ގްރޭޓަރ މާލެ ސަރަހައްދުގައި ކަރަންޓުގެ ޔަޤީންކަން ކަށަވަރުކުރުމަށްޓަކައި އިއާދަކުރަނިވި ހަކަތައިގެ ޕްރޮޖެކްޓަކާއެކު މިދައުރުގެ ތެރޭގައި ގިނަ ޕްރޮޖެކްޓްތަކެއް ހިންގުމަށް ނިންމާފައިވާކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ ވިދާޅުވެއްޖެއެވެ. މުޣުނީ ވަނީ މިއަހަރުގެ ފަހު ކުއާޓަރގެ ތެރޭގައި ގްރޭޓަރ މާލެ އިންޓަރ ކަނެކްޝަންގެ ފުރަތަމަ ފިޔަވަހީގެ މަސައްކަތް ނިމޭނެކަން ހާމަކުރައްވާފައެވެ.
ސްޓޭޓް އިލެކްޓްރިކް ކޮމްޕެނީ ލިމިޓެޑް ސްޓެލްކޯގެ މަސައްކަތްތަކުގެ އެންމެ ފަހުގެ މަޢުލޫމާތު ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ހިއްސާކުރައްވަމުން ކުންފުނީގެ މެނޭޖިންގް ޑިރެކްޓަރ ހަސަން މުޣުނީ ވަނީ މިދިޔަ ސަރުކާރުން މަސައްކަތް ފެށި ފިފްތު ޕަވަރޕްރޮޖެކްޓުން އުފައްދާ 50 މެގަވޮޓް ކަރަންޓުން ގްރޭޓަރ މާލެ ސަރަހައްދުގައި ކަރަންޓުގެ ޔަޤީންކަން ކަށަވަރުނުކުރެވޭނެކަމަށް ވިދާޅުވެފައެވެ.
މި ސަރުކާރުން މި ދައުރުގެ ތަރައްޤީގެ ގިނަ ބިޔަ ޕްރޮޖެކްޓްތަކެއް މި ސަރަހައްދުގައި ހިންގަން ނިންމާފައިވާއިރު، މިއިން ކޮންމެ ޕްރޮޖެކްޓަކަށް ކަރަންޓުގެ ވިޔުގަ ފުޅާކޮށް ހަރުދަނާ ކުރަންޖެހޭނެކަން މުޣުނީ ފާހަގަކުރެއްވިއެވެ. އެގޮތުން މި ދައުރުގެ ތެރޭގައި މާލެ ވިލިނގިލި ތިލަފުށި އަދި ގުޅީފަޅު ބްރިޖްތަކުން ގުޅާލުމަށް ނިންމާފައިވާއިރު މި ބްރިޖްތަކުން އިންޓަކަނެކްޝަންގެ އިތުރު ޕްރޮޖެކްޓްތަކެއް ހިންގުމަށް ނިންމާފައިވާކަމަށް މުޣުނީ ވިދާޅުވިއެވެ. މިމޭރުމުން ވާހަކަދައްކަވަމުން މުޣުނީ ވަނީ މި ދައުރުގެ ތެރޭގައި ރާއްޖޭގެ ތާރީޚުގެ އެންމެ ބިޔަ އިއާދަކުރަނިވި ހަކަތައިގެ ޕްރޮޖެކްޓް ހިންގުމަށް ނިންމާފައިވާކަން ހާމަކުރައްވާފައެވެ. އިރުގެ އަވިން ހަކަތަ އުފައްދާ "ފްލޯޓިންގް ސޯލަރ އެނަރޖީ" މަޝްރޫޢެއް ހިންގުމަށް ނިންމާފައިވާއިރު، ހުޅުމާލޭގައި އިތުރު 50 މެގަވޯޓްގެ ކަރަންޓު އުފެއްދުމާއި ގުޅީފަޅާއި ތިލަފުށީގައި ހަކަތަ އުފައްދާ ޕްރޮޖެކްޓްތަކެއް ހިންގުމަށް ވަނީ ނިންމާފައެވެ.
