ވެރިކަން ބަދަލުކުރުމުގެ މަރުހަލާގެ ކަންކަން ކުރިއަށްގެންދިއުމަށް އިންތިޚާބީ ރައީސް އިބްރާހީމް މުޙައްމަދު ސާލިހުގެ ފަރާތްޕުޅުން އުފައްދަވާފައިވާ ޓްރާންސިޝަން ކޮމެޓީގެ މެންބަރުންނާއި، ދިވެހިރާއްޖޭގެ އިސްލާމިކް ޔުނިވަރސިޓީގެ ޗާންސެލަރ އަދި ރައީސް ޔާމީންގެ ރަނިންމޭޓް ޑރ.މުޙައްމަދު ޝަހީމް ޢަލީ ސަޢީދު ބައްދަލުކުރައްވައިފިއެވެ.
ދިވެހިރާއްޖޭގެ އިސްލާމިކް ޔުނިވަރސިޓީގައި މިއަދު ކުރިއަށްގެންދިޔަ މި ބައްދަލުވުމުގައި ޓްރާންސިޝަން ކޮމެޓީގެ ފަރާތުން އިސްކޮށް ބައިވެރިވެވަޑައިގެންފައިވަނީ ކުރީގެ އެޑިއުކޭޝަން މިނިސްޓަރ ޑރ.މުސްތަފާ ލުތުފީއާއި، އެމް.ޑި.ޕީ އުފެއްދުމުގައި އިސްކޮށް ހަރަކާތްތެރިވި، އަދި ކުރިން އެޕާޓީގެ ރައީސްކަންވެސް ކުރައްވާފައިވާ އިބްރާހީމް އިސްމާޢީލެވެ.
އިސްލާމިކް ޔުނިވަރސިޓީގެ ފަރާތުން މި ބައްދަލުވުމުގައި ޗާންސެލަރ، ޑރ.ޝަހީމްގެ އިތުރުން އެ ޔުނިވަރސިޓީގެ މެނޭޖްމަންޓުގެ އިސްފަރާތްތަކުންވެސް ބައިވެރިވެވަޑައިގެންފައިވެއެވެ.
މި ބައްދަލުވުމުގައި އިސްލާމިކް ޔުނިވަރސިޓީއާއި ބެހޭގޮތުން ތައްޔާރުކޮށްފައިވާ ޕްރެޒެންޓޭޝަނެއް ޓްރާންސިޝަން ކޮމެޓީގެ މެންބަރުންނާއި ވަނީ ހިއްސާކޮށްފައެވެ. އަދި އެ ޔުނިވަރސިޓީގެ މައިގަނޑު މަސައްކަތްތަކާއި، ކުރިއަށްގެންދާ ކޯސްތަކާއި، ހާސިލުކޮށްފައިވާ ކާމިޔާބީ އަދި ކުރިއަށް ރޭވިފައިހުރި ކަންކަމާގުޅޭ މަޢުލޫމާތު އިސްލާމިކް ޔުނިވަރސިޓީގެ ފަރާތުން ޓްރާންސިޝަން ކޮމެޓީގެ މެމްބަރުންނާއި ހިއްސާކޮށްފައިވެއެވެ. މި ބައްދަލުކުރެއްވުމުގައި އިސްލާމިކް ޔުނިވަރސިޓީގެ ފަރާތުން ވެރިކަން ބަދަލުކުރުމުގެ މަރުހަލާގައި ދެއްވަންޖެހޭ ފުރިހަމަ އެހީތެރިކަމާއި އެއްބާރުލުން ދެއްވާނެކަމުގެ ޔަޤީންކަން އެ ޔުނިވަރސިޓީގެ ޗާންސެލަރ ޑރ. މުޙައްމަދު ޝަހީމް ޢަލީ ސަޢީދު ވަނީ ދެއްވާފައެވެ.
މިދިޔަ ރިޔާސީ އިންތިޙާބުގައި ޕީ.ޕީ.އެމްގެ ފަރާތުން ވާދަކުރެއްވި ރައީސް ޔާމީންގެ ރަނިން މޭޓްގެ ހައިސިއްޔަތުން ޑރ. ޝަހީމްވަނީ ޕީ.ޕީ.އެމްގެ ރިޔަސީ ކެމްޕޭންގެ އިސް ސަފުގައި ހަރަކާތްތެރިވެވަޑައިގެންފައެވެ. ޑރ. ޝަހީމް އިންތިޚާބީ ރައީސްގެ ފަރާތްޕުޅުން އުފައްދަވާފައިވާ ޓްރާންސިޝަން ކޮމެޓީގެ މެންބަރުންނާއި ބައްދަލުކުރައްވާފައި މިވަނީ ރިޔަސީ އިންތިޙާބަށްފަހު އެމަނިކުފާނުވެސް ފިއްލަވައިވަޑައިގަތީކަމަށްބުނެ ސޯޝަލް މީޑިއާގައި ބައެއް ފަރާތްތަކުން ވާހަކަދައްކަމުންދާ ދަނޑިވަޅެއްގައެވެ.