38 ދުވަހުގެ ތެރޭގައި ރާއްޖެ ވަށާ ކަޓަމަރާނެއްގައި ބުރެއް ޖެހުމަށް ޢަބްދުލްޣަފޫރު ޢަލީ ގައްބެ ކުރި ދަތުރު ނިންމާލުން ވެގެންދިޔައީ ގިނަ ބަޔަކަށް ހިނިތުންވުން ގެނެސްދިން ކަމަކަށެވެ. ރާއްޖޭ ޓޫރިޒަމް ޕްރޮމޯޓް ކުރުމަށް ޚާއްޞަކުރެވުނު މި އިއެވެންޓަށް ގިނަ ބައެއްގެ ސަމާލުކަން ލިބުނުއިރު ޢަބުދުލްޣަފޫރު ޢަލީ ގައްބެ ދިވެހިންނަށް އެނގިގެންދިޔައީ މިހިސާބުންނެވެ. މިދަތުރުގައި ގައްބެ ވަނީ ރާއްޖޭގެ 50 ރަށަކަށް ރިޔަލު ކަނދުގައި ދަތުރުކޮށްފައެވެ. ފުންމިނާއި އޮޔާއި ވައިގެ ބާރުމިނާއި މިސްރާބު ވަޒަންކުރުން ދަތި މާސިންގާ ކަނޑުތަކުގެ ބިޔަ ރާޅުތަކުގެ ތެރޭގައި ދަތުރު ކުރުމަށްފަހުވެސް ގައްބެގެ ފަރާތުން ފެނުނީ ހިނިތުންވުމެވެ.
ގައްބެ ބުނީ މުޅި ދަތުރުގައި ވެސް އޭނާ އެންމެ ބޮޑު އިސްކަމެއް ދިނީ ފަސް ވަގުތު ނަމާދުކުރުމަށް ކަމަށެވެ. ދުވާލުގެ ގިނަ ނަމާދުތައް ކުރީ ކަނޑުމަތީގަޔާއި، ފަޅު ރަށްރަށުގައި ކަމަށް ގައްބެ ބުންޏެވެ.
" ހުރިހާ ނަމާދަށްވެސް އިސްކަން ދިނިން.. އަބަދުވެސް ބަލަން ނަމާދު ވަގުތަށް ކުރަން.. މިއީ ލިބޭ ހިތްހަމަޖެހުމަކީވެސް.. އަދި ރައްކާތެރިކަމަކީވެސް." ގައްބެ ބުންޏެވެ.
ގައްބެ ދަތުރުގައި އެތައް ބަޔަކާ ދިމާވިއެވެ. ރާއްޖޭގެ އުތުރާއި ދެކުނުންނެވެ. ކޮންމެ ރަށަކުންވެސް ގައްބެއަށް ކިއީ ހޫނު މަރުޙަބާއެކެވެ. ޅަ ކުދިންނަށް ގައްބެ ވެގެންދިޔައީ "ހީރޯ" އަކަށެވެ. ވާނީވެސް މިހެންނެވެ. އަބަދުވެސް މިފަދަ ދަތުރުތަށް ނުވަތަ މިކަހަލަ ތަފާތުން ކަންކަން ކުރަމުން އައީ ބެރުގެ ފަރާތްތަކުންނެވެ. މިފަދަ ކަމެއް ދިވެއްސަކު ތަޖުރިބާކުރުން ވެގެންދިޔައީ އެތައް ބަޔަކަށް ލިބުނު ޢިބުރަތަކަށެވެ. ފިލާވަޅަކަށެވެ.
