ރައްޔިތުންގެ މަޖިލީހަށް ޙާޒިރުވުމަށް، މިނިސްޓަރ އޮފް ޑިފެންސް، އަލްއުސްތާޛާ މާރިޔާ އަޙްމަދު ދީދީއަށް ދަންނަވައިފިއެވެ.
މާދަމާ ހެނދުނު ނުވައެއް ޖަހާއިރު މަޖިލީހަށް ޙާޒިރުވުމަށް ރައްޔިތުންގެ މަޖިލީހުންވަނީ އެކަމަނާއަށް ދަންނަވާފައެވެ. މިނިސްޓަރ މާރިޔާ ރައްޔިތުންގެ މަޖިލީހަށް ޙާޒިރުކުރަނީ މަހިބަދޫ ދާއިރާގެ މެންބަރު އަޙްމަދު ޠާރިޤް ހުށައަޅުއްވާފައިވާ މައްސަލައަކާގުޅިގެން ސުވާލުކުރެއްވުމަށެވެ.
ޑިފެންސް މިނިސްޓަރާ ސުވާލުކުރެއްވުމަށް މަޖިލީހަށް ޙާޒިރުކުރަނީ އެކަމަނާ ދާދިފަހުން އިންޑިއާއަށް ކުރެއްވި ދަތުރުފުޅުގައި ރާއްޖޭގެ ޤައުމީ ސަލާމަތަށް ނުރައްކާވާގޮތަށް ވާހަކަފުޅުދައްކަވާފައިވާތީކަމަމަށް މަޖިލީހުގެ ބައެއް މެމްބަރުން ތުހުމަތުކުރައްވާފައިވަނިކޮށެވެ.
ވަޒީރުންނާ މަތިކޮށްފައިވާ ޒިންމާތަކުގެ ތެރޭގައި ޤައުމުގެ މިނިވަންކަމާއި ސިޔާތަދު ދިފާޢުކޮށް އެއަށް އުނިކަންއަންނާނެ އެއްވެސްކަމެއް ނުކުރުމަށް ލާޒިމުކުރާއިރު އެކަމާ ތަކުރާރުކޮށް ރާއްޖޭގެ ސަލާމަތަށް ނުރައްކާވާގޮތަށް ވާހަކަފުޅުދައްކަވާފައިވާކަމަށް ތުހުމަތުކޮށްފައިވެއެވެ.
މިއީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުގައި ހިމެނިވަޑައިގަންނަވާ ވަޒީރަކު މަޖިލީހަށް ޙާޒިރުކުރާ ފުރަތަމަފަހަރެވެ. ޑިފެންސް މިނިސްޓަރ މާރިޔާ އަޙްމަދުދީދީ މަޖިލީހަށް ޙާޒިރުކުރާއިރު، އެކަމަނާގެ އިތުބާރު ނެތްކަމުގެ މައްސަލައެއްވެސް އިދިކޮޅު ޕްރޮގްރެސިވް ކޮންގްރެސް ކޯލިޝަނުންވަނީ މަޖިލީހަށް ހުށައަޅާފައެވެ.