ޗެލްސީގެ ކޯޗުކަމުން މައުރީސިއޯ ސަރީ ވަކިކުރަން އެކުލަބުން ތައްޔާރުވެއްޖެކަމަށް އިނގިރޭސި މީޑިޔާތަކުން ބުނަން ފަށައިފި އެވެ.
މިވާހަކައިގެ އަޑު ގަދަވެގަތީ މެންޗެސްޓާ ޔުނައިޓެޑް އަތުން ރޭ ބަލިވެ އެފްއޭކަޕުން ކެޓުމުންނެވެ. އަދި މެންޗެސްޓާ ސިޓީ އަތުން 6-0އިން ބަލިވެ ޗެލްސީ ވަނީ ގަދަ ހަތަރަކުން ވެސް ކަޓާފަ އެވެ.
މިހެންވެ ކުޅުންތެރިންނާއި ކޯޗާ ދެމެދު މިހާރު ހައްލު ނުކުރެވޭ ވަރަށް މައްސަލަ ގޯސްވެފައިވާ ކަމަށް މީޑިޔާތަކުން ބުނެ އެވެ.
ޗެލްސީއާ ގާތްގުން އޮންނަ ނޫސްވެރިން ބުނާ ގޮތުގައި ކޯޗުކަމުގައި ސަރީ ބެހެއްޓުމާމެދު އެންމެ ފަހުގެ ގޮތް ނިންމާނީ ކުލަބުގެ ވެރިޔާ ރަޝިޔާގެ މަހުޖަނު ރޯމަން އަބްރޮމޮވިޗެވެ.
މަގާމުން ވަކިކޮށްފާނެތޯ ސުވާލުކުރުމުން ސަރީ އެކަމަށް ވަކި ޖަވާބެއްނުދެ އެވެ. އޭނާ ބުނެފައިބަނީ ކުލަބުގެ ވެރިޔާއާ ވާހަކަ ދައްކަން ތައްޔާރު ކަމަށެވެ.
ޗެލްސީގެ ކޯޗުކަމަށް ސަރީ ގެނައި މިސީޒަން ފެށެން ކުޑަތަންވެފައިވަނިކޮށެވެ. އެއީ އެންޓޯނިއޯ ކޮންޓޭ މަގާމުން ވަކިކޮށްފަ އެވެ. ސީޒަނުގެ ކުރީކޮޅު ސަރީ އަށް ރަނގަޅު ނަތީޖާތަކެއް ލިބުނު ނަމަވެސް އޭނާގެ އަތުން ޗެލްސީގެ ކޮންޓްރޯލް ގެއްލި ކުޅުންތެރިންނާ ވަރަށް ބޮޑަށް ގުޅުން ގޯސްވެފައިވާ ކަމަށް ރިޕޯޓްތައް ބުނެ އެވެ.
ޗެލްސީގެ އާ ކޯޗަކަށް ގެންނަން މަސައްކަތް ކުރަމުންދަނީ ރެއާލް މެޑްރިޑަށް ޖެހިޖެހިގެން ތިން ފަހަރު ޗެމްޕިއަންސް ލީގު ކާމިޔާބުކޮށްދިން މަޝްހޫރު ޒައިނުއްދީން ޒިދާނެވެ. އަދި އެ ޓީމުގެ އެންމެ ކާމިޔާބު ކޯޗު ހޯސޭ މޮރީނިއޯ ވެސް މިވަގުތު ހުރީ ހުސްކޮށެވެ.