ނަސްރުﷲ ވެއްޓުނީ ސީދާ ކޮން ސަރަޙައްދަކަަށްކަން ނޭނގުމަކީ އޭނާ ހޯދުމުގެ މަސައްކަތަށް އޮތް ގޮންޖެހުމެއް - އެމް.އެން.ޑީ.އެފް
ބ.އޭދަފުށީ މުޝްތަރީގޭ، ނަސްރުﷲ ޢަބްދުﷲ ހޯދުމަށް ގޮންޖެހުންތަކެއް ކުރިމަތިވެފައިވާނީ އޭނާ ކަނޑަށް ވެއްޓުނީ ސީދާ ކޮން ސަރަޙައްދަކަށްކަމެއް ފާހަގަކުރެވިފައިނެތުމުންކަމަށް އެމް.އެން.ޑީ.އެފުން ވިދާޅުވެއްޖެއެވެ.
ނަސްރުﷲ ޢަބްދުﷲ ގެއްލިފައިވަނީ ރޭ އިރުއޮއްސުނު ފަހުން ބ.ދޮންފަނާއި އެއަތޮޅު ހަނިފަރާދެމެދުން ލޯންޗަކާއި ޑިންގީއެއްޖެހި ހިނގި އެކްސިޑެންޓެއްގައި އޭނާ ކަނޑަށް ވެއްޓުމުގެ ސަބަބުންނެވެ. އޭނާ ހޯދުމުގެ މަސައްކަތް ފުލުހުންނާއި ސިފައިން އަދިވެސް ދަނީ ކުރަމުންނެވެ.
ނަސްރުﷲ ހޯދުމަށް ސަލާމަތީ ޚިދުމަތްތަކުން ކުރިއަށްގެންދާ ޚާއްސަ އޮޕަރޭޝަންގެ އެންމެފަހުގެ މަޢުލޫމާތު މީޑިއާއަށް ހިއްސާކުރައްވަމުން އެމް.އެން.ޑީ.އެފް ކޯސްޓްގާޑްގެ ޕްރިންސިޕަލް ޑައިރެކްޓަރ ލެފްޓިނަންޓް ކާނަލް އަޙްމަދު މުޖުތަބާ މުޙައްމަދު ވިދާޅުވީ، މި ޙާދިސާގެ މަޢުލޫމާތު މެރިޓައިމް ރެސްކިއު ކޯޑިނޭޝަން ސެންޓަރަށް ރޭ ލިބުމާއެކު އޭނާ ހޯދުމުގެ މަސައްކަތް ފަށާފައިވާކަމަށެވެ. އަދި ނަސްރުﷲ ހޯދުމަށްޓަކާ ކަނޑުއަޑިންނާއި، ކަނޑުމަތިން އަދި ވައިގެ މަގު ހިމެނޭހެން "ތްރީ ޑައިމެންޝަނަލް ސާރޗެއް" ކުރިއަށްގެންދާކަމަށެވެ. ނަމަވެސް އޭނާ ހޯދުމަށްޓަކާ ކުރަމުންދާ މަސައްކަތުގައި އަދި އެދެވޭ ކުރިއެރުންތަކެއް ލިބިފައިނުވާކަމަށާއި، އެ މަސައްކަތަށް ކުރިމަތިވެފައިވާ އެންމެ ބޮޑު ގޮންޖެހުމަކީ ނަސްރުﷲ ކަނޑަށް ވެއްޓުނީ ސީދާ ކޮން ސަރަޙައްދަކުންކަމެއް ފާހަގަކުރެވިފައިނުވާތީކަމަށް ކާނަލް މުޖުތަބާ ވިދާޅުވިއެވެ.
