި، އަލަށް އުފެދެމުން އަންނަ ކުށްތަކާއި ކުށްކުރާ މީހުންގެ ކިބައިން ފެންނަ އަނިޔާވެރިކަމަށްބަލައި މިފަދަ ހަތިޔާރު ފުލުހުންގެ ތެރޭގައި ހުންނަންޖެހޭނެކަމަށް ޤަބޫލުކުރައްވާކަމަށާއި، މިއީ ފުލުހުންގެ ލީޑާޝިޕުން ދެކޭގޮތްކަމަށްވެސް ޙަމީދު ވިދާޅުވިއެވެ. ނަމަވެސް އެފަދަ ކަންކަން ފުލުހުން ނިންމާނީ ފުލުހުން ޖަވާބުދާރީކުރުވަން ހުރި މުއައްސަސާތަކާއި، ރައްޔިތުން މިކަމުގައި ދެކޭގޮތް ބަލައި އެހުރިހާ ފަރާތްތަކެއްގެ ވިސްނުމާއި މަޝްވަރާގެ މަތިންކަން ސީޕީ ފާހަގަކުރެއްވިއެވެ.
"އަޅުގަނޑުމެން ޤަބޫލުކުރަންޖެހޭނީ މިއަދު 15 އަހަރުވީ ޚިދުމަތެއް ކަމުގައި ވިޔަސް ނުވަތަ މުއައްސަސާއަކަށްވިޔަސް އަޅުގަނޑުމެންނަށް ޕޮލިސް ސާރވިސް ތަރައްޤީކުރުމާ އެކުއެކީ، ހަރުދަނާ ކުރުމާ އެކުއެކީ އެބަޖެހޭ ފުލުހުންނަށް ލިބެންޖެހޭ ވަސީލަތްތައްވެސް ލިބެން. ޕްރޮފެޝަނަލައިޒް ކުރެވޭނީކީއެއް ހަމައެކަނި ފުލުހުން އެ އޮތްގޮތަށް ދެމިއޮވެގެނެއްނޫން. އިތުރު އެޑްވާންސްމަންޓް އިތުރު ތަރައްޤީ އަންނަޖެހޭނެ. އަޅުގަނޑު ރައްޔިތުންނަށް ޔަޤީންކަން މިދެނީ ފުލުހުންނަކީ ޒިންމާދާރުކަމައެކު ރައްޔިތުންނަށްވެސް އަދި ޖަވާބުދާރީވާންޖެހޭ މުއައްސަސާތަކަށްވެސް ޖަވާބުދާރީވާނެ މުއައްސަސާއެއް." ކޮމިޝަނަރ އޮފް ޕޮލިސް ވިދާޅުވިއެވެ.
ފުލުހުންގެ ފަރާތުން ހާލަތާއި ނުބައްދަލު ބާރުގެ ބޭނުންކުރާތަން ފާއިތުވިތަނުގައި ފެނިފައިވާކަން ފާހަގަކުރައްވަމުން ސީޕީ ޙަމީދު ވިދާޅުވީ، އެމައްސަލަތައް ބަލައި ފިޔަވަޅު އަޅާފައިވާކަމަށާ، އެފަދަ ކަންކަން ނުހިނގާނެގޮތަކަށް ކަންކަން އިސްލާޙުކުރުމުގެ މަސައްކަތްކުރަމުންދާކަމަށެވެ.
ފާއިތުވި ތަނުގައި އެކަށީގެން ނުވާބާރުގެ ބޭނުންކުރުމުގެ 32 މައްސަލައެއް ބަލައި 4 މައްސަލައްއެއްގައި ފުލުހުން އެކަށީގެންނުވާ ބާރުތައް ބޭނުންކޮށްފައިވާކަން ޔަޤީންކުރެވިގެން ބައެއް ފުލުހުން ވަޒީފާއިން ވަކިކުރުމާއި ޑީމޯޓްކުރުންފަދަ ފިޔަވަޅުތައް އަޅަފައިވާކަމަށް ޙަމީދު ވިދާޅުވިއެވެ. ނަމަވެސް ނުރައްކާތަކާއި ކުރިމަތިމަތިލާން އެއީ ހުރަހަކަށް ވެގެންނުވާކެކަމަށާ، އެކަންކަމަށް ރިޔާއަތްކުރުމާއެކުވެސް ރައްޔިތުންގެ ސަލާމަތަށްޓަކައި، ނުރައްކަލާ ކުރިމަތިލުމަށް އިތުރު ވަސީލަތްތައް ލިބެންޖެހޭނެކަމަށް ޤަބޫލުކުރައްވާކަމަށް ސީޕީ ޙަމީދު ތަކުރާރުކޮށް ވިދާޅުވިއެވެ.
"ވަރަށް އިފެކްޓިވް ފޯސް އޮޕްޝަންތަކެއް މިއީ. އެކަން ތަފާސް ހިސާބުތަކުން ދެއްކެންވެސް އެބައޮތް. ދުނިޔޭގަ ގަތްގަނޑަކަށް 850،000 ވުރެ ގިނަ މީގެ ޑިވައިސް ބޭނުންކުރޭ. ގާތްގަނޑަކަށް އަށާރަ ހާސް ޕޮލިސްފޯސް ނުވަތަ ލޯ އެންފޯސްމަންޓް އެޖެންސީތަކުގައި ދުނިޔޭގެ އެތައް ޤައުމެއްގައި ބޭނުންކުރޭ. އެހެންކަމުން މިއީ އެންމެ ތަރައްްޤީވެފައިވާ ޤައުމުތަކަށްބަލާއިރުވެސް އިނގެރޭސިވިލާތް، އެމެރިކާ އަދި އޮސްޓްރޭލިޔާގަވިޔަސް ފާއިތުވި 3 އަހަރުތެރޭގައި އެ ފޯސަސްތަކުންވެސް ވަނީ މި ފޯސް އޮޕްޝަން ވަރަށް ބޮޑަށް ބަލައިގެންފައި. މިއަށް ވަރަށް ބޮޑަށް އިންވެސްޓްކޮށްފައިވަނީ." ސީޕީ ޙަމީފދު ވިދާޅުވިއެވެ.
ހުރިހާ ފަރާތްތަކުގެ މަޝްވަރާއާއެކު މިފަދަ ހަތިޔަރާއެކު ކުރިއަށް ދިއުމުގެ ވިސްނުން އެބަހުރިކަމަށާއި، މުޖުތަމަޢުގެ ރައްކާތެރިކަމުގެ ފިޔަވަޅަކަށް "ލެސް ލީތަލް" ހަތިޔާރަކި ވަރަށް ބޭނުންތެރި ވަސީލަތެއްކަމަށް، ކޮމިޝަނަރ އޮފް ޕޮލިސް ވިދާޅުވިއެވެ.