އެވެރިން: ފަހު އެޕިސޯޑް ޚާއްސަކޮށްފައިވަނީ މުބީންގެ ދެމަފިރިކަނބަލުންނަށް
-
މި އެޕިސޯޑް ގެނެސްދޭނީ މިރޭ 22:00 ގައި ޕީ.އެސް.އެމް ނިއުސްއިން
-
މުބީންގެ ސިޔާސީ ހަޔާތާއި، ދިރިއުޅުމާ ގުޅުންހުރި ޝައުގުވެރި އެތައް ވާހަކަތަކެއް
ޕީ.އެސް.އެމް ނިއުސްއިން މިރަމަޟާން މަހަށް ހާއްސަކޮށްގެން ގެނެސްދިން "އެވެރިން" މި ސިލްސިލާގެ ފަހު އެޕިސޯޑް މިރޭ ގެނެސްދިނުމަށްވަނީ ހަމަޖެހިފައެވެ. މި އެޕިސޯޑް ގެނެސްދޭނީ މިރޭ 22:00 ގައި ޕީ.އެސް.އެމް ނިއުސްއިންނެވެ.
މި ސިލްސިލާގެ ފަހު އެޕިސޯޑް ޚާއްސަކޮށްފައިވަނީ ރީޖަނަލް އެއަރޕޯޓްސްގެ މެނޭޖިންގ ޑިރެކްޓަރ އަޙްމަދު މުބީންގެ ދެމަފިރިކަނބަލުންނަށެވެ. މިޕްރޮގްރާމްގެ ތެރެއިން މުބީންގެ ސިޔާސީ ހަޔާތާއި، ދިރިއުޅުމާ ގުޅުންހުރި ޝައުގުވެރި އެތައްވާހަކަތަކެއް ގެނެސްދެވޭނެއެވެ. މި އެޕިސޯޑްގެ ޕްރޮމޯ ބެލުންތެރިންނާއި ހިސާބަށްދޫކޮށްލާފައިވާއިރު، ޕްރޮމޯއިންވެސް އެތައް ވާހަކަތަކެއް ބުނެދެއެވެ.
"އެވެރިން" މި ސިލްސިލާގެ ޕްރޮގްރާމްތަކަކީ ދިވެހި ޤައުމަށް އެކި ރޮނގުރޮނގުން ފާހަގަކޮށްލެވޭ ޚިދުމަތްތަކެއް ކުރައްވާފައިވާ އަދި ކުރައްވަމުން ގެންދަވާ ބޭފުޅުންގެ ވާހަކަތައް ހިމަނައިގެން ގެނެސްދޭ ޚާއްސަ ޕްރޮގްރާމެކެވެ. މި ޕްރޮގްރާމުގެ އެންމެ ތަފާތު އަދި ޚާއްސަކަމަކީ އެހެން ޕްރޮގްރާމްތަކާ ޚިލާފަށް މެހުމާނާއެކު އޭނާގެ ހަޔާތުގެ ބައިވެރިޔާ ނުވަތަ އާއިލާ މެންބަރުންވެސް ބައިވެރިވުމެވެ.
"އެވެރިން" މި ސިލްސިލާގެ ފުރަތަމަ އެޕިސޯޑް ޙާއްސަކޮށްފައިވަނީ ރާއްޖޭގައި ޕޭސްޓްރީއާއި ކޭކުއެޅުމުގެ ދާއިރާގައި އެފަދަ ދެވަނައެއްނެތް އައިމިނަތު ނަޝީދާ، މަޝްހޫރު ނަމުންނަމަ "ނަޝީ ކޭކްސް" އަށެވެ. ދެވަނަ އެޕިސޯޑް ހާއްސަކޮށްފައިވަނީ ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކާއި، އެމަނިކުފާނުގެ އަނބިކަނބަލުން އިލްހާމް ޙުސައިންއަށެވެ. ތިންވަނަ އެޕިސޯޑް ރާއްޖޭގެ ފުޓުބޯޅައިގެ އެންމެ އުހުގައި ނަންވިދާލާ ދެބެއިން ކަމަށްވާ އައްސަދު ޢަބްދުލްޣަނީ އާއި އަކުރަމް ޢަބަދުލްޣަނީއަށް ހާއްސަ ކޮށްފައިވާއިރު، ހަތަރުވަނަ އެޕިސޯޑް ހާއްސަކޮށްފައިވަނީ އޭޑީކޭގެ މެނޭޖިންގް ޑިރެކްޓަރ އަޙްމަދު އަފްއާލްގެ ދެމަފިރިކަނބަލުންނަށެވެ.
ސެލެބްރިޓީ ޓޯކްޝޯއެއްގެ ކޮންސެޕްޓަކަށް ގެނެސްދޭ މި ޕްރޮގްރާމަށް ތައްޔާރުކޮށްފައިވާ ސެޓަކީ މިފަހަރު ޕީ.އެސް.އެމްގެ ޓީވީ ޗެނަލަކުން ފެނިގެންދާނެ އެންމެ ބޮޑު އަދި އެންމެ ހިތްގައިމު އެއް ސެޓެވެ.