ބިޒްނަސް ސެންޓަރ ކޯޕަރޭޝަން، ބީސީސީ ހިންގާ "އެސްއެމްއީ ހަބް"ގެ 2 ވަނަ ފަންގިފިލާގައި ކުއްޔަށް ދޫކުރާ ކިއޮސްކްތަކަށް އެދުމުގެ ފުރުސަތު ވިޔަފާރިތަކަށް ހުޅުވާލައިފިއެވެ.
ބީސީސީން ތަރައްޤީކޮށްފައިވާ އެސްއެމްއީ ހަބް ރަސްމީކޮށް ހުޅުވާފައިވަނީ މިދިޔަ ޑިސެމްބަރ މަހުގެ 15 ވަނަ ދުވަހުއެވެ. މިހާރު ހުޅުވައި ޙިދުމަތް ދެމުން އަންނަނީ މި ހަބްގެ އެންމެ ތިރީ އަދި ފުރަތަމަ ފަންގިފިލާއެވެ.
މިތަނުގެ އެންމެ ތިރީގައި ހުންނާނީ ކެފޭއަކާއި، ގަހާއި، ދިވެހި ލިޔުންތެރިންގެ ފޮތްތައް ވިއްކޭނެ ކުޑަ ބުކްޝޮޕެއް ކަހަލަ ތަނެކެވެ. އަދި އެންމެ ފުރަތަމަ ފަންގިފިލާ ޚާއްސަކޮށްފައި ވަނީ ކާއެއްޗެތި ތައްޔާރުކުރާ ފަރާތްތަކަށެވެ. މިފަންގިލާގައި ޒަމާނީ ފެންވަރަށް ތަރައްޤިކޮށްފައިވާ 19 ކިއޮސްކް ހުރިއިރު، ކޮންމެ ކިއޮސްކެއްގައިވެސް ދިވެހި ވިޔަފާރިވެރިން ދަނީ ހަރަކާތްތެރިވަމުންނެވެ.
ބިސީސީއިން މިހާރު ހުޅުވުމަށް ތައްޔާރުވެފައިވަނީ އެސްއެމްއީ ހަބްގެ 2 ވަނަ ފަންގިފިލާއެވެ. އެ ކުންފުނިން ބުނީ މިތަން ޙާއްސަކޮށްފައިވާނީ އަންނައުނާއި، އާރޓް އެންޑް ކްރާފްޓްގެ އިތުރުން އެކްސެސަރީސް ވިއްކާ ވިޔަފާރިތަކަށެވެ. 2 ވަނަ ފަންގިފިލާގައި ޖުމްލަ 10 އިކޮސްކް ހުންނައިރު މިތަނުން 3 ކިއޮސްކް ޙާއްސަކުރަނީ އަންނައުނު ވިއްކާ ވިޔަފާރިތަކަށެވެ. އަދި އަނެއް ކިއޮސްކްތައް ޙާއްސަކޮށްފައިވަނީ އާރޓް އެންޑް ކްރާފްޓް އަދި އެކްސެސަރީސްގެ ވިޔަފާރިތަކަށެވެ.
މީގެއިތުރުން މި ފަންގިފިލާގައި މިނީ ސިނަމާއަކާއި، ސެލޫންއަކާއި، ގޭމިން އޭރިއާއެއްވެސް ހުންނާނެކަމަށް ބީސީސީއިން ބުނެއެވެ. އަދި ހުނަރުވެރިންގެ އާރޓް ޑިސްޕްލޭ ކުރާނެ ތަނެއްވެސް ހުންނާނެއެވެ.
ބީސީސީއިން މިހާރު ވަނީ "އެސްއެމްއީ ހަބް"ގެ 2 ވަނަ ފަންގިފިލާއިން ގާމަންޓް، އާޓްސް އެންޑް ކްރާފްޓްސް އަދި އެކްސެސަރީސް ވިއްކާ ވިޔަފާރިތަކަށް ކިއޮސްކްތައް ކުއްޔަށް ހިފުމަށް ހުޅުވާލާފައެވެ. މިމަހުގެ 4 އިން 16 ގެ ނިޔަލަށް މި ފުރުސަތު އޮންނާނެކަމަށް އެ ކުންފުނިން ބުނެއެވެ.
ބީސީސީއިން ބުނީ މިފަދަ ހަބެއް ޤާއިމުކުރުމުގެ މައިގަނޑު މަގުސަދަކީ އެކި ދާއިރާތަކުން ވިޔަފާރި ކުރައްވާ ފަރާތްތަކަށް މާކެޓް އެކްސެސް ހޯދައިދިނުމާއި، މި ވިޔަފާރިތައް އިތުރަށް ފުޅާ ކުރުމަށް އެހީތެރިވެދިނުންކަމަށެވެ.
މި ކިއޮސްކުތައް ކުއްޔަށް ހިފުމަށް ޝައުގުވެރިވެލައްވާ ފަރާތްތަކުން އެކަމަށް ޙާއްސަކޮށްފައިވާ ފޯމު ފުރިހަމަކުރެއްވުމަށްފަހު [email protected] އަށް އީމެއިލް ކުރެވޭނެއެވެ. އެޕްލިކޭޝަން ފޯމުތައް ބަލައިގަންނާނީ ހަމައެކަނި އީމެއިލް މެދުވެރިކޮށްކަމަށް ބީސީސީއިން ވަނީ ބުނެފައެވެ.