ރާއްޖޭގައި ސައިކަލާއި އެހެނިހެން ބައެއް ވިޔަފާރިކުރާ ލިސްޓަސް ކުންފުނީގެ ހުރިހާ މުވައްޒަފުންނަށް އެ ކުންފުނިން މޯލްޑިވްސް އިސްލާމިކް ބޭންކް، އެމް.އައި.ބީގެ ހިއްސާ ގަނެދީފިއެވެ.
ލިޓަސްގެ މާކެޓިން މެނޭޖަރު އާސިފް ރަޝީދު ވިދާޅުވީ އެ ކުންފުނީގެ މުވައްޒަފުންނަށް އެމްއައިބީގެ ހިއްސާ ގަނެދިނީ މުވައްޒަފުންގެ މުސްތަގުބަލު ބިނާކޮށްދިނުމަށް އެހީތެރިވުމުގެ ގޮތުންކަމަށެވެ. އަދި މިކަމުގެ ބޭނުމަކީ ލިޓަސްގެ ކޮންމެ މެމްބަރަކީ ވެސް ރާއްޖޭގެ ސްޓޮކް މާކެޓަށް އަހުލުވެރި ބަޔަކަށް ހެދުމާއި މުސްތަގުބަލަށް ވިސްނައި އެކަމަށް ހުންނަ ފުރުސަތުތަކުގެ ބޭނުން ހިފުމަށް ހިތްވަރު ދިނުންކަމަށް ލިޓަސްއިން ބުނެއެވެ.
މާލެއާއި އެއްގޮތަށް އަޅޮތުތެރޭގައި މަސައްކަތްކުރާ ލިޓަސްގެ ހުރިހާ މުވައްޒަފުންނަށް ވެސް މި ފުރުސަތު ހޯދައިދީފައިވާކަމަށް އެ ކުންފުނިން ބުނެއެވެ. ކުރިއަށް އޮތްތަނުގައި ބިދޭސީ މުވައްޒަފުން ހިމެނޭ ގޮތަށް، އެކުންފުނީގެ 200 މުވައްޒަފުންނަކީ ހިއްސާގެ ބާޒާރުން ހިއްސާ ގަނެގެން ތިބޭނެ ބަޔަކަށް ހަދާނެކަމަށްވެސް ލިޓަސްއިން ބުނެއެވެ.
އެމްއައިބީން ފުރަތަމަ ފަހަރަށް ހިއްސާ ވިއްކަން ހުޅުވާލުމާއެކު ގިނަ ކުންފުނިތަކަކުން އަންނަނީ އެމްއައިބީގެ ހިއްސާ ގަންނަމުންނެވެ. އެމްއައިބީގެ ހިއްސާ ގަތުމުގެ ފުރުސަތު މިމަހުގެ 18 ވަނަ ދުވަހާ ހަމައަށް ވަނީ ހުޅުވާލާފައެވެ.