ބ. ތުޅާދޫ ގެއެއްގެ ތެރެއިން މަރުވެފައިވާ ކުޑަ ކުއްޖަކު ފެނުނު މައްސަލައެއް ފުލުހުން ތަހުގީގު ކުރަން ފަށައިފިއެވެ.ފުލުހުންގެ މީޑިޔާ އޮފިޝަލް ވިދާޅުވީ، އެ މައްސަލަ ފުލުހުންނަށް ހުށައަޅާފައިވަނީ ތުޅާދޫ ސިއްހީ މަރުކަޒުން ކަމަށާއި، މައްސަލަ ތަހުގީގު ކުރަން ފެށީ ކުއްޖާގެ މަރުގައި ޝައްކުވާ ކަންތައްތަކެއް ހުރުމުން ކަމަށެވެ. އެގޮތުން ތަހުގީގުތަކަށް ބޭނުންވާތީ ކުއްޖާ ވަޅުނުލާ ބާއްވާފައިވާ ކަމަށްވެސް ފުލުހުންގެ މީޑިޔާ އޮފިޝަލް ވިދާޅުވިއެވެ.ބ.އޭދަފުށީގައި ތިބި ޖެންޑަރ މިނިސްޓްރީގެ ޓީމަކުންވެސް މިހާރު ތުޅާދޫއަށް ގޮސް މި މައްސަލަ ތަހުގީގު ކުރަމުންދާ ކަމަށް މަޢުލޫމާތު ލިބެއެވެ.މިކަމާއި ގުޅިގެން ތުޅާދޫ ކައުންސިލުގެ މެންބަރު އާމިނަތު ރައޫފާ ވިދާޅުވީ، ފުލުހުން ތަހުގީގު ކުރަމުންދާ މައްސަލައަކަށްވާތީ މިކަމުގައި ކައުންސިލުން މީޑިޔާތަކަށް މައުލޫމާތު ދެމުން ނުދާ ކަމަށެވެ. އަދި މާލެއިން ޖެންޑަރ މިނިސްޓްރީގެ ޓީމެއް ތުޅާދުއަށް އައުމަށް މަސައްކަތް ކުރަމުންދާ ކަމަށްވެސް ރައޫފާ ވިދާޅުވިއެވެ.މިކަމާއި ގުޅިގެން ތުޅާދޫ ސިއްހީ މަރުކަޒުގެ އޮފިޝަލެއް ވިދާޅުވީ މަރުވެފައިވާ ކުއްޖާ ވިހެއިފަހުން 48 ގަޑިއިރު ވެފައިވާ ކަމަށާއި، ކުއްޖާއަކީ ދުވަސްފުރާ ވިހާފައިވާ ކުއްޖެއް ކަމަށެވެ.