ދ. ކުޑަހުވަދޫއަށް ނަގޫރޯޅިއެއް އަރާ ގެއަކަށް ގެއްލުންވެއްޖެއެވެ.
ކުޑަހުވަދޫއަށް މި ނަގޫރޯޅި އަރާފައިވަނީ މިއަދު ހަވީރު 16:30 ހާއިރެވެ. ޕީ.އެސް.އެމް ނިއުސްއަށް މަޢުލޫމާތުދެއްވަމުން ކުޑަހުވަދޫ ކައުންސިލުގެ ރައީސް ޢަހްމަދު ޝާމް ވިދާޅުވީ، މި ޙާދިސާގައި ގެއްލުން ލިބިފައިވަނީ އެރަށުގެ ހުޅަނގުކޮޅުގައި ހުންނަ މީހުން ދިރިއުޅޭ ގެއަކަަށް ކަމަށެވެ.
އެގޮތުން އެގޭގެ ފުރާޅުގެ 10 ގަނޑު ޓިނު ނަގޫރޯޅިއާއެކު އެއްލާލާފައިވާކަމަށް އޭނާ ވިދާޅުވިއެވެ. އަދި އެމް.އެން.ޑީ.އެފްއާއި ކުޑަހުވަދޫ ކައުންސިލުން ގުޅިގެން ގެއްލުން ލިބުނު ގޭގެ ފުރާޅު މަރާމާތުކޮށްދިނުމުގެ މަސައްކަތް ކުރަމުންދާކަމަށް ޝާމް ވިދާޅުވިއެވެ.
ކުޑަހުވަދޫއަށް މިއަދު ހަވީރު ނަގޫރޯޅިއެއް އެރިނަމަވެސް، ރަށުގެ މޫސުން އާއްމުގޮތެއްގައި ރަނގަޅުކަމަށްވެސް ކުޑަހުވަދޫ ކައުންސިލުން ބުނެއެވެ. އަދި މި ޙާދިސާގައި އިތުރު ގެއްލުންތަކެއް ލިބިފައިނުވާކަމަށްވެސް ކުޑަހުވަދޫ ކައުންސިލުން މަޢުލޫމާތުދެއެވެ.