ކުރީގެ ނާއިބު ރައީސް އަޙްމަދު އަދީބުގެ ކިޑްނީއަށް މައްސަލަތަކެއް ދިމާވެ، އައިޖީއެމްއެޗުގައި ފަރުވާ ދޭން ފަށާފައިވާއިރު، އޭނާގެ ހާލަތު އަދިވެސް ސީރިއަސްކަމަށް އަދީބުގެ އާއިލާއިން ބުނެފިއެވެ.
33 އަހަރުގެ ޖަލު ޙުކުމްތަކެއް ތަންފީޒު ކުރައްވަމުން ގެންދަވާ ކުރީގެ ނާއިބު ރައީސް އަޙްމަދު އަދީބަށް ލޮލުގެ ނުރައްކާތެރި ބައްޔެއްކަމަށްވާ "ގުލަކޯމާ" ޖެހިފާއިވާކަމަށާއި، އަދީބުގެ އެތެރެހަށީގައި ސިސްޓެއް އުފެދިފައިވާކަމަށް ޑޮކްޓަރުންނާ ހަވާލާދީ އޭނާގެ ޢާއިލާއިން މީގެ ކުރިން ވަނީ ބުނެފައެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން އަދީބުގެ އަނބިކަނބަލުން މަރިޔަމް ނަޝްވާ ވިދާޅުވީ، އަދީބުގެ ބަނޑުގައި ރިއްސާތީ ދޫނިދޫން ފަރުވާދީގެން ލުޔެއް ނުލިބުމުން މާލެ ގެނެސް އައިޖީއެމްއެޗްގައި އެޑްމިޓްކޮށް ފަރުވާދެމުންދާކަމަށެވެ. އަދީބު ހޮސްޕިޓަލަށް ގެންގޮސް ސީޓީ ސްކޭނެއް ހެދުމަށްފަހު އޭނާގެ ކިޑްނީގައި ހިލައުފެދިފައިވާކަމަށް ޑިކްޓަރުންން ބުނެފައިވާކަމަށް އާއީލާއިން ބުނެއެވެ.
"ހިލަ އިނީ ސްޓަކްވެފައި ކިޑްނީއާއި ބްލެޑަރައާއި ދޭތެރޭގައި. ވަރަށް ގިނަ އިންޖެކްޝަންތައް ޖަހާފައި ދޫނިދޫއިންވެސް ގެނައީ. އަނެއްކާ މިކޮޅުންވެސް ސީޓީ ސްކޭން ހަދަންވެގެން އެހާވަރަށް އިންޖެކްޝަން ޖަހާފައި ހުރީމަ ޑޮކްޓަރު އިތުރަށް އިންޖެކްޝަން ދޭކަށް ބޭނުމެއް ނުވޭ. އަނެއްކާވެސް ހިލަ ވެއްޓޭތޯ ބޭސްދީފަ، 2 ދުވަސްތެރޭ ބަލާފައި، ހިލަ ނުވެއްޓިއްޖެއްޔާ ދެން ސަރޖަރީއަކަށް ދާންޖެހޭނީ." އަދީބުގެ އަންހެނުން ނަޝްވާ ވިދާޅުވިއެވެ.
އަދީބަށް ބޭނުންވާ ސިއްޙީ ފަރުވާ އެންމެ އެކަށީގެންވާގޮތުގައި ދިނުމުގައި ކަމާބެހޭ ފަރާތްތަކުން އިހުމާލުވެފައިވާކަމަށް އަދީބުގެ ޢާއިލާއާއި، އޭނާގެ ޤާނޫނީ ވަކީލުން ކުރަމުންދާ ތުހުމަތު ނަޝްވާ ތަކުރާރުކުރެއްވިއެވެ.
ކުރީގެ ނާއިބުރައީސް އަޙްމަދު އަދީބުގެ ސިއްޙީ ޙާލަތާ ގުޅޭގޮތުން ކަރެކްޝަނަލް ސަރވިސްގެ ބަހެއް ވަނީ ލިބޭގޮތް ނުވެފައެވެ. އަދީބުގެ ބޭސްފަރުވާގެ މައްސަލައިގައި ގުޅިފައިވާ ޕާޓީތަކުގެ ހުރިހާ ލީޑަރުން ވަނީ ކަނބޮޑުވުން ފާޅުކޮށްފައެވެ.