ސުލޫކީ މިންގަނޑެއް ހިފެހެއްޓިއްޖެނަމަ، އާންމުން މަޖިލީސް ބަލައިގަންނާނެ: އަސްލަމް
-
މަޖިލީހުގެ ބައެއްކަންކަން ހުރިގޮތުން އަސްލަމްގެ ކަންބޮޑުވުންތަކެއް
-
މެންބަރުން އަމަލުކުރަންޖެހޭ ސުލޫކީ މިންގަނޑެއް އޮތުމުގެ މުހިންމުކަން ފާހަގަކުރެއްވި
-
މަޖިލީހަށް އާންމުންގެ އިތުބާރު އޮންނަންޖެހޭކަމަށް ވިދާޅުވި
މަޖިލީހުގެ މެމްބަރުން މަޖިލީހުގެ ތަޅުމުގައި އަމަލު ކުރަންޖެހޭ ސުލޫކީ މިންގަނޑެއް މިހާރު މަޖިލީހުގައި ހިފެހެއްޓިފައިނެތްކަމަށާއި، މިކަން އިސްލާހް ކުރެވިއްޖެނަމަ އާންމުން ރައްޔިތުންގެ މަޖިލީސް ބަލައިގަންނާނެކަމަށް ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްޖެއެވެ.
މަޖިލީހުގެ ރައީސްކަމާއި ހަވާލުވެވަޑައިގަތުމަށްފަހު ބޭއްވެވި ފުރަތަމަ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އަސްލަމް ވިދާޅުވީ، ރައްޔިތުންގެ މަޖިލީހުގެ ރައީސެއްގެ ހައިޞިއްޔަތުން، މަޖިލީހަކީ ރައްޔިތުންގެ އިތުބާރު ލިބިފައިވާ ތަނެއްގެ ގޮތުގައި ހެއްދެވުމަށް ބޭނުންފުޅުވާކަމަށެވެ. އަދި ރައްޔިތުންގެ މަޖިލީހަކަށް ވާނީ އެ މަޖިލީހަކަށް ރައްޔިތުންގެ ފުރިހަމަ އިތުބާރު އޮތުމުން ކަމުގައި އަސްލަމް ވަނީ ވިދާޅުވެފައެވެ.
އެހެންނަމަވެސް މަޖިލީހުގެ ބައެއްކަންކަން ހިނގަމުންދާ ގޮތުން ބައެއްފަހަރު ޙަޤީޤަތާއި ޚިލާފަށް އެންމެ ރަނގަޅު ނޫން ގޮތަށް، މުޅި މަޖިލީހުގެ ކަމެއްގެ ގޮތުގައި އެކިކަހަލަ ބަދުނާމުތައް ކުރެވޭކަމަށް އަސްލަމް ވިދާޅުވިއެވެ. އަދި މިއިން ކޮންމެ ބަދުނާމަކީ ހަމައެކަނި މަޖިލީހުގެ މެމްބަރުންގެ ބޮލުގައި އެޅޭ ބަދުނާމެއް ނޫންކަމަށާއި، އެއީ މުޅި ރައްޔިތުންގެ މަޖިލީހުގެ ގަދަރާއި ހައިބަތައް އުނިކަން އަންނަފަދަ ތުޙުމަތުތަކެއްގެ ގޮތުގައި އަސްލަމް ފާހަގަކުރެއްވިއެވެ.
އަސްލަމް ވިދާޅުވީ، އެންމެ ބޮޑަށް ފާހަގަކުރެވޭ އެއްކަމަކީ މަޖިލީހުގެ މެމްބަރުން އަމަލު ކުރަންޖެހޭ ސުލޫކީ މިންގަނޑެއް ނެތުން ކަމުގައެވެ. އަދި މަޖިލީހުގެ ތަޅުމުގައި ޖަލްސާ ހިންގާނެ ހަރުދަނާ އުޞޫލުތަކެއް ޤާއިމުކޮށް ތަންފީޒު ކުރެވެމުން ނުދާކަމުގައެވެ. އެހެންކަމުން އެއީ މަޖިލިސް އިތުރަށް ހަރުދަނާ ކުރުމަށް ކުރަންޖެހޭކަމެއްކަމަށް އަސްލަމް ވިދާޅުވިއެވެ. އަދި މިބަދަލުތައް ގެނެވޭނީ މަޖިލީހުގެ މެމްބަރުންގެ ފުރިހަމަ އެއްބާރުލުން ލިބިގެން ކަމުގައިވެސް އަސްލަމް ފާހަގަކުރެއްވިއެވެ.
"އެންމެ ބޮޑަށް ފާހަގަކުރެވޭ އެއްކަމަކީ މަޖިލީހުގެ މެމްބަރުން އަމަލުކުރަންޖެހޭ ސުލޫކީ މިންގަނޑެއް ނެތުން. މަޖިލީހުގެ ތަޅުމުގައި ޖަލްސާ ހިންގޭނޭ އުޞޫލުތަކެއް ތަންފީޒް ކުރެވެމުން ނުދާކަން. އެއީ އިތުރަށް ހަރުދަނާ ކުރަން ޖެހޭ ކަމެއް." އަސްލަމް ވިދާޅުވިއެވެ.
އަސްލަމް ވިދާޅުވީ ކުރިއަށް އޮތް ތަނުގައި މަޖިލީސް ހަރުދަނާ ގޮތެއްގައި ހިންގިދާނޭ ވަރުގަދަ އުޞޫލްތަކެއް ޤާއިމްކުރެވިއްޖެ ކަމުގައިވާނަމަ ރައްޔިތުންގެ މަޖިލީހަކީ އާންމުން ބަލައިގަންނާނޭ ރަނގަޅު ތަނެއްގެ ގޮތުގައި އުންމީދު ކުރެވޭ ކަމުގައެވެ. އަދި އެމަގުން މަސައްކަތް ކުރައްވާނެކަން އަސްލާމް ފާހަގަކުރެއްވިއެވެ.