"އަޅުގަނޑުމެންނަށް ބޮޑަށް ލަފާކުރެވެނީ މި އެކްސިޑެންޓު ހިނގި ސަރަޙައްދަކީ ދޮންފަނުގެ ހުޅަނގުދެކުނުން އޮންނަ އަނގަފަރު ކިޔާ ފަރެއް އޮވޭ. އެ ފަރު ކައިރިންކަމަށް. ދެން ސީދާ ޕިންޕޮއިންޓްކޮށް އެ ލޮކޭޝަން އަޅުގަނޑުމެންނަށް ނޭންގޭތީ ހަޤީޤަތުގައި އަޅުގަނޑުމެންނަށް ކޮމްޕްލިކޭޓްވެގެން މިއުޅެނީ މި އޮޕަރޭޝަން. ނަމަވެސް އަޅުގަނޑުމެންގެ ހުރިހާ ރިސޯސަސްތަކެއް މިކަމުގައި މިދަނީ ބޭނުންކުރަމުން" ކާނަލް މުޖުތަބާ ވިދާޅުވިއެވެ.
ކާނަލް މުޖުތަބާ ވިދާޅުވީ، ނަސްރުﷲ ޢަބްދުﷲ ހޯދުމުގެ މަސައްކަތުގައި ކޯސްޓްގާޑުގެ އެންމެ ބޮޑު އުޅަނދު ޝަހީދު ޢަލީއާއި، ކޯސްގާޑް ފާމުލަދޭރި ފާސްޓް އިންޓަރސެޕްޓަރ ކްރާފްޓާއި، ހާބަރ ކްރާފްޓެއްވެސް އެ ސަރަޙައްދުގައި ޑައިވަރުންނާއެކު ހަރަކާތްތެރިވަމުންދާކަމަށެވެ. އަދި ހެލިކޮޕްޓަރު ބޭނުންކޮށްގެން 120 ސްކޮޔަރ ނޯޓިކަލް މޭލްގެ ސަރަޙައްދެއް ބަލާފާސްކުރުމުގެ މަސައްކަތް ކުރަމުންދާކަމަށްވެސް އޭނާ ވިދާޅުވިއެވެ. ނަސްރުﷲ ހޯދުމަށް ހިންގާ އޮޕަރޭޝަންގައި ބ. އަތޮޅުގެ ރިސޯޓުތަކާއި ރަށްރަށުގެ އެހީތެރިކަންވެސް ފުލުހުންނާއި ސިފައިންނަށް ލިބެމުންދާކަން ކާނަލް މުޖުތަބާ ވަނީ ފާހަގަކުރައްވާފައެވެ.
ޙާދިސާއާ ގުޅޭގޮތުން ނަސްރުﷲ ދަތުރުކުރި ޑިންގީގައި ތިބި މީހުންގެ ތެރެއިން ސަލާމަތްވި ދެމީހުންނާ ޙަވާލާދީ، ދަރަވަންދޫ ކައުންސިލްގެ ރައީސް ޢަލީ މާޖިދު ވިދާޅުވެފައިވަނީ، ޑިންގީގައި ލޯންޗު އައިސްޖެހުނީ ފަހަތުން ކަމަށެވެ. އަދި ޑިންގީގައި އެމީހުން ނުކުމެ އުޅުނީ މަސްވެރިކަން ކުރަން ކަމަށާ، އެކްސިޑެންޓު ހިނގީ ރަށަށް އެނބުރި އަންނަނިކޮށް ކަމަށްވެސް ދަރަވަންދޫ ކައުންސިލްގެ ރައީސް ވިދާޅުވެފައިވެއެވެ.
މި ޙާދިސާގައި ޑިންގީގައި ތިބި ތިން މީހުންގެ ތެރެއިން ސަލާމަތްވި ދެމީހުންނަށް ދަރަވަންދޫ ސިއްޙީމަރުކަޒުގައި ވަނީ ފަރުވާދީފައެވެ. އެކްސިޑެންޓްވި އޭދަފުށީ ފެރީ ލޯންޗަކީ، ބ.ކަމަދޫއިން ފުރައިގެން ދަރަވަންދޫއަށް ދަތުރުކުރި ލޯންޗެކެވެ.