މާލޭ މަސްވެރިންގެ ޕާކުގައި ފަތުރުވެރިންނަށް ޚާއްސަކޮށްގެން ތަރައްޤީކޮށްފައިވާ އިމާރާތުގެ މަސައްކަތް ނިންމާ، އެމް.ޑަބްލިޔު.އެސް.ސީން އެތަން މާލޭ ސިޓީ ކައުންސިލާއި ހަވާލުކޮށްފިއެވެ. އިދާރީގޮތުން ވާންޖެހޭ ތައްޔާރީތައް ނިމުނުހާ އަވަހަކަށް މަސްވެރިންގެ ޕާކު ފަތުރުވެރިންނަށް ހުޅުވާލާނެކަމަށް މާލޭ ސިޓީ ކައުންސިލުން ވިދާޅުވެއެވެ.
އެމް.ޑަބްލިޔު.އެސް.ސީއާއި ގުޅިގެން މާލޭ ސިޓީ ކައުންސިލްގެ ފަރާތުން މަސްވެރިންގެ ޕާކު ސަރަޙައްދު ތަރައްޤީކުރުމުގެ މަސައްކަތް ފަށާފައިވަނީ މިދިޔަ ސެޕްޓެމްބަރ މަހުގެ ތެރޭގައެވެ. އެކުންފުނިން މި މަސައްކަތްކޮށްފައިވަނީ ކޯޕަރޭޓް ސޯޝަލް ރެސްޕޮންސިބިލިޓީ، ސީ.އެސް.އާރ ޕްރޮޖެކްޓެއްގެ ގޮތުގައެވެ. މާލެއަށް އެކި ބޭނުންތަކަށް ޒިޔާރަތްކުރާ ފަތުރުވެރިންނަށް ޚާއްސަކޮށްގެން މާލޭ މަސްވެރިންގެ ޕާކުގައި ތަރައްޤީކޮށްފައިވާ އިމާރާތުގެ މަސައްކަތް ނިންމާ މާލޭ ސިޓީ ކައުންސިލާއި ހަވާލުކުރުމަށް ބޭއްވި ރަސްމިއްޔާތުގައި އިމާރާތުގެ ރަމްޒީ ތަޅުދަނޑި މާލޭ ސިޓީ ކައުންސިލާއި ހަވާލުކޮށްދެއްވީ އެމް.ޑަބްލިއު.އެސް.ސީގެ މެނޭޖިންގ ޑިރެކްޓަރ އާދަމް އާޒިމެވެ. އަދި ތަޅުދަނޑިއާއި ސިޓީ ކައުންސިލްގެ ފަރާތުން ހަވާލުވެވަޑައިގަތީ މާލޭ ސިޓީގެ މޭޔަރ ސިފާ މުޙައްމަދެވެ.
އެމް.ޑަބްލިޔު.އެސް.ސީގެ މެނޭޖިންގ ޑިރެކްޓަރ އާދަމް އާޒިމް ވިދާޅުވީ، ރާއްޖޭގެ އިޤްތިޞާދަށް އެންމެ ބޮޑު އާމްދަނީއެއް ވައްދާބަޔަކީ ރާއްޖެ ޒިޔާރަތްކުރާ ފަތުރުވެރިންކަމަށާއި، ފަތުރުވެރިންނަށް ޙާއްސަ އިންތިޒާމްތައް ހަމަޖެހިފައި ހުރުން މުހިއްމުކަމަށެވެ. އަދި މާލެއަށް ސިޓީއެއްގެ ސިފަ ގެނައުމަށް މާލޭ ސިޓީ ކައުންސިލުން ކުރާ މަސައްކަތުގައި ބައިވެރިވުމުގެ ފުރުޞަތު އެކުންފުންޏަށް ލިބިގެންދިއުމަކީ ލިބޭ އުފަލެއްކަމަށް އާޒިމް ވިދާޅުވިއެވެ.
