ޔަހޫދީންނާއި އެމެރިކާ ގުޅިގެން އީރާނާ ދެކޮޅަށް ޣައިރުޤާނޫނީ ހަނގުރާމައެއް ފެށުމުގެ ސަބަބުން ދުނިޔޭގެ ހަކަތައިގެ ލޭނާރުގެ ގޮތުގައި ބެލެވޭ ހުރްމުޛް ކަނޑުއޮޅީގެ ދަތުރުފަތުރު ހުއްޓުމަކަށް އަތުވެއްޖެއެވެ. އީރާންގެ އިސްލާމީ އިންޤިލާބީ ލަޝްކަރު (އައިއާރްޖީސީ)ން ވަނީ ހުރްމުޛް ކަނޑުއޮޅިން ދަތުރު ކުރުން ހުރިހާ އުޅަނދުތަކަށް މަނާކޮށްފައެވެ. އަދި، މި ކަމުގެ ނޭދެވޭ އަސަރުތައް ދުނިޔޭގެ އިޤުތިޞާދަށް ވަނީ ކުރަން ފަށާފައެވެ. ނަމަވެސް، އެ ކަނޑުއޮޅި ބަންދު ކުރުމަށް އީރާންގެ ޤާނޫނު ހަދާ މަޖިލީހުން ރަސްމީކޮށް ފާސްކޮށްފައިވާ ކަން ސާފެއް ނޫނެވެ.
ދުނިޔޭގައި ކޮންމެ ދުވަހަކު ބޭނުންކުރާ ސާފުނުކުރާ ތެލުގެ %20 ނުވަތަ ދުވާލެއްގެ މައްޗަށް 20 މިލިޔަން ފީފާ، އަދި ދުނިޔޭގެ ބާޒާރަށް ނެރޭ ޤުދުރަތީ ގޭހުގެ (އެލްއެންޖީ) ފަސްބައިކުޅަ އެއްބައި އުފުލަނީ މި ހަނި ކަނޑުއޮޅިންނެވެ. މީގެ އިތުރުން، ދުނިޔޭގައި ދަނޑުވެރިކަމަށް ބޭނުންކުރާ އެންމެ މުހިންމު ފަރޓިލައިޒަރ ކަމުގައިވާ ޔޫރިއާގެ %33 ވެސް އުފުލަނީ މި މަގުންނެވެ. މިހާތަނަށް ލިބިފައިވާ ރިޕޯޓުތަކަށް ބަލާއިރު، އެ ސަރަޙައްދުން ދަތުރުކުރާ އުޅަނދުފަހަރުގެ އަދަދު ވަނީ %80 އަށްވުރެ ބޮޑަށް ދަށަށް ގޮސްފައެވެ.
ޔަހޫދީންނާއި އެމެރިކާ ގުޅިގެން އީރާނަށް ޙަމަލާ ދޭން ފަށާފައި ވަނީ ފެބުރުވަރީ 28ވަނަ ދުވަހުއެވެ. ނަމަވެސް، މަސްރަޙު ނުތަނަވަސްވަމުން ދިޔުމާ އެކު، ފެބުރުވަރީ 27 ވަނަ ދުވަހު ވެސް ތެލުގެ އަގުތައް ވަނީ އުފުލިފައެވެ. މި ގޮތުން، އެ ދުވަހު ތެޔޮ ފީފާއެއް އަގު ހުރީ 73 އެމެރިކާ ޑޮލަރުގައެވެ. ނަމަވެސް، މާރިޗު 2ވަނަ ދުވަހާ ހަމައަށް އައިއިރު، ތެޔޮ ފީފާއެއް އަގު މި ވަނީ 79.40 ޑޮލަރަށް އުފުލިފައެވެ.
ތެލުގެ އަގުގެ މިންގަނޑު ކަނޑައެޅުމުގައި ބަލާ ބްރެންޓް ކްރޫޑްގެ ސާފުނުކުރާ ތެޔޮ ފީފާއެއްގެ އަގު އެންމެ ފަހުން ހުރީ 81.85 ޑޮލަރުގައެވެ. އިޤުތިޞާދީ މާހިރުން އިންޒާރުދޭ ގޮތުގައި، މި ހަނގުރާމަ ދިގުލައިގެން ގޮސްފިނަމަ، ތެޔޮ ފީފާއެއްގެ އަގު 100 ޑޮލަރަށްވުރެ މައްޗަށް އެރުމަކީ ގާތް ކަމެކެވެ. މީގެ އިތުރުން، ވިލާތުގެ ބާޒާރުގައި ޤުދުރަތީ ގޭހުގެ އަގު ވަނީ %35 އަށްވުރެ ބޮޑަށް އުފުލިފައެވެ.
ހުރްމުޛް ކަނޑުއޮޅި ބަންދުވުމުގެ އެންމެ ބޮޑު ނުރައްކަލެއް އޮތީ އޭޝިއާގެ ބޮޑެތި އިޤުތިޞާދުތަކާއި ކުދި ޤައުމުތަކަށެވެ. ހުރްމުޛް ކަނޑުއޮޅިން އުފުލާ ތެލުގެ %84 ގެެންދަނީ އޭޝިއާގެ ޤައުމުތަކަށެވެ. މީގެ ތެރޭގައި ހިމެނޭ ޗައިނާ، އިންޑިއާ، ޖަޕާން އަދި ދެކުނު ކޮރެއާއަކީ އެ ޤައުމުތަކުގެ ސިނާޢީ ދާއިރާތަކަށް ބޭނުންވާ ހަކަތައަށް ގަލްފު ސަރަޙައްދަށް ވަރަށް ބޮޑަށް ބަރޯސާވާ ޤައުމުތަކެކެވެ.
އެމެރިކާގެ ހަކަތައާ ބެހޭ އިދާރާ (އީއައިއޭ)އިން ހާމަކުރި ގޮތުގައި، ސަޢޫދީ ޢަރަބިއްޔާއާއި އެކުވެރި ޢަރަބި ޢިމާރާތް (ޔޫއޭއީ)ގައި ތެޔޮ އުފުލާނެ އިތުރު ހޮޅިލައިންތައް ހުރި ނަމަވެސް، އެ ވަސީލަތްތަކުން އުފުލޭނީ ކަނޑުއޮޅިން އުފުލާ ތެލުގެ އެންމެ %17 އެވެ. އެހެންކަމުން، ހުރްމުޛް ކަނޑުއޮޅި ބަންދުވުމަކީ ދުނިޔޭގެ ހުރިހާ ޤައުމެއްގައި މުދަލާއި ޚިދުމަތުގެ އަގުތައް އުފުލި، މުޅި ދުނިޔޭގެ އިޤުތިޞާދީ ދުވެލި މަޑުޖެހިގެންދާނެ ކަމެއް ކަމުގައި މާހިރުން އިންޒާރު ކުރެއެވެ.