ވައިގެމަގުން ދިވެއްސަކު އެތެރެކުރަން އުޅުނު މަސްތުވާތަކެތި ކަސްޓަމްސްއިން އަތުލައިގެންފި

ވައިގެމަގުން ދިވެއްސަކު އެތެރެކުރަން އުޅުނު މަސްތުވާތަކެތި ކަސްޓަމްސްއިން އަތުލައިގެންފިއެވެ.

މޯލްޑިވްސް ކަސްޓަމްސް ސަރވިސުން ވިދާޅުވީ، މިތަކެތި އަތުލައިގަތީ މިމަހުގެ 9 ވަނަ ދުވަހު އަބޫދާބީން ރާއްޖެއައި ޢުމުރުން 39 އަހަރުގެ ދިވެހި ފަސިންޖަރެއްގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، އިތުރަށް ބަލައި ފާސްކުރުމުގެ ތެރޭގައި ކަމަށެވެ.

އެ ފަސިންޖަރުގެ ލަގެޖުގައި މަސްތުވާތަކެތި ހޯދާފައިވާއިރު، ފުރަތަމަ މަރުހަލާގައި ކަސްޓަމްސްއިން ތަހުލީލުކުރިއިރު، މަސްތުވާތަކެތީގެ ބާވަތެއްކަމަށްވާ ހެރޮއިން އަށްވަނީ ޕޮސިޓިވް ވެފައެވެ.

މި ތަކެތީގެ ބަރުދަނުގައި ޕެކިންއާއެކު ޖުމްލަ 109 ގުރާމް ހުރިއިރު، މިތަކެތީގެ މަގުމަތީ އަގަކީ 109000.00 (އެއްލައްކަ ނުވަހާސް) ދިވެހި ރުފިޔާކަމަށް ލަފާކުރެވޭ ކަމަށް ކަސްޓަމްސްއިން ވިދާޅުވެއެވެ.

ކަސްޓަމްސްއިން ވިދާޅުވީ، މި މައްސަލަ އިތުރަށް ތަހުޤީޤް ކުރުމަށް، އަތުލައިގަނެވުނު މަސްތުވާތަކެއްޗާއި ފަސިންޖަރު ދިވެހި ފުލުިހުންގެ ޚިދުމަތާއި ހަވާލުކޮށްފައިކަމަށެވެ.