"ކައުންސިލަރުންގެ ތަމްރީނުތައް ނިމޭއިރު އައު ކައުންސިލް އިމާރާތްތައް ހުންނާނީ ނިމިފައި"

މިއަހަރު އަލަށް އިންތިޚާބު ކުރާ ކައުންސިލަރުންނަށް ބޭނުންވާ ތަމްރީނުތައް ނިމޭއިރު، މިހާރު ކުރިއަށްގެންދާ 55 ކައުންސިލް އިމާރާތުގެ މަސައްކަތް ނިމި، އެތަންތަން ބޭނުން ކުރެވޭނެ ކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ، ސަރުކާރުން 105 ކައުންސިލް އިމާރާތުގެ މަސައްކަތް ދެ ބަޔަކަށް ބަހާލައިގެން ކުރިއަށް ގެންދިއުމަށް ޚާއްޞަ އިސްކަމެއް ދެއްވާ ކަމަށެވެ. މީގެ ތެރެއިން 50 ކައުންސިލް އިދާރާގެ މަސައްކަތް ކުރިއަށް ގެންދިއުމަށް ހަމަޖެހިފައިވަނީ، ޗައިނާގެ އެހީގެ ދަށުންނެވެ. އަދި 55 ކައުންސިލް އިދާރާގެ މަސައްކަތް ކޮންޓްރެކްޓަރ ފައިނޭންސް އުސޫލުން ރަޝީދު ކާޕެންޓްރީ އެންޑް ކޮންސްޓްރަކްޝަން، އާރުސީސީއާ ޙަވާލުކޮށްގެން ވަނީ ފަށާފައެވެ.

މި މަޝްރޫއުތަކާ ގުޅޭގޮތުން މައުލޫމާތު ޙިއްޞާ ކުރައްވަމުން ސިޓީތަކާއި އިދާރީ ދާއިރާތައް ހިންގުމާއި، ޢާންމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު ވިދާޅުވީ، އާރުސީސީއާ ޙަވާލުކޮށްގެން ކުރިއަށްގެންދާ 55 ކައުންސިލްގެ މަސައްކަތް ކުރިއަށް ދަނީ ހިތްހަމަޖެހޭ ރަނގަޅު ސްޕީޑެއްގައި ކަމަށެވެ. މި މަޝްރޫޢުތައް އެ ކުންފުންޏާ ޙަވާލުކޮށްފައިވަނީ، ޖުލައި މަހުގެ ނިޔަލަށް ނިންމައި ޙަވާލުކުރާ ގޮތަށް ކަމަށާއި، އެ މުއްދަތަށް މަސައްކަތް ނިމޭނެ ކަމުގެ ޔަޤީންކަން އެބައޮތް ކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ، އަލަށް އިމާރާތް ކުރާ 55 ކައުންސިލް އިދާރާއަށް ބޭނުންވާ ފަރުނީޗަރު ގެންނަން ފަށާނެ ކަމަށެވެ. އަދި މި ކައުންސިލް އިދާރާތައް ވެގެންދާނީ، މިހާރު ހުރި އިމާރާތްތަކާ އަޅާބަލާއިރު ޖާގަ ތަނަވަސް އަދި ކައުންސިލަރުންނާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ މެންބަރުންނަށްވެސް މަސައްކަތް ކުރާނެ ރަނގަޅު މާޙައުލެއް ޤާއިމުވެފައިވާ އިމާރާތްތަކަށް ކަމަށް ވަޒީރު އާދަމް ޝަރީފް ވިދާޅުވިއެވެ.

"އަޅުގަނޑުމެންނަށް ޤަބޫލުކުރެވެނީ ޖުލައިގެ ނިޔަލަށް ހުރިހާ ތަނެއް ނިމޭނެ ކަމަށް. އެގޮތަށް ނިމިއްޖެއްޔާ މިހާރު އަލަށް ހޮވިވަޑައިގަންނަވާ ބޭފުޅުންނަށް ގާތްގަނޑަކަށް އެ ބޭފުޅުންގެ ހަނީމޫން ޕީރިއަޑުގެ ތެރޭގައި އަޅުގަނޑުމެން އެ މީހުންނަށް ބޭނުންވާ ތަމްރީންތައް ދީ ނިމޭއިރު، މަސައްކަތް ކުރުމަށް އައު ކައުންސިލް އިދާރާތައް ލިބިގެންދާނެ. ވަރަށް ރަނގަޅު މާޙައުލެއް އެ ފަރާތްތަކަށް ލިބިގެންދާނެ،" ވަޒީރު އާދަމް ޝަރީފް އުމަރު ވިދާޅުވިއެވެ.

މި 105 ކައުންސިލް އިދާރާގެ އިތުރުން ޕީއެސްއައިޕީގެ ދަށުން ސަރުކާރުން ދަނީ، އިތުރު ކައުންސިލް އިދާރާތަކެއްގެ މަސައްކަތްވެސް ކުރަމުންނެވެ. އެގޮތުން މިހާތަނަށް 6 ކައުންސިލް އިދާރާއެއްގެ މަސައްކަތް ނިމިފައިވާ ކަމަށް ވަޒީރު ވިދާޅުވިއެވެ.

މީގެ އިތުރުން ކ. ދިއްފުއްޓާއި ނ. މިލަދޫ ކައުންސިލް އިދާރާގެ ނުނިމި ހުރި މަސައްކަތްތައް މި މަހުގެ ތެރޭގައި އެމްޓީސީސީއާ ޙަވާލުކޮށްގެން ކުރިއަށްގެންދަން ނިންމާފައިވާ ކަމަށްވެސް ސިޓީތަކާއި އިދާރީ ދާއިރާތައް ހިންގުމާއިި ޢާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވިއެވެ.