ވިމްބަލްޑަންގެ އަންހެން ސިންގަލްސް ޗެމްޕިއަނަކަށް ނޮސްކޯވާ
-
ނޮސްކޯވާ ފައިނަލް މެޗު ކާމިޔާބު ކުރީ 2 ސެޓު އެއް ސެޓުން
ވިމްބަލްޑަން ޓެނިސް މުބާރާތުގެ އަންހެން ސިންގަލްސް އިވެންޓްގެ ޗެމްޕިއަންކަން ޗެކިއާގެ ޒުވާން ކުޅުންތެރިޔާ ލިންޑާ ނޮސްކޯވާ ހޯދައިފިއެވެ.
މިމުބާރާތުގެ ޗެމްޕިއަންކަން ނޮސްކޯވާ ހޯދީ ފައިނަލްގައި އެޤައުމަށް ނިސްބަތްވާ އަދި މިމުބާރާތުގައި 10 ވަނައަށް ސީޑު ކުރެވިފައިވި އޭނާގެ ގާތް އެކުވެރިއެއް ކަމަށްވާ ކެރޮލީނާ މުޗޯވާ އާއި ބައްދަލުކޮށް ދެސެޓް އެއް ސެޓުން މެޗު ކާމިޔާބު ކޮށްގެންނެވެ. މިއީ ވިމްބަލްޑަންގެ ތާރީހްގައި ފައިނަލް މެޗެއްގައި ޗެކިއާއަށް ނިސްބަތްވާ ދެ ކުޅުންތެރިން ކުޅުނު ފުރަތަމަ ފަހަރެވެ.
މިމެޗު ނޮސްކޯވާ ވަރަށް ފޯރީގައި ފަށާ ފުރަތަމަ ސެޓު ހައެއް ދެއަކުން ކާމިޔާބު ކޮށް އަދި ދެވަނަ ސެޓުގައިވެސް ފަސް ގޭމް ދެ ގޭމުން އޭނާ ލީޑު ނަގާ މިފައިނަލް މެޗު ވަރަށް ފަސޭހަ ކަމާއެކު ކާމިޔާބު ކުރުމާއި ގާތަށް ދިޔައެވެ. ނަމަވެސް ދެން ފެނިގެންދިޔައީ މުޗޯވާ ހިތްވަރާއެކު ކުޅެ ޖެހިގެން އައި ފަސް ގޭމް ކާމިޔާބު ކޮށް ފަހެއް ހަތަކުން ދެވަނަ ސެޓު ކާމިޔާބު ކޮށް ތިން ވަނަ ސެޓަކަށް މިމެޗު ގެންދިޔަ ތަނެވެ. ނަމަވެސް ތިންވަނަ ސެޓުގައި ނޮސްކޯވާވަނީ އަލުން އޭނާގެ ކުރީގެ ކުޅުމަށް އެނބުރިގޮސް ހައެއް ތިނަކުން މިސެޓު ކާމިޔާބު ކޮށް ވިމްބަލްޑަން މުބާރާތް ފުރަތަމަ ފަހަރަށް ކާމިޔާބު ކޮށްފައެވެ. މިއީ ނޮސްކޯވާއަށް މިހާތަނަށް ކާމިޔާބު ކުރެވުނު ގްރޭން ސްލޭމްގެވެސް ފުރަތަމަ މުބާރާތެވެ.
މެޗަށްފަހު ވާހަކަ ދައްކަމުން ނޮސްކޯވާވަނީ ފަހު ޕޮއިންޓް ހޯދަން ވަރަށް އުނދަގޫވިކަން ހާމަކޮށް ފުރަތަމަ ފައިނަލް މުޗޯވާ އާއި އެކު ކުޅެން ލިބުމުން އުފާކުރާކަން ހާމަކޮށްފައެވެ.
މީގެއިތުރުން މިމުބާރާތުގެ ފިރިހެން ޑަބަލްސް ޗެމްޕިއަންކަންވަނީ އެއްވަނައަށް ސީޑު ކުރެވިފައިވާ އިނގިރޭސިވިލާތުގެ ހެންރީ ޕާޓެން އާއި އައިސްލަންޑްގެ ހާރީ ހެލިއޮވާރާ ކާމިޔާބު ކޮށްފައެވެ. މިދެ ކުޅުންތެރިން މިމުބާރާތް ކާމިޔާބު ކޮށްފައިވަނީ ފައިނަލްގައި ހަވަނައަށް ސީޑު ކުރެވިފައިވާ ކްރޮއޭޝިއާގެ މާޓޭ ޕެވިޗް އާއި އެލް ސަލްވަޑޯގެ މާސެލޯ އަރެވާލޯ އާއި ބައްދަލުކުރި މެޗު ސީދާ ދެސެޓުން ކާމިޔާބު ކޮށްފައެވެ. އެއީ ދެ ސެޓުވެސް ޓައި ބްރޭކަށް ގޮސް ހަތެއް ހައެއް އަދި ހަތެއް ހަޔަކުން ކާމިޔާބު ކޮށްގެންނެވެ.