ރަމަޟާންމަސް ފެށުނުއިރު ބާޒާރުގައި އެންމެ ބޮޑަށް އަގުތައް އުފުލުނު ދެ ބާވަތަކީ ކަނޑޫދޫ މިރުހާއި، ކަރައެވެ. ދަތުރުވެރިންގެ މާރުކޭޓުގައި އިއްޔެ އާއި އަޅާބަލާއިރު، މިއަދު މި ދެ ބާވަތުގެ އަގުތައް ހުރީ ދަށްވެފައެވެ.
ރަމަޟާންމަސް ފެށުނުއިރު ދަތުރުވެރިންގެ މާރުކޭޓުގައި ކަނޑޫދޫ މިރުސް ކިލޯއެއްގެ އަގު ހުރީ އެއްހާސް ރުފިޔާއަށްވުރެ މަތީގައެވެ. ރަމަޟާންމަސް ފެށިގެން ދެ ދުވަސް ފާއިތުވެގެންދިޔައިރު، އަގު ރަނަށް ވެގެންދިޔަ ކަނޑޫދޫ މިރުހުގެ އަގު މިހާރުވަނީ ދަށަށްދާން ފަށާފައެވެ.
ފާއިތުވެދިޔަ ދެ ދުވަހުގެ ތެރޭގައި ކަނޑޫދޫ މިރުސް 100 ގްރާމް ވިއްކާފައިވަނީ 95 ރުފިޔާ އާއި 100 ރުފިޔާއާއި ދެމެދުގެ އަގުތަކެއްގައެވެ. ނަމަވެސް ގޮޅިތަކުން މިއަދު 100 ގްރާމު މިރުސް 75 ރުފިޔާއަށް ލިބެން އެބަހުއްޓެވެ. އަދި މިރުސް ކިލޯއެއް މިއަދު 400 ރުފިޔާއާއި 500 ރުފިޔާއާއި ދެމެދުގެ އަގެއްގައި ލިބެން އެބަހުއްޓެވެ.
ކަނޑޫދޫ މިރުސް ނަގާފައި ބާޒާރުގައި ދެން އެންމެ ބޮޑަށް އަގުއުފުލުނު ކާރާގެ އަގުތައްވެސް މިއަދު ވަނީ ދަށްވެފައެވެ. އެގޮތުން ކުރިން 45 ރުފިޔާއާއި 40 ރުފިޔާއާއި ދެމެދުގެ އަގެއްގައި ވިއްކި ކަރާގެ އަގު މިއަދު ބާޒާރުގައި ވަނީ 30 ރުފިޔާއަށް ދަށްވެފައެވެ.
ދަތުރުވެރިންގެ މަރުކޭޓުގައި ތަކެތި ވިއްކާ ފަރާތްތަކުން ބުނީ، ގޮޅިތަކަށް ގެންނަ ތަކެތި އިތުރުވަމުންދާތީވެ، ރަމަޟާންމަހުގެ ކުރިއަށްއޮތް ދުވަސްތަކުގައި އަގުތަކަށް ހެޔޮ ބަދަލުތަކެއް އަންނާނޭ ކަމަށެވެ.