ހަނގުރާމައަށް ދިއުމަށްފަހު ތުރުކީގައި ތާށިވި ދެ މައިން ރާއްޖެއަށް ގެނެސްފި

ސީރިއާގައި ހިނގަމުންދިޔަ ހަނގުރާމައިގައި ބައިވެރިވުމަށް ދިވެހި ދިވެހިންގެ ތެރެއިން ތުރުކީގައި ތާށިވެފައި ތިބި ދެ މައިން އަނބުރާ ރާއްޖެ ގެނެސްފައިވާކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވަޒީރު އަލީ އިޙްސާން ވިދާޅުވީ ހަނގުރާމަހިނގާ ސަރަހައްދުތަކަށް ދިޔަ ދިވެހިންނާއި އެ މީހުން ގެންދިޔަ އާއިލާގެ ފަރާތްތައް އަނބުރާ ރާއްޖެއަށް ގެނެސް، ދޭންޖެހޭ ފަރުވާ ދިނުމަށްފަހު މުޖުތަމަޢަށް އަނބުރާ ނެރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިރުޝާދު ދެއްވާފައިވާ ކަމަށެވެ. އެމަނިކުފާނުގެ އިރުޝާދާ އެއްގޮތަށް ސީރިއާގެ ދެ ސަރަހައްދެއްގައި ހާލުގައި ޖެހިފައިތިބި 60 އެއްހާ ދިވެހިން އަނބުރާ ގެނައުމުގެ މަސައްކަތް ސަރުކާރުން ފެއްޓެވި ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ސީރިއާގައި ހާލުގައި ޖެހިފައި ތިބި ދިވެހިން ގެނައުމުގެ މަސައްކަތް ކުރަމުންދަނިކޮށް، ހަނގުރާމައަށް ގޮސް، ތުރުކީއަށް ހިޖުރަކޮށް، އެ ޤައުމުގައި ތާށިވެފައި ތިބި 3 މީހުންގެ މައުލޫމާތު ލިބުނު ކަމަށެވެ. ތުރުކީން އެ 3 މީހުން ޑީޓެއިންކޮށް ދިވެހި ސަރުކާރަށް އެންގުމުން އެ މީހުންގެ ތެރެއިން ދެ މައިން ރާއްޖެ ގެނެސް ފަރުވާގެ ނިޒާމުގެ ތެރެއަށް ވައްދާފައިވާ ކަމަށް ވަޒީރު އިޙްސާން ވިދާޅުވިއެވެ.

"މި މަސައްކަތް ކުރިއަށްގެންދަނިކޮށް އަޅުގަނޑުމެންނަށް ލިބުނު މައުލޫމާތަކީ ތުރުކިއޭގައި ދިވެހިރާއްޖޭގެ 3 ރައްޔިތަކު މިފަދަ ހަނގުރާމައިގައި ބައިވެރިވުމަށް އެހެން ޤައުމަކަށްގޮސް، ފަހުން ތުރުކީއަށް ހިޖުރަކުރެވި އެތަނުގެ ތެރޭގައި ތާށިވެފައި ތިބި މައުލޫމާތު. އަދި ތުރުކީގެ ސަރުކާރުގެ ފަރާތުން އެ ފަރާތްތައް ޑީޓެއިންކޮށް ދިވެހި ސަރުކާރަށް އެންގުމާއެކު އަޅުގަނޑުމެން ގުޅިފައިވާ އެކި މުއައްސަސާތައް މެދުވެރިވެގެން އެ ފަރާތްތައް ރާއްޖެއަށް ގެނައުމަށް ވަނީ މަސައްކަތް ކޮށްފައި. މި މަސައްކަތުގެ ނަތީޖާގެ ގޮތުން 14 އަހަރުގެ އަންހެން ކުއްޖަކާއި އެ ކުއްޖާގެ މަންމަ މިހާރު ވަނީ ރާއްޖެ ގެނެވި ނޭޝަނަލް އިންޓެގްރެޓީ ސެންޓަރުގައި އެ ފަރާތްތަކަށް ދެންޖެހޭ ޚިދުމަތް މިހާރު ދަނީ ދެމުން،" ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވިއެވެ.

ހަނގުރާމަ ހިންގަމުންދާ ސަރަހައްދުތަކަށް ދިޔަ ދިވެހި އާއިލާތައް އަނބުރާ ގެނެސް މުޖުތަމައަށް ނެރުމުގެ ކުރިން ކ. ހިންމަފުށީގައި ގާއިމުކޮށްފައިވާ ނޭޝަނަލް އިންޓެގްރެޓީ ސެންޓަރުގައި އެފަރާތްތަކަށް ބޭނުންވާ ފަރުވާތައް ފޯރުކޮށްދެއެވެ. މިގޮތަށް ގެންނަ ފަރާތްތައް 24 ގަޑިއިރު މޮނިޓަރ ކުރެވޭނެ އިންތިޒާމް އެންއާރުސީގައި ގާއިމުކޮށްފައެވެ.

އެ ސެންޓަރުގައި ކުޑަކުދިންނަށާއި ބޮޑެތި މީހުންނަށް ފަރުވާދިނުމަށް ތެރަޕީ ރޫމުތައް ގާއިމުކޮށްފައިވާއިރު ނަފްސާނީ އަދި އިޖުތިމާޢީ ގޮތުން ބޭނުންވާ އެހީތެރިކަމާއި ދީނީ ގޮތުން ސައްޙަ މަޢުލޫމާތު، ފަރުވާ ހޯދާ ފަރާތްތަކަށް ފޯރުކޮށްދެއެވެ.

ސަރުކާރުން ކުރަމުން އަންނަ މަސައްކަތުގެ ދަށުން 2024ވަނަ އަހަރު ސޫރިޔާ-ތުރުކީ ބޯޑަރުގައި ހާލުގައި ޖެހިފައި ތިބި 5 އާއިލާއެއްގެ 21 މީހުން ވަނީ ރާއްޖެއަށް ގެނެސް ފަރުވާ ދީފައެވެ. މީގެ ތެރޭގައި 15 ކުޑަކުދިންނާއި 5 އަންހެނުން އަދި ފިރިހެނެއް ހިމެނެއެވެ. އޭގެ އިތުރުންވެސް އިތުރު އާއިލާއެއް ނޭޝަލް އިންޓެގްރިޓީ ސެންޓަރުގައި ފަރުވާ ދިނުމަށްފަހު ކާމިޔާބުކަމާއެކު މުޖުތަމަޢަށް ވަނީ ނެރެފައެވެ.