"އަޅުގަނޑު ފާހަގަކޮށްލަން މިދިޔަ ސަރުކާރުން ފެށި ފިފްތު ޕަވަރ ޕްރޮޖެކްޓުން ގްރޭޓަރ މާލެ ސަރަހައްދުގައި ކަރަންޓުގެ ޔަޤީންކަން ކަށަވަރު ނުކުރެވޭނެ. މި ސަރުކާރަކީ އިއާދަކުރަނިވި ހަކަތަ ޕްރޮމޯޓްކުރާ ޤައުމެއް އެހެންކަމުން އަޅުގަނޑުމެން ފްލޯޓިން ސޯލާ ޕްރޮޖެކްޓެއް ކުރިއަށްގެން ދިއުމަށް ވަނީ ނިންމާފައި." މުޣުނީ ވިދާޅުވިއެވެ.
ރާއްޖެ މިއަދު ޕްރޮގްރާމްގައި ވާހަކަދައްކަވަމުން ސްޓެލްކޯގެ މެނޭޖިންގް ޑިރެކްޓަރ ވަނީ މިއަހަރުގެ ފަހު ކުއާޓަރގައި ގްރޭޓަރ މާލެ އިންޓަކަނެކްޝަންގެ ފުރަތަމަ ފިޔަވަހީގެ މަސައްކަތް ނިމޭނެކަން ހާމަކުރައްވާފައެވެ. އެގޮތުން މި ޕްރޮޖެކްޓްގެ ދަށުން 3 ސަބްސްޓޭޝަން މާލެ، ހުޅުލެ އަދި ހުޅުމާލޭގައި ޤާއިމުކުރުމަށް ނިންމާފައިވާއިރު، މާލެ ސަބްސްޓޭޝަންގެ މަސައްކަތް ބާރު ސްޕީޑެއްގައި ދަނީ ކުރަމުންންވެ.
މާލޭ ސަރަޙައްދުގެ ޕަވަރ ސެކިއުރިޓީ ވަރުގަދަ ކުރުމަށް ހިންގާ މަޝްރޫޢާއެކު ކަރަންޓުގެ ޚިދުމަތް ފޯރުކޮށްދިނުމުގައި މިހާރަށްވުރެ ލުއިފަސޭހަވެގެންދާނެ ކަމަށް މުޣުނީ ވިދާޅުވިއެވެ. ވަކިން ޚާއްސަކޮށް ޖަނަރޭޓަރުތައް އޯވަރލޯޑުވެގެން ކަރަންޓު ކެނޑޭކެނޑުން ނިމުމަކަށް އައިސް، ޕަވަރ ޝޯޓޭޖެއް އަތުވެއްޖެ ހާލަތެއްގައި ކުޑަވަގުތުކޮޅެއްގެ ތެރޭގައި ކަރަންޓު އަނބުރާ ފޯރުކޮށްދެވޭނެކަމަށް މުޣުނީ ފާހަގަކުރެއްވިއެވެ.
"މިއަހަރުގެ ފަހު ކުއާޓަރގައި ގްރޭޓަރ މާލެ އިންޓަކަނެކްޝަންގެ ފުރަތަމަ ފިޔަވަހީގެ މަސައްކަތް ނިމޭނެ. ތި ބޭފުޅުންނަށް ސްޓެލްކޯ އޮފީސް ފަހަތުގައި މާލެ ސަބްސްޓޭޝަންގެ މަސައްކަތް ބާރު ސްޕީޑްގައި ކުރާތަން ފެނިވަޑައިގަންނަވާނެ." މުޣުނީ ވިދާޅުވިއެވެ.
ގްރޭޓަރ މާލެ ސަރަހައްދުގައި ކަރަންޓުގެ ޔަޤީންކަން ކަށަވަރުކުރުމައްޓަކައި އިއާދަކުރަނިވި ހަކަތައިގެ ޕްރޮޖެކްޓަކާއެކު މިދައުރުގެ ތެރޭގައި ގިނަ ޕްރޮޖެކްޓްތަކެއް ހިންގުމަށް ނިންމާފައިވާއިރު، ސްޓެލްކޯގެ ދުރު ރާސްތާ ޕްލޭނުގެ އަމާޒަކީ ރާއްޖޭގެ ކަނޑުފަޅުން ކަރަންޓު އުފެއްދުންކަމަށް އެ ކުންފުނީގެ މެނޭޖިންގް ޑިރެކްޓަރ ހަސަން މުޣުނީ މީގެ ކުރިން ވަނީ ވިދާޅުވެފައެވެ.