މި މަހުގެ 19 ވަނަ ދުވަހުގެ ނިޔަލަށް މަސްވެރިންނަށް ބައި ބިލިއަނަށްވުރެ ގިނަ ރުފިޔާ މިފްކޯއިން ދޫކޮށްފައިވާކަމަށް އެކުންފުނީގެ ތަފާސްހިސާބުތަކުން ދައްކައިފިއެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު ބޮޑު ތަނުން އިތުރު ޢަދަދެކެވެ.
މިދިޔަ އަހަރަކީ މިފްކޯގެ ތާރީޚުގައިވެސް އެ ކުންފުނިން އެންމެ ގިނަ ޢަދަދަކަށް މަސްވެރިންގެ އަތުން މަސްގަނެ މަސްވެރިންނަށް ފައިސާ ދޫކޮށްފައިވާ އަހަރެވެ. ނަމަވެސް މިދިޔަ އަހަރާއި އަޅާބަލާއިރު މިއަހަރު މި ޢަދަދު ވަނީ އިތުރުވެފައެވެ.
މިފްކޯއިން އާންމުކޮށްފައިވާ ތަފާސްހިސާބުތައް ދައްކާގޮތުން ޖަނަވަރީ 1 ވަނަ ދުވަހުން މިމަހުގެ 19 ވަނަ ދުވަހާ ހަމައަށް މިފްކޯއިން ވަނީ މަސްވެރިންގެ އަތުން 34،082 ޓަނުގެ މަސް ގަނެފައެވެ. 2022 ވަނަ އަހަރުގެ މި މުއްދަތުގައި މިފްކޯއިން ގަނެފައިވާ މަހުގެ ޢަދަދަކީ 26،694 ޓަނުގެ މަހެވެ. އެހެންކަމުން މިއީ މިދިޔަ އަހަރާ އަޅާބަލާއިރު %28 އިތުރު ޢަދަދެކެވެ.
މަސްވެރިންގެ އަތުން ގަނެފައިވާ މަހުގެ ޢަދަދު އިތުރުވެފައިވާއިރު މަސްވެރިންނަށް ދޫކޮށްފައިވާ ފައިސާގެ ޢަދަދުވެސް ވަނީ އިތުރުވެފައެވެ. އެގޮތުން މިއަހަރުގެ މިހާތަނަށް ބައި ބިލިއަނާއި ގާތްކުރާ ޢަދަދަކަށް މަސްވެރިންނަށް ވަނީ ފައިސާ ދޫކޮށްފައެވެ. އެއީ މުޅި ޖުމްލަ 567،035،746 ރުފިޔާއެވެ. 2022 ވަނަ އަހަރު މި އަދަދު އުޅުނީ 430،523،358 ރުފިޔާގައެވެ.
ޕީއެސްއެމް ނިއުސްއަށް މައުލޫމާތުދެއްވަމުން މިފްކޯގެ ސީ.އީ.އޯ އިސްމާޢީލް ފައުޒީ ވިދާޅުވީ، މިފްކޯގެ 29 އަހަރުގެ ތަރީޚުގައިވެސް މިދިޔަ އަހަރަކީ އެ ކުންފުނިން އެންމެ ގިނަ ޢަދަދެއްގެ މަސްގަނެ އެންމެ ބޮޑު ޢަދަދެއް މަސްވެރިންނަށް ދޫކުރި އަހަރަށްވާއިރު މިދިޔަ އަހަރުގެ މިހާތަނަށް ބަލާއިރު މިއަހަރު މަސްގަނެފައިވާ ޢަދަދު އިތުރުވެފައިވާ ކަމަށެވެ.
ރާއްޖޭގެ މަސްވެރިކަމުގެ ސިނާއަތު ކުރިއެރުވުމަށް މި ސަރުކާރުން ކަނޑައަޅާފައިވާ ލަނޑުދަނޑިތައް ޙާޞިލުކުރަން މަސްވެރިންނާއެކު މިފްކޯއިން މަސައްކަތްކުރަމުންދާނެކަމުގެ ޔަޤީންކަން އަބަދުވެސް ދޭކަމަށް ފައުޒީ ވިދާޅުވިއެވެ.
"ފާއިތުވި 29 އަހަރުގެ ތެރޭގައި މިދިޔަ އަހަރަކީ މިފްކޯއިން ތަފާތު ދެއްކި އަހަރެއް. އެއީ އަޅުގަނޑުމެން 63000 މެޓްރިކް ޓަން ގަނެފައި މަސްވެރިންނަށް ދިން އަދަދު 1 ބިލިއަން ފަހަނަ އަޅައި ދިޔަ. މިއަހަރު މިހާހިސާބަށް އައިއިރު 34000 ޓަނު ގަނެވިއްޖެ. އެހެންވީމަ މިދިޔަ އަހަރުގެ ޢަދަދު އެއީ ގާތްގަނޑަކަށް ހާފް އަޅުގަނޑުމެންނަށް ގަނެވުނީއޭ. މިހާރު މިފްކޯގައި ހުރި ވަސީލަތް ތަރައްޤީކުރުމުން އަޅުގަނޑުމެންނަށް ލިބުނު ޔަޤީންކަމަކީ މިފްކޯގެ މުވައްޒަފުންނާއި މަސްވެރިންނާއިއެކު މިކުރާ ދަތުރަކީ އިރާދަކުރެއްވިއްޔާ މަސްވެރިކަމުގެ ސިނާއަތައް އިތުރު ކުރިއެރުން ގެނުވޭނެކަމެއް" އިސްމާއިލް ފައުޒީ ވިދާޅުވިއެވެ.
މިފްކޯގެ ތަފާސްހިސާބުތައް ދައްކާގޮތުން މިއަހަރު މިފްކޯއަށް އެންމެ ގިނަ ޢަދަދަކަށް މަސް ގަނެފައިވަނީ ކޫއްޑޫ ފިޝަރީޒް ކޮންޕްލެކްސްއަށެވެ. އެއީ މުޅި ޖުމްލަ 25،887 މެޓްރިކް ޓަނެވެ. މިދިޔަ އަހަރުގެ މި މުއްދަތުގައި ކޫއްޑޫން ގަނެފައިވަނީ 20،542 މެޓްރިކް ޓަނުގެ މަހެވެ. އެހެންކަމުން މިއީ %26 އިތުރު ޢަދަދެކެވެ.
ދެން އެންމެ ގިނައިން މަސް ގަނެފައިވަނީ ފެލިވަރު ފިޝަރީޒް ކޮންޕްލެކްސްއިންނެވެ. އެއީ 4،298 މެޓްރިކް ޓަނެވެ. މިދިޔަ އަހަރު މި ޢަދަދު އުޅުނީ 3،655 މެޓްރިކް ޓަނުގައެވެ. އެހެންކަމުން މިއީ %18 އިތުރުވުމެކެވެ.
އައްޑޫ ފިޝަރީޒް ކޮންޕްލެކްސްއިން މިއަހަރުގެ މިހާތަނަށް ގަނެފައިވަނީ 3،897 މެޓްރިކް ޓަނެވެ. މިދިޔަ އަހަރު މި ޢަދަދު އުޅުނީ 2،498 މެޓްރިކް ޓަނުގައެވެ. އެހެންކަމުން މިއީ %56 އިތުރުވުމެއްކަމަށް މިފްކޯގެ ތަފާސްހިސާބުތަކުުން ދައްކައެވެ.