އައްޑޫ ސެންޓްރަލް ޕަވަރ ސްޓޭޝަން ގާއިމުކުރަން ދުބާއީގެ ކުންފުންޏަކަށް

އައްޑޫގެ ކަރަންޓުގެ ޚިދުމަތް ރަނގަޅު ކުރުމަށް އެ ސިޓީގައި ޤާއިމްކުރާ ސެންޓްރަލް ޕަވަރ ސްޓޭޝަން (ސީޕީއެސް) ޤާއިމްކޮށް ނިންމުމަށް، ދުބާއީގެ ކުންފުންޏެއް ކަމަށްވާ ޑެފިނިޓް ސޮލިއުޝަންސްއާ ފެނަކަ ކޯޕަރޭޝަނާ ދެމެދު އެއްބަސްވުމެއްގައި ސޮއިކޮށްފިއެވެ.

ފެނަކައިގައި ބޭއްވި ރަސްމިއްޔާތެއްގައި، އެ ކުންފުނީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، މުޙައްމަދު ނަޖާޙެވެ. ޑެފިނިޓް ސޮލިއުޝަންސްގެ ފަރާތުން ސޮއިކުރެއްވީ އެ ކުންފުނީގެ ފައުންޑަރ އަދި ސީއީއޯ އަބްދުﷲ ސައީދެވެ.

އަލަށް ސޮއިކުރި މި އެއްބަސްވުމުގެ ދަށުން، ސެންޓްރަލް ޕަވަރ ސްޓޭޝަން ފުރިހަމަކުރަން ކުރަން ޖެހޭ ހުރިހާ މަސައްކަތެއްގެ އިތުރުން، އިންޖީނުތައް ބަހައްޓައި އޮޕަރޭޝަނަށް ގެނައުމުގެ މަސައްކަތްވެސް ކުރުމަށް ވަނީ ނިންމާފައެވެ. މިއީ 31 މިލިޔަން ޑޮލަރުގެ މަޝްރޫޢެއްކަމަށް ފެނަކައިން މަޢުލޫމާތުދެއްވައެވެ.

ފެނަކަ ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ނަޖާޙު ވިދާޅުވީ، މި މަޝްރޫޢުގެ މަސައްކަތް މެދުކެނޑުމެއްނެތި ކުރިއަށްގެންގޮސް އަންނަ އަހަރުގެ ނިޔަލަށް ނިންމާލެވޭނެކަމުގެ ޔަޤީންކަން އެބައޮތް ކަމަށެވެ. މިއާއެކު އައްޑުއަށް ދިމާވެފައިވާ ކަރަންޓުގެ މައްސަލައަށް ފުރިހަމަ ހައްލު ލިބިގެންދާނެ ކަމަށް ނަޖާޙު ވިދާޅުވިއެވެ.

"މި ޕްރޮޖެކްޓް ފެށިގެންދާއިރު އަޅުގަނޑުމެންގެ އަމާޒަކީ އިރާދަކުރެއްވިއްޔާ މި ފެށޭ 2027 ވަނަ އަހަރުގެ ނިޔަލަށް އައްޑޫ ސިޓީގެ ކަރަންޓުގެ މައްސަލައަށް ފުރިހަމަ ހައްލެއް ލިބިގެންދިއުން. އެގޮތަށް އަޅުގަނޑުމެން މި ކޮންޓްރެކްޓާއާ އެއްބަސްވެފައިވާނީ." ފެނަކައިގެ އެމްޑީ ވިދާޅުވިއެވެ.

ދުބާއީގައި ރަޖިސްޓްރީކޮށްގެން ހިންގާ ޑެފިނިޓް ސޮލިއުޝަންސްއަކީ، ދުބާއީގެ އިތުރުން މެދުއިރުމަތީގެ ޤައުމުތަކުގައި މިފަދަ ގިނަ މަޝްރޫޢުތަކެއް ހިންގާފައިވާ އަދި ހިންގަމުންގެންދާ، ތަޖުރިބާ ލިބިފައިވާ ކުންފުންޏެކެވެ. އެ ކުންފުންޏާ އައްޑޫގެ ސެންޓްރަލް ޕަވަރހައުސްއެއް ޤާއިމްކުރުމަށް ހަވާލުކުރީ، މީގެކުރިން އެ މަސައްކަތް ހަވާލުކުރި ޗައިނާގެ ޑޮންފަންގ ކުންފުނިން އެއްބަސްވުމާ އެއްގޮތަށް މަޝްރޫޢު ކުރިއަށް ނުގެންދާތީ އެއްބަސްވުން ބާތިލުކުރުމަށްފަހުއެވެ.

މި މަޝްރޫޢުގެ ދަށުން ޕަވަރ ސްޓޭޝަންގައި ބެހެއްޓުމަށް ހަމަޖެހިފައިވަނީ، ބެލްޖިއަމް ކުންފުންޏެއްކަމުގައިވާ އަންގްލޯ ބެލްޖިއަން ކޯޕަރޭޝަން (އޭބީސީ)ގެ އިންޖީނުތަކެކެވެ. ޔޫރަޕްގައި ބޭނުންކުރާ މި ބްރޭންޑްގެ އިންޖީނުތަކަކީ، މިހާރު އައްޑޫގައި ބޭނުންކުރާ ހައި ސްޕީޑް އިންޖީނުތަކާ ޚިލާފަށް ލޯ ސްޕީޑް ޒަމާނީ އިންޖީނުތަކެކެވެ.

އަންނަ އަހަރުގެ ނިޔަލަށް ނިންމުމަށް ހަމަޖެހިފައިވާ މިމަޝްރޫޢު ފުރިހަމަވާއިރު، އައްޑޫ ސީޕީއެސްގައި 26.37 މެގަވޯޓުގެ ކަރަންޓު އުފެއްދުމުގެ ޤާބިލްކަން ހުންނާނެ ކަމަށް ފެނަކައިން ވިދާޅުވިއެވެ.