ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ފުރަތަމަ ފަހަރަށް ބޭއްވި ސާފް ފުޓްސަލް ޗެމްޕިއަންޝިޕްގައި ވާދަކޮށް ސައްތައިން ސައްތަ ރިކޯޑަކާއއެކު މުބާރާތުގެ ޗެންޕިއަންކަން ހޯދި ފަޚުރުވެރި ގައުމީ ފުޓްސަލް ޓީމު މާލެ އައުމުން ހޫނު މަރުހަބާއެއް ކިޔައިފިއެވެ.
ގައުމީ ފުޓްސަލް ޓީމު މިރޭ މާލެ އައުމުން ވެލާނާ އިންޓަނޭޝަނަލް އެއާޕޯޓުގެ ވީއައިޕީން ޓީމަށް މަރުހަބާ ދެންނެވީ ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙްމަދު ޠާރިޤްއެވެ. މީގެ އިތުރުން ކުޅިވަރު ޢާއިލާއާއި ފުޓްސަލްއަށް ލޯބިކުރާ ގިނަ ފަރާތްތަކަކުންވަނީ ޓީމަށް ހޫނު މަރުހަބާއެއް ކިޔާފައެވެ.
ޓީމު މާލެ އައުމަށްފަހު، އަމީނީ މަގާއި މަޖީދީ މަގުން ޕިކަޕުގައި އާންމުންނަށް ފެންނަ ގޮތަށް ޓްރޮފީއާއެކު ދަތުރުކޮށް އާޓިފިޝަލް ބީޗު ސަރަހައްދަށްދިއުމަށްވަނީ ހަމަޖެހިފައެވެ.
އެއާއިއެކު ޓީމަށް މަރުހަބާ ކިޔުމުގެ ގޮތުން ބާއްވާ ޚާއްސަ ރަސްމިއްޔާތު އާޓިފިޝަލް ބީޗުގައި ފެށިގެން ކުރިއަށްދާނެއެވެ. އާންމުންނަށް ބައިވެރިވެވޭގޮތަށް ކުރިއަށްދާ މި ހަރަކާތުގެ ތެރެއިން ހަވާއެރުވުމާއި ބޮޑުބެރުގެ ހަރަކާތްތަކުގެ އިތުރުން ގައުމީ ފުޓްސަލް ޓީމުގެ ކުޅުންތެރިންނާއެކު ފޮޓޯ ނެގުމާއި، ޓްރޮފީއާއެކު ފޮޓޯ ނެގުމުގެ ފުރުސަތުވެސް އާންމުންނަށް ހުޅުވާލާނެއެވެ.
ރާއްޖޭގެ ފަޚުރުވެރި ޤައުމީ ފުޓްސަލް ޓީމަށް މަރުހަބާ ކިޔުމުގެ ގޮތުން މިރޭ 09:30 ގައި އާޓިފިޝަލް ބީޗުގައި ކުރިއަށްދާ ކުލަގަދަ މިހަރަކާތުގައި ވީހާވެސް ގިނަ ބަޔަކު ބައިވެރިވެދިނުމަށް ކުޅިވަރު ވަޒީރު ވަނީ އެދިވަޑައިގަންފައެވެ.
ގައުމީ ޓީމުން ހޯދާ ކޮންމެ ކާމިޔާބީއެއްގައި ސަޕޯޓަރުންގެ ހިއްސާ މުހިންމު ދައުރެއް އަދާކުރާއިރު، ވިދުން ގަދަ ސާފުގެ ފުރަތަމަ ފުޓްސަލް ތަށްޓާއި އެކު ގައުމު ހެއްވާލި ގައުމީ ފުޓްސަލް ޓީމަށް މަރުހަބާ ކިޔުމުގެ ފުރުސަތު މިވަނީ ހުޅުވިފައެވެ.
އެއްބައިވަންތަކަމާއި އެކު ގައުމީ ރޫހެއްގައި ރަތުން ޖަރީވެ ތިބެ، ގައުމީ ފުޓްސަލް ޓީމަށް ހިތްވަރު ދިނުމަށް ނުކުންނަމާތޯއެވެ.