"މިއީ ރީތި ޤައުމެއް.. ޗުއްޓީ ހޭދަކުރަން ބޭރު ތަންތާކަށް ނޫން ދާންވީ.. މި ރީތި ރާއްޖޭގެ ޤުދުރަތީ ރީތިކަމާއި ރީތި އާދަތައް ހަމަލޮލުން ދެކި ތަޖުރިބާކުރުމުން ހާދަ ބޮޑު އުފަލެއް ލިބިއްޖޭ.." ގައްބެށް ލިބުނު އުފާ ޙިއްޞާކުރަމުން ބުންޏެވެ. img:http://s3.psmnews.mv/images/660x400/14574998539586.jpg|ގައްބެ ކަޓަމަރާނުގައި - ފޮޓޯ ޕީއެސްއެމް
ރާއްޖޭގެ ރައްޔިތުންނާއެކު ގައްބެ ބެލީ އަބަދުވެސް ވަގުތު ހޭދަކުރެވޭތޯއެވެ. ގައްބެއާއެކު ފޮޓޯ ނެގުމަށް ކެތްމަދުވެފައިވާ އެއްވެސް މީހަކަށް ގައްބެ ފުރަގަހެއް ނުދެއެވެ. އެހެންކަމުން ގައްބެ ބެލީ ކޮންމެ ރަށަކަށް ދިއުމުގެ ކުރިންވެސް ނަމާދު ވަގުތު ޖެހިއްޖެނަމަ ކަނޑުމަތީގައިވިޔަސް ނަމާދު ކޮށްލާށެވެ.
" ރަށް ރަށުގެ މީހުންނާއެކު ވަރަށް ގިނަ ވަގުތު ހޭދަކުރިން.. އެހެންވެ ފުރަތަމަވެސް ބެލީ ނަމާދު ގަޑި ޖެހުނީމަ އެރަށަކަށް ލެފުމުގެ ކުރިން ނަމާދުކޮށްލަން. އެހެން ނޫންނަމަ ނަމާދު ވަގުތުގައި ނުކުރެވިދާނެ. އެކަމަށް ވަރަށް ސަމާލުވިން" ގައްބެ ބުންޏެވެ.
ދަތުރު ނިމުމާއެކު ގައްބެއަށް މަރުޙަބާކިއުމަށް މާލެއިންވެސް އޮތީ ތައްޔާރުވެއެވެ. އަންގާރަ ދުވަހު ހަވީރު ހަތަރެއް ޖަހާއިރަށް ގައްބެ މާލެ އަންނަތަން ބަލަން ގިނަ ބަޔަކު ޢިއްޒުއްދީން ފާލަމަށް ދިޔައެވެ. ގައްބެގެ ދަތުރުގައި ގައްބެއާއެކު ރާއްޖޭގެ ބައެއް ސަރަޙަށްދުތަކަށް ދަތުރުކުރި އެލީއާ ކުންފުނީގެ އެމްޑީ އަލާއު ޢަލީއާ އަޅުގަނޑުމެންވެސް ވާހަކަ ދައްކާލީމެވެ. އަލާއު ފުރަތަމަވެސް ގައްބެ ސިފަކުރެއްވީ ނަމާދަށް އިސްކަންދޭ އަދި ޒުވާނުންނަށް މިސާލެއްގެ ގޮތުގައެވެ.
" ތަފާތު މީހެއް އެއީ.. މާލެ އަންނައިރުވެސް ގިނަ ބަޔަކާ ދިމާވާނެކަން އިނގޭތީ އެއަކީ ކަނޑުމަތީގައި ޢަޞުރު ނަމާދުކޮށްލައިގެން.. ވަރަށް ބަލާނެ ނަމާދަށް.. ފިނޮޅަކަށްވެސް މަޑުކޮށްލަފާނެ ނަމާދުކޮށްލަން. މާލެ އާދެވުމުންވެސް ފުރަތަމަވެސް ކުރީ ޝުކުރުގެ ސަޖިދައެއް" އަލާއު ވިދާޅުވިއެވެ.
އަލާއު ފާހަގަކުރެއްވިހެން ގައްބެއަކި މިސާލެކެވެ. ގައްބެއަށް ސަޕޯޓްކުރުމަކީ ގައްބެ އުޅޭހެން އުޅުމެވެ. އޭނާގެ ރަނގަޅު ސިފަތައް ބަލައިގަތުމެވެ. ފުރަތަމަ އިސްކަންދޭންވީ ނަމާދަށެވެ. ކޮޕީ ކުރަންވީ މިފަދަ ރީތި އާދައެވެ. ގައްބެ ބުނިހެން ކޮންމެ ކަމެއް ކުރިޔަސް ލިބޭނެ އެންމެ ބޮޑު އުފަލަކަށް ވާން ވާނީ ނަމާދެވެ. ކުރާ މަސައްކަތުގެ ބަރަކާތަކީ އެއީއެވެ.