އަމާޒަކީ އަލިފާނުގެ ޙާދިސާއެއް ނުހިނގާނެހެން މާލޭގެ ކަންކަން އިންތިޒާމްކުރުން - ނާއިބު ރައީސް
މިވަގުތު ސަރުކާރުގެ އެންމެ މުހިއްމު އަމާޒަކީ އަލިފާނުގެ ނުރައްކާތެރި ޙާދިސާއެއް ނުހިނގާނެފަދަ ގޮތަކަށް މާލޭގެ ކަންކަން އިންތިޒާމްކުރުންކަމަށް ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ވިދާޅުވެއްޖެއެވެ.
ނާއިބު ރައީސް މިހެން ވިދާޅުވީ ހ. ތިލަފުށިގެ ހިމެނޭ ސަރަޙައްދުގައި ހިނގި ނުރައްކާތެރި އަލިފާނުގެ ޙާދީސާގައި އެ ސަރަޙައްދަށް ލިބިފައިވާ ގެއްލުންތައް ބައްލަވާލެއްވުމަށް ކުރެއްވި ޒިޔާރަތުގެ ތެރޭގައެވެ.
މާލޭގައި ހިނގި ނުރައްކާތެރި އަލިފާނުގެ ޙާދިސާގައި ގެއްލުން ލިބުނު ސަރަޙައްދަށް ކުރެއްވި ޒިޔާރަތުގައި ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ވަނީ މި ޙާދިސާގައި ގެއްލުން ލިބުނު އިމާރާތްތައް ގުދަންތަކާއި އާއްމުންގެ އިމާރާތްތައް ބައްލަވާލައްވާ، އެ ސަރަޙައްދަށް ލިބިފައިވާ ގެއްލުމުގެ މަޢުލޫމާތު އޮޅުންފިލުއްވާފައެވެ. އަދި އަލިފާނުގެ ޙާދިސާ ހިނގި ސަރަހައްދު ސާފުކޮށް، އެ ސަރަޙައްދު އާއްމު ހާލަތަކަށް ގެނެއުމަށް ސަލާމަތީ ބާރުތަކުން ކުރަމުންދާ މަސައްކަތްތަކުގެ މަޢުލޫމާތުވެސް އެމަނިކުފާނު އޮޅުންފިލުއްވެވިއެވެ. މީގެއިތުރުން މި ޙާދިސާ ހިނގަން މެދުވެރިވި ސަބަބު ދެނެގަތުމަށާއި، ލިބިފައިވާ ގެއްލުންތައް ދެނެގަތުމަށް ކުރަމުންދާ މަސައްކަތްތައް އޮޅުންފިލުއްވާ، އެކަމުގައި ޢަމަލީގޮތުން ބައިވެރިވާ ފަރާތްތަކާއި ނާއިބު ރައީސް ބައްދަލުކުރެއްވިއެވެ.
ނާއިބު ރައީސްގެ މި ޒިޔާރަތުގައި ސަލާމަތީ ބާރުތަކާއި ބައްދަލުކުރައްވާ ދެއްކެވި ވާހަކަފުޅުގައި، ސަރުކާރުން މިވަގުތު އެންމެ ބޮޑު އިސްކަމެއްދެނީ މިފަދަ ޙާދިސާއެއް ތަކުރާރުވިޔަނުދީ ރައްކާތެރިކަމުގެ ފިޔަވަޅުތައް މިހާރަށްވުރެ ހަރުދަނާކުރުންކަމަށް ވިދާޅުވިއެވެ. އެގޮތުން މިހާރުން މިހާރަށްވެސް މާލެތެރޭގައި ހުރި ގުދަންތައް މާލެއިން ބޭރުކުރުމަށް ރައީސުލްޖުމްހޫރިއްޔާ ދެއްވާފައިވާ ޙާއްސަ އިރުޝާދާއެކު އެ މަސައްކަތް ބާރުދުވެލީގައި ކުރަމުންދާކަމަށް ވިދާޅުވިއެވެ. އަދި ކުރިއަށްއޮތްތާނގައި މުދަލާއި އެކި ބާވަތުގެ ކެމިކަލް ރައްކާކުރާ ގުދަންތަކަކީ ސަލާމަތީ ބާރުތަކުން ކަނޑައަޅާފައިވާ ވަކި މިންގަނޑުތަކަކަށް ފެތޭނެހެން ހަދާފައިވާ ތަންތަންތޯ ސަރުކާރުން ކަށަވަރުކުރައްވާނެކަމަށްވެސް ނާއިބު ރައީސް ވިދާޅުވިއެވެ.
އަލިފާނުގެ ހާދިސާ ހިނގި ސަރަޙައްދަށް ވަޑައިގެން ނާއިބު ރައީސް ވަނީ އަލިފާނުގެ ޙާދިސާއިން އާއްމުންނާއި، އެމީހުންގެ ގެދޮރާއި މުދާ ސަލާމަތްކުރުމަށް ސަލާމަތީ ބާރުތަކުންނާއި އާއްމުން ގުޅިގެން ކުރި ބުރަ މަސައްކަތް ފާހަގަކުރައްވާފައެވެ. އަދި އެންމެ ފުރާނައެއް ގެއްލިގެން ދިއުމަކީވެސް އަގުނުކުރެވޭނެ ކަމެއްކަން ފާހަގަކުރައްވާ، މި ޙާދިސާއިން އިބްރަތް ޙާޞިލުކޮށް ކުރިއަށް އޮތްތާނގައި މިފަދަ ކަންކަން ތަކުރާރުނުވާނެހެން ކަންކަން އިންތިޒާމްކުރުމަށް ހުރިހާ ފަރާތްތަކެއްގެ ކިބައިން އިލްތިމާސްކުރެއްވިއެވެ.
އަބަދަށްފެހި މަގު، ހ. ތިލަފުށީ ގޭގައި ހުރި ކެމިކަލް ގުދަނުގައި ރޯވެ، ހިނގި ނުރައްކާތެރި އަލިފާނުގެ ޙާދިސާގައި އެކެއްގެ ފުރާނަ ގެއްލި، އެ ސަރަޙައްދުގެ 7 އިމާރާތަކަށާއި، 4 ގުދަނަކަށް ބޮޑެތި ގެއްލުންތަކެއް ލިބިފައިވެއެވެ. އަދި އެ ސަރަޙައްދުގެ 26 ގެއަކަށް މި ޙާދިސާގެ ސަބަބުން އެކި ވަރުގެ ގެއްލުން ލިބިފައިވާއިރު، 700 އަށްވުރެ ގިނަ މީހުންނަށް ނެޝެނަލް ޑިޒާސްޓަރ މެނޭޖްމަންޓް އޮތޯރިޓީން ވަނީ އެހީތެރިކަން ފޯރުކޮށްދީފައެވެ.