ބޯހިޔާވަހިކަމާއި މަސްތުވާތަކެތީގެ މައްސަލަ ހައްލުކުރުމަށް ސަރުކާރާ ގުޅިގެން މަސައްކަތްކުރާނަން: މޭޔަރ

ބޯހިޔާވަހިކަމުގެ މައްސަލައަކީ މާލެއަށް ކުރިމަތި ވެފައިވާ އެންމެ ބޮޑު މައްސަލަ ކަމަށާއި މިމައްސަލަ ހައްލުކުރުމަށް ސަރުކާރާ ގުޅިގެން ވަރަށް ބޮޑަށް މަސައްކަތް ކުރައްވާނެ ކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ. މޭޔަރ މިހެން ވިދާޅުވީ މާލެ ސިޓީ ކައުންސިލުން ރައްޔިތުންނާއި ބައްދަލުކުރުމަށް ލޮނުޒިޔާރަތް ޕާކުގައި ބޭއްވި ބައްދަލުވުމުގައި ވާހަކަދައްކަވަމުންނެވެ.

މާލެ ސިޓި ކައުންސިލުން ރައްޔިތުންނާ ބައްދަލުކުރުމަށް ބޭއްވި ބައްދަލުވުމުގައި ވާހަކަދައްކަވަމުން މޭޔަރ އާދަމް އާޒިމް ވިދާޅުވީ ​​​​އިންސާނަކަށް ލިބެންޖެހޭ އަސާސީ ޙައްޤުތަކުގެ ތެރެއިން ބޯހިޔާވަހިކަމަކީ ވަރަށް މުހިއްމު ހައްޤެއްކަމަށެވެ. އެހެންނަމަވެސް ބޯހިޔާވަހި ކޮށްލާނެ ތަނެއް ނެތިގެން މާލޭގެ މަގުމަތީގައި، ނިދާ މީހުންގެ ޢަދަދު އެއް ދުވަހުން އަނެއް ދުވަހަށް އިތުރުވަމުން ދާކަމަށް ވިދާޅުވިއެވެ. އާޒިމް ވިދާޅުވީ މިއީ މާލެ ސިޓީއަށް މިއަދު ކުރިމަތިވެފައިވާ، ހިތާމަ ކުރަންޖެހޭ ބޮޑު މައްސަލައެއްކަމަށާއި މި މައްސަލަ ހައްލުކުރުމަށް ސަރުކާރާއި ގުޅިގެން މަސައްކަތް ކުރައްވާނެކަމަށެވެ.

" ވޭތުވެ ދިޔަ ސަރުކާރުން މިކަންހައްލުކުރުމަށް މަސައްކަތްތަކެއް ކޮށްދެއްވާފައިވާކަން ޝުކުރުވެރިކަމާއެކު ފާހަގަ ކުރަން. އަދި މިސަރުކާރުން ވެސް އެ މަސައްކަތް ކުރިޔަށް ގެންދާކަން އުފަލާއެކު ފާހަގަ ކުރަން. މާލެ ސިޓީގެ ލޮބުވެތި ރައްޔިތުންނަށް އަޅުގަނޑު ދޭން ބޭނުންވާ ޔަޤީން ކަމަކީ، މާލޭ ރައްޔިތުންނަށް ބޯހިޔާވަހިކަން ހޯދައިދިނުމަށް، މާލެ ސިޓީ ކައުންސިލުން ކުރަމުންދާ މަސައްކަތަށް، ހުއްޓުމެއް މަޑުޖެހުމެއް ނުގެނެސް ކުރިޔަށް ގެންދާނެކަން" އާޒިމް ވިދާޅުވިއެވެ.

​​​އާޒިމް އިތުރަށް ވިދާޅުވީ ބޯހިޔާވަހިކަމާ އެއްފަދައިން މަސްތުވާތަކެތީގެ މައްސަލަވެސް މާލޭގައި އޮތީ ހައްލުކުރަން އުނދަގޫ ހިސާބެއްގައި ކަމަށެވެ. އެހެންކަމުން މަސްތުވާތަކެތީގެ ވަބާއިން ސަލާމަތް ކުރުމަށް ގައުމީ ފެންވަރެއްގައި ސަރުކާރާއި ގުޅިގެން ސިޓީ ކައުންސިލުން މަސައްކަތް ކުރަން ފަށާނެ ކަމަށްވެސް އާޒިމް ވިދާޅުވިއެވެ.

މިބައްދަލުވުމުގައި ވާހަކަދައްކަވަމުން މޭޔަރު އާޒިމް ވިދާޅުވީ ރާއްޖޭގެ މިދިގު ތާރީޚުގައި ވެރިކަމުގެ އެކި ނިޒާމު ދިވެހިން ތަޖްރިބާކޮށްފައިވާކަމަށެވެ. އަދި ވެރިކަމުގެ ނިޒާމު ބަދަލުވެގެން އައިއިރު، ލިބުނު އެންމެ ބޮޑު ހިތްހަމަޖެހުމަކީ އެ ނިޒާމުގެ ތެރެއިން އުފަންވި ލާމަރުކަޒީ ނިޒާމު ކަމަށާއި، ލާމަރުކަޒީ ނިޒާމާއެކު ރައްޔިތުންނަށް ބަސްބުނުމުގެ ބާރު ލިބިފައިވާކަމަށް ވިދާޅުވިއެވެ.

" 14 އަހަރު، މި ނިޒާމަށް ރާއްޖެ ހިންގި އިރު، މާލެއާއި އަތޮޅުތެރެއިން ފެންނަން ހުރި، ފެންނަމުންދާ ތަރައްޤީއާއި، ކައުންސިލްތަކުން ރައްޔިތުންގެ މުހުތާދުތައް ފުއްދައިދޭ މިންވަރާއި މިނިޒާމުގެ ތެރެއިން ރައްޔިތުންނަށް ޖަވާބުދާރީވާ މިންވަރާއި ކުރީގެ ނިޒާމުތަކާ އަޅާ ކިޔުމަށް ފަހު، ގޮތެއް ނިންމުމަށް އަޅުގަނޑު ދޫކޮށްލާނީ ތިޔަ ޢިއްޒަތްތެރި ރައްޔިތުންގެ އަތްމައްޗަށް. ނަމަވެސް ޔަޤީންވާ އެއް ކަމެއް އަޅުގަނޑު ދަންނަވާލާނަން. ރައްޔިތުންނަށް ބަސްބުނުމުގެ ބާރު މިހާރު ލިބިފައިވާ ކަން. މިރޭވެސް ފެނިގެން މިދަނީ ރައްޔިތުންނަށް ހިޔާލު ފާލުކުރުމަށް ހުޅުވިފައިވާ މަގުތައް އޮތްކަން." މޭޔަރ ވިދާޅުވިއެވެ.

މޭޔަރގެ ވާހަކައިގައި މާލެ ސިޓީއަށް ކުރިމަތިވެފައިވާ ތަފާތު މައްސަލަތަކަށް އަލިއަޅުއްވާލައްވަމުން ވިދާޅުވީ މާލެ ސިޓީއަށް ކުރިމަތިވެފައިވާ މިމައްސަލަތައް ހައްލުކުރުމަށް ސަރުކާރާ ގުޅިގެން މަސައްކަތް ކުރައްވާނެކަމަށެވެ.