ސަރުކާރުން އަތޮޅުތެރޭގައި ތަރައްޤީކުރައްވާ ހައުސިން ޔުނިޓްތަކުގެ ތެރެއިން ގއ ވިލިނގިއްޔާއި ގދ.ގައްދޫގައި ތަރައްޤީކުރައްވާ ހައުސިން ޔުނިޓްތަކުގެ މަސައްކަތް ނިމިއްޖެއެވެ.
ގއ.ވިލިނގިލީގައި ސަރުކާރުން ތަރައްޤީ ކުރައްވާފައިވަނީ 52 ހައުސިން ޔުނިޓެވެ. އަދި ގދ ގައްދޫގައި ތަރައްޤީ ކުރައްވާފައިވަނީ 50 ހައުސިން ޔުނިޓެވެ.
ގއ.ވިލނިގިލީ ކައުންސިލްގެ ރައީސް ނިޔާޒު ނިޒާރު ވިދާޅުވީ، އެރަށުގައި ތަރައްޤީކުރެއްވި ހައުސިންގ ޔުނިޓްތަކުގެ މަސައްކަތް ނިމި މިހާރު ކުރިއަށްދަނީ މި ހައުސިންގ ޔުނިޓްތައް ލިބޭނެ ފަރާތްތައް ކަނޑައެޅުމުގެ މަސައްކަތްކަމަށެވެ. މި ހައުސިން ޔުނިޓްތަކަށް އެދި 80 ފަރާތަކުން ފޯމް ހުށަހަޅާފައިވާކަމަށްވެސް ކައުންސިލްގެ ރައީސް ވިދާޅުވިއެވެ.
ވިލިގިލީގައި ތަރައްޤީކޮށްފައިވާ ހައުސިންގ ޔުނިޓްތަކަކީ 3 ކެޓެގެރީއަކަށް ބަހާލައިގެން ތަރައްޤީކޮށްފައިވާ ހައުސިންގ ޔުނިޓްތަކެކެވެ.
މީގެތެރޭގައި ކެޓެގެރީ އޭ ގައި ހިމެނެނީ 37 ހައުސިން ޔުނިޓެވެ. ކެޓެގެރީ ބީ ގައި 5 ހައުސިންގ ޔުނިޓް ހިމެނޭއިރު ކެޓެގެރީ ސީ ގައި ހިމެނެނީ 10 ހައުސިން ޔުނިޓެވެ. ކެޓަގަރީ ސީގައި ހިމެނޭ 10 ހައުސިން ޔުނިޓް ދޫކުރުމަށް ހަމަޖެހިފައިވަނީ ވިޔަފާރި އުސޫލުންނެވެ.
މި ހައުސިންގ ޔުނިޓްތައް ފަރުމާކޮށްފައިވަނީ 3 ކޮޓަރިއާއި 3 ފާޚާނަ އަދި ސިޓިންގ ރޫމާއި ބަދިގެ ހިމެނޭ ގޮތަށެވެ.
ގައްދޫ ކައުންސިލްގެ ޒިއްމާދާރުވެރިޔާ އިސްމާޢީލް ޝަމީމް ވިދާޅުވީ އެރަށުގައި ތަރައްޤީ ކުރެއްވި 50 ހައުސިން ޔުނިޓްގެ ހުރިހާ މަސައްކަތެއް ނިމި އެ ހައުސިން ޔުނިޓްތައް ލިބުނު ފަރާތްތަކުގެ ލިސްޓް އާއްމުކުރެއްވުމުގެ މަސައްކަތް ކުރައްވަމުން ގެންދަވާކަމަށެވެ. މި ހައުސިން ޔުނިޓްތަކަށް 87 ފަރާތަކުން ފޯމު ހުށަހަޅާގައިވާކަމަށް ޝަމީމް ވިދާޅުވިއެވެ.
3 ކެޓެގެރީއަކަށް ބަހާލާފައިވާ މި ހައުސިން ޔުނިޓްތަކުގެ ތެރެއިން އޭ ކެޓެގެރީގެ ހިމެނޭ 40 ހައުސިން ޔުނިޓަކީ ރަށުގެ ރައްވެހީންނަށް ޙާއްސަ ކުރައްވާފައިވާ ހައުސިން ޔުނިޓްތަކެކެވެ. ބީ ކެޓެގެރީގައި ހިމެނޭ 5 ހައުސިން ޔުނިޓަކީ ރަށަށް ހިޖުރަކުރުމަށް ބޭނުންވާ ފަރާތަކަށް ޚާއްސަކުރައްވާފައިވަ ހައުސިން ޔުނިޓްތަކެކެވެ.
ސީ ކެޓެގެރީގެ ހިމެނޭ 5 ހައުސިން ޔުނިޓް ޚާއްސަ ކުރައްވާފައިވަނީ ވިޔަފާރި އުސޫލުން ދޫކުރުމަށެވެ. މިއީ 2 ކޮޓަރިއާއި ބަދިގެ ހިމެނޭގޮތަށް ފަރުމާކޮށްފައިވާ ހައުސިންގ ޔުނިޓްތަކެކެވެ.