"ކްރޫޒްލައިނަރތަކުން 3000 ހާހެއްހާ ޓޫރިސްޓުން މާލެއަރާ ފައިބާއިރު، އެއިން ކޮންމެ ޓޫރިސްޓަކު 100 ޑޮލަރު ޚަރަދުކުރިއަސް، 3 ލައްކަ ޑޮލަރު ޚަރަދުކޮށްފައި އެދަނީ. އެގޮތަށް ޚަރަދުކޮށްފައިދާއިރު، އެފަރާތްތަކަށް ފާހަނާކޮށްލެވޭނެ އިންތިޒާމެއް ފަސޭހައިން ހަމަޖެހިފައިނެތުން އެއީ މައްސަލައެއް" އާޒިމް ވިދާޅުވިއެވެ.
މާލޭ ސިޓީގެ މޭޔަރ ސިފާ މުޙައްމަދު ވިދާޅުވީ، މި އިމާރާތް ހިންގުމަށް ނިންމާފައިވަނީ ތަނުން ލިބޭ ޢާމްދަނީން، ހިންގުމުގެ ޚަރަދު ފޫބެއްދޭނެހެން ބިޒްނަސް މޮޑެލްއަށްކަމަށެވެ. އަދި ސިޓީ ކައުންސިލާއި ގުޅިގެން މި އިމާރާތް އޮޕަރޭޓްކުރުމަށް އެކި ފަރާތްތަކުން ޝަޢުގުވެރިކަން ފާޅުކޮށްފައިވާކަމަށާއި، ތަނުގެ އިދާރީ އިންތިޒާމްތައް ހަމަޖެހުނުހާ އަވަހަކަށް މިތަން ފަތުރުވެރިންނަށް ބޭނުންކުރުމަށް ހުޅުވާލާނެކަމަށްވެސް މޭޔަރ ވިދާޅުވިއެވެ.
"މިތަން ހިންގަން ގަސްތުކުރަނީ ބިޒްނަސް މޮޑެލްއަށް. މިތަން ވެގެންދާނީ ޓޫރިސްޓުން ލަފާފުރުމުގައި ވަރަށް މުހިއްމު ސްޕޮޓަކަށް. މިތާ ކައިރީ ސުވެއިނިއަރ ފިހާރަތަކާއި، ގިނަ ރެސްޓޯރެންޓްތަކެއްވެސް އެބަހުރި. އަޅުގަނޑުމެންގެ ވިސްނުމެއްނެތް މިތަނުގައި އަދި ރެސްޓޯރެންޓެއް ހިންގުމުގެ" މޭޔަރ ސިފާ ވިދާޅުވިއެވެ.
މަސްވެރިންގެ ޕާކުގައި ހަދާފައިވާ އިމާރާތުގައި ފަތުރުވެރިންނަށް ޚާއްސަ ފާޚާނާތަކާއި، ގެސްޓް ރިލޭޝަން އޮފީހެއްގެ އިތުރުން ފަތުރުވެރިން މަޑުކޮށްލައިގެން ތިބޭނެ ވަކި ސަރަހައްދުތަކެއް ވަނީ ކަނޑައަޅާފައެވެ.
އެގޮތުން މި އިމާރާތުގައި އާއްމު ފާހަނާތަކުގެ ގޮތުގައި 7 ފާހަނާއަކާއި، ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ ފަރާތްތަކަށް ޚާއްސަ 1 ފާހަނާއި، ފެންވެރުމަށް ޙާއްސަ 2 ފާހަނާ ހިމެނޭހެން ޖުމްލަ 10 ފާހަނާ މި އިމާރާތުގައި ހަދާފައިވެއެވެ. ސިޓީ ކައުންސިލުން ވިދާޅުވީ، މަސްވެރިންގެ ޕާކު އަލުން ތަރައްޤީކުރިއެއްކަމަކު، އެތަނުގެ ނަމަށް އެއްވެސް ބަދަލެއް ގެނައުމަށް ނިންމާފައިނުވާކަމަށެވެ. އަދި އިމާރާތާއި އިންވެގެން އެ ސަރަޙައްދު ޒީނަތްތެރިކުރުމުގެ މަސައްކަތް ކުރަމުންދާކަމަށްވެސް ސިޓީ ކައުންސިލުން ވިދާޅުވެއެވެ.