ކުރިއަށްއޮތް 24ގަޑިއިރުގެ ތެރޭގައި ސްރިލަންކާގެ ސަލާމަތީ ބާރުތަކުގެ އިސް މަޤާމުތަކަށް ބަދަލުތަކެއް ގެންނަވާނެކަމަށް ސްރީ ލަންކާގެ ރައީސް މައިތްރިޕާލަ ސިރިސޭނާ ވިދާޅުވެއްޖެއެވެ.
ސިރިސޭނާގެ މި ނިންމުމަކީ، ލަންކާއަށް ހަމަލާތަކެއް ދޭން އުޅޭކަމުގެ އިންޒާރުތަކެއް ލަންކާގެ ސަލާމަތީ އިދާރާތަކަށް ލިބިފައިއޮއްވާ، އެފަރާތްތަކުން ސަލާމަތީ ފިޔަވަޅުތަކެއް އަޅާފައި ނުވާކަމަށްބުނެ އެފަރާތްތަކަށް ގިނަ ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ. ލަންކާގެ އިންޓެލިޖެންސްއާއި ދިފާއީ ބާރުތަކަކީ، ލަންކާގެ ރައީސް ސިރިސޭނާގެ ބުލުމުގެ ދަށުގައިވާ އިދާރާތަށް ކަމަށްވާއިރު، ސިރިސޭނާވެސް މިކަމަށް ސަމާލުކަމެއް ދީފައިނުވާކަމަށްބުނެ ބައެއް ފަރާތްތަކުން ދަނީ ސިރިސޭނާއަށްވެސް އިނގިލިދިއްކުރަމުންނެވެ.
ސރިރިސޭނާ ދެއްވި ޤައުމީ ޚިޠާބުގައި މިކަންކަން ދޮގުކުރައްވާ ވިދާޅުވީ، ޙަމަލާއެއް ދޭނެ އުޅޭކަމުގެ އެއްވެސް މަޢުލޫމާތެއް ކަމާގުޅޭ އެއްވެސް މުޢައްސަސާއަކުން ޙިއްސާކޮށްފައިނުވާކަމަށެވެ. މި ފަރުވާކުޑަ އަމަލުގެ ސަބަބުން ޤައުމަށް ބޮޑެތި ގެއްލުންތަކެއް ވެފައިވާކަން ފާހަގަކުރައްވާ ސިރިސޭނާ ވިދާޅުވީ، މި ސަބަބައްޓަކައި ކުރިއަށްއޮތް 24ގަޑިއިރު ތެރޭގައި ސްރިލަންކާގެ ސަލާމަތީ ބާރުތަކުގެ އިސް މަޤާމުތަކަށް ބަދަލުތަކެއް ގެންނަވާނެކަމަށެވެ. އެގޮތުން މި ކަމުގައި އިހުމާލުވެފައިވާ އޮފިސަރުންނާއި ދެކޮޅަށް ހަރުކަށި ފިޔަވަޅުތަކެއް އަޅުއްވާނެކަމަށް ސިރިސޭނާ ވިދާޅުވިއެވެ.
ލަންކާގެ ރައީސް މިފަދަ ބޮޑު ބަދަލެއް އެޤައުމުގެ ސަލާމަތީ ބާރުތަކުގެ އިސްމަޤާމުތަކަށް ގެނައުމަށް ނިންމަވާފައިވާއިރު، ސްރީލަންކާގެ ޑިފެންސް ސެކްރެޓަރީ ހެމަސިރީ ފެނާންޑޯ ވަނީ އެޤައުމުގެ ދެ ސަރަޙައްދެއްގައި ޙަމަލާތަކެއް ދޭނެކަމުގެ އިންޒާރު ކުރިން ލިބުނުކަމަށާއި ނަމަވެސް މިވަރުގެ ޙާލަތެއް މެދުވެރިވެދާނެކަމަށް ސަލާމަތީ ބާރުތަކުން އަންދާޒާކޮށްފައިނުވާކަމަށް ވިދާޅުވެފައެވެ.
އެހެންކަމުން މިކަމުގެ ޒިންމާ އެޤައުމުގެ ސަރުކާރާއި އިންޓަލިޖެންސް އިދާރާތަކުން އުފުލަންޖެހޭކަމަށް ޤަބޫލު ނުކުރައްވާކަމަށްވެސް ހެމަސިރީ ވަނީ ވިދާޅުވެފައެވެ.
ލަންކާގެ އެކި ހަމަލާތަކުގައި މަރުވި މީހުންގެ އަދަދު ތިންސަތޭކަ ދިހައަކަށް އަރާފައިވާއިރު ޒަޚަމްވި މީހުންގެ އަދަދު 450 އަށްވުރެ ގިނަކަމަށް އެގައުމުން ބުނެއެވެ.