ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަސައްކަތް ބާރު ދުވެލީގައި ކުރިއަށްދާއިރު، އެއަރޕޯޓަށް އޮންނަ ޑިމާންޑް ދުވަހެއް ދުވަހަކަށް އަންނަނީ އިތުރުވަމުންނެވެ.
މި އޭޕްރީލް މަސްވެސް ވެފައިވަނީ އެއަރޕޯޓުގެ އޮޕަރޭޝަންތައް އާދަޔާ ޚިލާފަށް ގިނަވެގެންދިޔަ މަހަކަށެވެ. އެގޮތުން އޭޕްރިލްމަހުގެ ފުރަތަމަ ދުވަހު އެކަނިވެސް 29 ޕްރައިވެޓް ޖެޓް އެއަރޕޯޓަށް ޖައްސާފައިވާކަން ފާހަގަކޮށްލެވެއެވެ.
ވެލާނާ އިންޓަރނޭޝަނަލް އެއަރޕޯޓަކީ ދެކުނު އެޝީއާ ސަރަޙައްދުގައި މިވަގުތު އޮޕަރޭޓްކުރަމުން އަންނަ އެންމެ ބިޒީ އެއް އެއަރޕޯޓެވެ. ވެލާނާ އެއަރޕޯޓަށް އޮންނަ ޑިމާންޓް ދުވަހެއް ދުވަހަކަށް އިތުރުވަމުންދާއިރު، ޖާގައިގެ ދަތިކަމަކީ މިވަގުތު އެއަރޕޯޓަށް ދިމާވެފައިވާ އެންމެ ބޮޑު އެއް ގޮންޖެހުމެވެ. މިކަމަށް ހައްލެއް ގެނެއުމުގެ ގޮތުން ސަރުކާރުން ދަނީ އެއަރޕޯޓް ތަރައްޤީކުރުމަށް 1 ބިލިއަން ޑޮލަރުގެ ބިޔަ މަޝްރޫޢެއް ކުރިއަށްގެންދަމުންނެވެ. މި މަޝްރޫޢުގެ ތެރޭގައި، އާ ރަންވޭއެއް ހެދުމާއި، އިންޓަރނޭޝަނަލް ޓަރމިނަލަކާއި، އާ ސީޕްލޭން ޓަރމިނަލެއްގެ އިތުރުން، ފިއުލް ފަރމަކާއި، ކާގޯ ކޮމްޕްލެކްސްއެއް ތަރައްޤީކުރުމަށް ވަނީ ހަމަޖެހިފައިވެއެވެ. އަދި އެއަރޕޯޓަށް ޖައްސާ އެއަރ ކްރާފްޓްތަކަށް ފަސޭހަކަމާއެކު ޕާކް ކުރެވޭނެ އިންތިޒާމް ހަމަޖެއްސުމަށްޓަކައި، އެއަރޕޯޓުގެ ޕާކިން ސްޕޭސް އިތުރުކުރުންވެސް ހިމެނެއެވެ.
ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ ބިޔަ މަޝްރޫޢުގެ ޢަމަލީ މަސައްކަތް އެއަރޕޯޓުގެ އެކި ސަރަޙައްދުތަކުގައި ކުރިއަށްދިޔަ ނަމަވެސް، އެއަރޕޯޓުގެ އޮޕަރޭޝަންތަކަށް އެއްވެސް ކަހަލަ ބުރުލެއް ނައިސް ކުރިއަށްދާކަން ފާހަގަކޮށްލަންޖެހެއެވެ. އެގޮތުން އޭޕްރީލްމަސް ވެފައިވަނީ ޕްރައިވެޓް ޖެޓްތަކުގެ ބަހާރު މޫސުމެއް އެއަރޕޯޓަށް ގެނުވި މަހަކަށެވެ. އެއަރޕޯޓަށް ވަރަށް ބާރު ބޮޑުވެގެންދިޔަ މަހެއްގެ ގޮތުގައެވެ. އޭޕްރިލްމަހުގެ ފުރަތަމަ ދުވަހު އެކަނިވެސް 29 ޕްރައިވެޓް ޖެޓް އެއަރޕޯޓަށް ޖައްސާފައިވާއިރު، މިއީ 2017 ވަނަ އަހަރުގެ އޭޕްރިލްމަހުގެ ފުރަތަމަ ދުވަހު އެއަރޕޯޓަށް ޖެއްސި ޕްރައިވެޓް ޖެޓްތަކުގެ ޢަދަދަށްވުރެ އިތުރު ޢަދަދެއްކަމަށް އެމް.އޭ.ސީ.އެލުން ބުނެއެވެ.
މި ސީޒަނަކީ ރާއްޖެއަށް ފަތުރުވެރިން ޒިޔާރަތްކުރާ ޕީކް ސީޒަން ކަމުގައި ނުވިޔަސް، ރާއްޖެއަށް އޮޕަރޭޓްކުރާ އެއަރލައިންތަކުގެ އިތުރުން، ރާއްޖެއަށް ޖައްސާ ޕްރައިވެޓް ޖެޓްތަކުގެ އަދަދު އިތުރުވުމަކީ ފަތުރުވެރިކަމަށްވެސް ލިބިގެންދާ ބޮޑު ކުރިއެރުމެއްގެ ގޮތުގައި އެމް.އޭ.ސީ.އެލުން ދެކެއެވެ. އޭޕްރިލް މަހުގެ ފުރަތަމަ ދުވަސް އެއަރޕޯޓަށް މިހާ ބާރު ބޮޑުވެގެންދިޔައިރު، އާ އަހަރާއި ދިމާކޮށް، މިދިޔަ ޖެނުއަރީމަހުގެ ތެރޭގައިވެސް ރިކޯޑް ޢަދަދަކަށް ޕްރައިވެޓް ޖެޓް އެއަރޕޯޓަށް ޖައްސާފައިވާކަން ފާހަގަކޮށްލަންޖެހެއެވެ.
އެއަރޕޯޓް ތަރައްޤީކުރުމުގެ އެއް ބިލިއަން ޑޮލަރުގެ ބިޔަ މަޝްރޫޢުގެ ތެރޭގައި އެންމެ ބޮޑު އިސްކަމެއްދީފައިވަނީ އައު ރަންވޭއަކާއެކު އެއަރޕޯޓުގެ ޕާކިންގ ސްޕޭސް އިތުރުކުރުމަށެވެ. މި މަޝްރޫޢު ނިމޭއިރު، A380 ގެ މަތިންދާ ބޯޓު ފަހަރަށް ފަސޭހަކަމާއެކު ޖެއްސޭނެ އައު ރަންވޭއަކާއެކު، އެއަރޕޯޓުގެ ޕާކިންގ ކެޕޭސިޓީ ސަތޭކަ ތިރީސް ހާސް އަކަ މީޓަރަށް އިތުރުވެގެންދާނެއެވެ. މިއާއެކު އެއަރޕޯޓަށް މިހާރު ދިމާވެފައިވާ ޖާގައިގެ މައްސަލަ ހައްލުވެ، އެއަރޕޯޓުގެ އޮޕަރޭޝަންތަކަށް ބޮޑެތި ކުރިއެރުންތަކެއް ލިބިގެންދާނެއެވެ.