މިދައުރުގެ ތެރޭގައި މާލޭގެ ގިނަ ބަޔަކަން ބޯހިޔާވަހިކަން ޔަޤީންކޮށްދޭނަން: ޕްލޭނިންގ މިނިސްޓަރ އަސްލަމް

މި ސަރުކާރުން މިދައުރުގެ ތެރޭގައި ހިންގާ ބޯހިޔާވަހިކަމުގެ މަޝްރޫޢުތަކުން މާލޭގެ އާބާދީގެ ގިނަ ބަޔަކަށް ބޯހިޔާވަހިކަން ފޯރުކޮށްދޭނެކަމުގައި މިނިސްޓަރ އޮފް ނެޝަނަލް ޕްލޭނިންގް އެންޑް އިންފްރާންސްޓަރކްޗަރ މުހައްމަދު އަސްލަމް ވިދާޅުވެއްޖެއެވެ.

މި ސަރުކާރުން ފަށާ އެންމެ ފުރަތަމަ ހައުސިން ޕްރޮޖެކްޓް، "ފަހި ދިރިއުޅުން" މަޝްރޫޢުގެ ދަށުން ސަރުކާރުން އަޅާ 1700 ހައުސިންގ ޔުނިޓްގެ ބިންގާއެޅުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އަސްލަމް ވަނީ ރައްޔިތުންނަށް އެކަމުގެ ޔަޤީންކަން ދެއްވާފައެވެ.

"ފަހި ދިރިއުޅުން" މަޝްރޫޢުގެ ދަށުން ހުޅުމާލޭ ދެވަނަ ފިޔަވަހީގައި ސަރުކާރުން އަޅާ 1700 ހައުސިންގ ޔުނިޓްތަކުގެ ބިންގާ އަޅުއްވާދެއްވީ މިނިސްޓަރ އިފް ނެޝަނަލް ޕްލޭނިންގް އެންޑް އިންފްރާންސްޓަރކްޗަރ މުހައްމަދު އަސްލަމާއި، މިނިސްޓަރ އޮފް ހައުސިންގް އެންޑް އާބަން ޑިވެލޮޕްމެންޓް އާމިނަތު އާތިފާގެ އިތުރުން ފަހި ދިރިއުޅުން ކޯޕަރޭޝަންގެ އިސްވެރިންނާއި މިމަޝްރޫއު ހަވާލުކޮށްފައިވާ ސައިނޯހައިޑްރޯ ގްލޯބަލްގެ އިސްވެރިންނެވެ.

މި މަޝްރޫޢުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ޕްލޭނިންގ މިނިސްޓަރ މުޙައްމަދު އަސްލަމް ވިދާޅުވީ، މި ސަރުކާރުން ބޯހިޔާވަހިކަމުގެ މަޝްރޫޢުތައް ކުރިއަށްގެންދަނީ ރައްޔިތުންގެ އާމްދަނީ އާއި ،ދިރިއުޅުމުގެ ހާލަތު ދެނެގަތުމަށް ފަހުގައިކަމަށެވެ. މި ސަބަބައްޓަކައި މި ސަރުކާރުން ހުރިހާ ފަންތިއެއްގެ ރައްޔިތުންނަށްވެސް ބޯހިޔާވަހިކަން ފޯރުކޮށްދޭނެ ކަމުގެ ޔަޤީންކަން މިނިސްޓަރ ދެއްވިއެވެ. ވޭތުވެ ދިޔަތަނުގައި ބޯހިޔާވަހިކަމުގެ މަޝްރޫޢުތައް ދިގުލައިގެންގޮސް ރައްޔިތުންގެ ޝަކުވާ ބޮޑުވެގެންގޮސްފައިވާކަން ފާހަގަކުރައްވާ މިނިސްޓަރ އަސްލަމް ވަނީ މި ސަރުކާރުން މިދައުރުގެ ތެރޭގައި ހިންގާ ބޯހިޔާވަހިކަމުގެ މަޝްރޫޢުތައް ނިންމައި، މާލޭގެ އާބާދީގެ ގިނަ ބަޔަކަން ބޯހިޔާވަހިކަން ފޯރުކޮށްދޭނެކަމަށެވެ. މިފަހަރު ބިންގާއެޅި ޓަވަރުތަކުގެ އެޕާޓްމެންޓްތަކަކީ ޖާގަ ތަނަވަސް ދިރިއުޅެން ފަސޭހަތަނަކަށް ވާނެކަކަމުގައިވެސް މިނިސްޓަރ އަސްލަމް ފާހަގަކުރެއްވިއެވެ.

"މިދިޔަ ސަރުކާރުގައި ފެށި އެއްވެސް ހައުސިންގް ޔުނިޓެއް ދައުރުގައި ނިމިފައެއް ނުވޭ، އަޅުގަނޑުމެން މި ސަރުކާރުން މިދައުރުގެ ތެރޭގައި ހިންގާ ބޯހިޔާވަހިކަމުގެ މަޝްރޫޢުތައް ނިންމާ، މާލޭގެ ބޮޑު ބަޔަކަން ބޯހިޔާވަހިކަން ފޯރުކޮށްދޭނަން. މި އެޕާޓްމެންޓްތަކަށް ވަދެވޭނެ މި ފަސްއަހަރުގައި. މިދިޔަ ދައުރުގައި ފްލެޓްތަކުގައި 550 އަކަފޫޜު ހުންނައިރު މިކަމުގެ އުނދަގޫ ރައްޔިތުން ތަހައްމަލްކުރާނެ. މިގޮތައް އަޅުގަނޑުމެން ބިނާކުރާ ފްލެޓްތަކުގެ ކަންތައްތަކެއް ކުރިމައްޗެއް ނުވާނެ." މިނިސްޓަރ އަސްލަމް ވިދާޅުވިއެވެ.

އަމިއްލަ ބޯހިޔާވަހިކަމެއް ނެތް ފަރާތްތަކަށް އަތްފޯރާއަގެއްގައި ބޯހިޔާވަހިކަން ފޯރުކޮށްދިނުމަށްޓަކައި ކުރިއަށްގެންދާ 1700 ހައުސިންގ ޔުނިޓްގެމި މަޝްރޫޢުގެ ދަށުން ހަސިންގ ޔުނިޓްތައް ހަދާފައި ހުންނާނީ 15 އަދި 16 ފަންގިފިލާގެ 11 ޓަވަރުގައެވެ. މީގެ ތެރޭގައި ހިމެނެނީ 900 އަކަފޫޓުގެ 3 ކޮޓަރީގެ 1020 އެޕާޓްމަންޓާއި، 650 އަކަފޫޓުގެ 2 ކޮޓަރީގެ 680 އެޕާޓްމަންޓެވެ. ގާތްގަނޑަކަށް 133 މިލިއަން ޑޮލަރު ޚަރަދުވާ މިމަޝްރޫގެ ޢަމަލީ މަސައްކަތް 2 އަހަރު ދުވަހުގެ ތެރޭގައި ނިންމާލެވޭނެކަމަށް ސަރުކާރުން ލަފާކުރެއެވެ.