މެދު އިރުމައްޗާއި އުތުރު އެފްރިކާ ސަރަޙައްދުގެ ފަތުރުވެރިންގެ މެދުގައި ޗުއްޓީ ހޭދަކޮށްލުމަށް އެންމެ ކަމުދާ 10 މަންޒިލްގެ ތެރޭގައި ދިވެހިރާއްޖެ ހިމެނިއްޖެއެވެ.
މިސަރަޙައްދުގެ ފަތުރުވެރިން ރާއްޖެ ސިފަކޮށްފައިވަނީ ހަނީމޫން ހޭދަކޮށްލުމަށް ޒިޔާރަތްކޮށްލަން އެންމެ ކަމުދާ އެއް މަންޒިލްގެ ގޮތުގައެވެ. ހިތްހަމަޖައްސާލާ، އާއިލާއާއިއެކު ޗުއްޓީ ހޭދަކޮށްލުމަށްވެސް ރާއްޖެއަކީ ކަމުދާ މަންޒިލެއްކަމަށް އެމީހުން ސިފަކުރެއެވެ. މީގެ އިތުރުން ރިސޯޓުތަކުން ފޯރުކޮށްދޭ ޚިދުމަތްތަކުގެ ފުރިހަމަކަމާއި ރާއްޖޭގެ ދޮންވެލި ތުނޑިތަކަކީވެސް މެދު އިރުމައްޗާއި އުތުރު އެފްރިކާ ސަރަހައްދުގެ ފަތުރުވެރިން ރާއްޖެ އަންނަ ސަބަބެކެވެ.
މި ލިސްޓުގައި ރާއްޖޭގެ އިތުރުން ދެން ހިމެނެނީ އުރުދުން، މެލޭޝިޔާ، ސިންގަޕޫރު، ޔުނައިޓެޑް އެރަބް އެމިރޭޓްސް، މޮރޮކޯ، މިސްރު ޤަތަރު، ކިރިގިސްތާނާއި ކަޒަކިސްތާނެވެ.