ހިޔާ މަޝްރޫޢުގެ ދަށުން ހުޅުމާލޭގައި ޢިމާރާތްކުރާ ފްލެޓްތަކަށް ގެނައި ބަދަލުތަކާއެކު، ހައުސިންގް ޔުނިޓްތަކުގެ އަގަށް ބަދަލުއަންނާނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީން ހާމަކޮށްފިއެވެ.
އެޗްޑީސީން ބުނީ ކުރިން މި ފްލެޓްތަކަށް މަހަކު ދައްކަންޖެހޭ ކުލި ހަ ހާސް ރުފިޔާއަށް އަރާނެކަމަށް ކުރިން ލަފާކޮށްފައިވީނަމަވެސް ފްލެޓްތަކަށް ގެނައި ބަދަލުތަކާއި ގުޅިގެން އިތުރު ޚަރަދުތަކެއް ކުރަންޖެހުމުގެ ސަބަބުން އެ އަގު 11 ހާހަށް އަރާނެ ކަމަށް ލަފާކުރެވޭ ކަމަށެވެ. ނަމަވެސް ދައްކަންޖެހޭ އަގު އަދި ކަނޑައަޅާފައި ނުވާ ކަމަށެވެ.
ހުޅުމާލެ ދެވަނަ ފިޔަވަހީގައި ތަރައްޤީކުރާ ހައުސިންގް ޔުނިޓްތަކުގެ މަޢުލޫމާތު ހިއްސާކުރުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްޑީސީގެ މެނޭޖިންގް ޑިރެކްޓަރ ސުހައިލް އަޙްމަދު ވިދާޅުވީ، މި ފްލެޓްތަކުގެ ސްޓަކްޗަރއަށް ބޮޑެތި ބަދަލުތަކެއް މިހާރު ގެނެސްފައިވާ ކަމަށެވެ.
ކުރީ ސަރުކާރުން އަޅަން ފެށި މި ހައުސިންގ ޔުނިޓްތަކުގެ އިމާރާތުގެ މަސައްކަތް މިއަހަރުގެ ޑިސެމްބަރު މަހަށް ނިމޭވަރު ވާނެކަމަށް ސުހައިލް ވިދާޅުވިއެވެ. އެހެންނަމަވެސް، ނިމިދިޔަ ސަރުކާރުން މި ފްލެޓްތައް އަޅަން ހަވާލުކުރިއިރު އެ ފްލެޓްތަކުގެ ފިނިޝިންގެ މަސައްކަތް ހަވާލުކޮށްފައި ނުވާކަން ސުހައިލް ފާހަގަކުރެއްވިއެވެ. އެގޮތުން މި ހައުސިންގް ޔުނިޓްތަކުގެ ޓައިލްސް ޖެހުމާއި، ކުލަލުން އަދި ދޮރު ފަތް ލުމަށް ކުރިން ޕްލޭންކޮށްފައި ނެތްކަމަށް ސުހައިލް ވިދާޅުވިއެވެ. އެހެންކަމުން ސަރުކާރުން މި ޔުނިޓްތައް ތަރައްޤީކުރުމުގައި އިތުރު 42 މިލިއަން ޑޮލަރު ޚަރަދުކުރަން ޖެހިފައިވާކަމަށް ސުހައިލް ވިދާޅުވިއެވެ.
ސުހައިލް ވިދާޅުވީ މިމަސައްކަތް ނިންމާ ހައުސިންގް ޔުނިޓްތައް ދޫކުރެވޭނީ އަންނަ އަހަރުގެ ކުރީކޮޅުކަމަށް ސުހައިލް ވިދާޅުވިއެވެ.
ސުހައިލް ވިދާޅުވީ ހިޔާ މަޝްރޫޢު ނިމޭއިރު 7000 ފްލެޓް އެޅުމަށް ކުރިން ނިންމިނަމަވެސް، މިހާރު މިމަސައްކަތް ނިމޭއިރު ހުންނަނީ 6860 ފްލެޓްކަމަށެވެ. އަދި ކުރިން 3 ކޮޓަރިއާއި 4 ކޮޓަރީގެ ފްލެޓްތައް ޢިމާރާތްކުރަން ހަމަޖެހުނުނަމަވެސް މިހާރު ހުންނާނީ ހަމައެކަނި ދެ ކޮޓަރީގެ އެޕާޓްމަންޓްކަމަށް ސުހައިލް ވިދާޅުވިއެވެ. އަދި ފްލެޓްތައް ދޫކުރަނީ ކުރީގެ ލިސްޓު އަލުން މުރާޖަޢާކުރުމަށްފަހުކަމަށް ސުހައިލް ވިދާޅުވިއެވެ.
" 7000 ޔުނިޓަކީވެސް ދެ ކޮޓަރީގެ އެޕާރޓްމަންޓް. އެއްވެސް ވަރަކަށް 3 ކޮޓަރީގެ އެޕާރޓްމަންޓެއް ނުހުންނާނެ. ދެ ކޮޓަރި، ދެ ފާނާހާ، ސިޓިންރޫމް، ބަދިގެ، ކާގެ، މި ބައިބައި ހިމެނޭނީ. ކޮންމެ އެޕާރޓްމަންޓް އަކީ 550 އަކަފޫޓު. ނަމަވެސް ހަތަރު ލިފްޓް މި އިންނަނީ. އެހެންވީމަ އެއީ ވަރަށް މަދު އަދަދެއް. ޚާއްޞަކޮށް، ޕީކް ގަޑީގައި ވަރަށް އުނދަގޫވެގެންދާނެ ކަމަށް ޤަބޫލުކުރެވެނީ." ސުޙައިލް ވިދާޅުވިއެވެ.
"ހިޔާ" މަޝްރޫޢުގެ ދަށުން 25 ބުރީގެ 16 ޓަވަރު ހުޅުމާލޭގެ ދެވަނަ ފިޔަވަހީގައި ދަނީ ޢިމާރާތްކުރެވެމުންނެވެ. މި އިމާރާތްތަކުގައި ހުރި މައްސަަލަތައް ހައްލުކުރުމަށް ބޮޑު ޚަރަދެއް ސަރުކާރުން ކުރަން ޖެހިފައިވާކަން ހާމަކުރައްވާފައިވާއިރު، މި ފްލެޓްތަކުގައި ލިފްޓް މަދުވުމުގެ މައްސަލައަށް މިހާތަނަށް އައިރު ހައްލެއް ނުލިބޭކަމަށް އެޗްޑީސީން ބުނެއެވެ.