އަރަބިއަން ޓްރެވަލް މާކެޓް (އޭޓީއެމް)ގައި ދިވެހިރާއްޖެ ޕްރޮމޯޓުކުރުމަށް ފަރުމާކޮށްފައިވާ ސްޓޭންޑަށް"'ބެސްޓް ސްޓޭންޑް ފީޗަރ" އެވޯޑް ލިބިއްޖެއެވެ. މި އެވޯޑް ދިވެހިރާއްޖެއިން ކާމިޔާބުކޮށްފައި މިވަނީ ދުނިޔޭގެ ފަތުރުވެރިކަމުގެ ބޮޑެތި މަންޒިލްތަކުގެ ސްޓޭންޑްތަކާ ވާދަކޮށްގެންނެވެ.
މި އެވޯޑަށް ދީފައިވަނީ ސްޓޭންޑްތަކަށް ޒިޔާރަތްކުރި ނަން ހާމަނުކުރާ ޖަޖިން ޕެނަލެއް މެދުވެރިކޮށެވެ. މި އެވޯޑަކީ އެންމެ ތަފާތު ސިފަތައް ހުރި، އަދި ފެއަރއަށް ޒިޔާރަތްކޮށްފައިވާ ފަރާތްތަކުން، އެ ފަރާތްތައް އެންމެ ޝައުގުވެރިވާ ފަދަ ތަޖުރިބާތައް ހުރިކަމަށް ފާހަގަކޮށްފައިވާ ސްޓޭންޑަށް ހުށަހަޅާފައިވާ އެވޯޑެކެވެ. މިއީ އޭޓީއެމް 2023 ގައި މި އެވޯޑްތައް ތަޢާރަފްކުރި ފުރަތަމަ ފަހަރެވެ.
ދުބާއީގައި ކުރިއަށްދާ މި ފެއަރގައި ދިވެހިރާއްޖެ ޕްރޮމޯޓްކުރަމުން ދަނީ ރާއްޖޭގެ ޖަޒީރާ ރަށްތަކުގެ ރީތިކަން ރަމްޒުކޮށްދޭ ތަފާތު ސިފަތައް އެކުލެވޭގޮތަށް، އަދި ސްޓޭންޑަށް ޒިޔާރަތްކުރާ ފަރާތްތަކަށް ރާއްޖޭގެ ރީތިކަން، ފުރިހަމައަށް އިހުސާސްކުރެވޭ ގޮތަށް ފަރުމާކޮށް ބިނާކޮށްފައިވާ ސްޓޭންޑެއްގައެވެ. ފަތުރުވެރިކަމުގެ ޑެސްޓިނޭޝަންއެއްގެ ގޮތުގައި ރާއްޖެ ތަފާތުވާ ގިނަ ސިފަތަކެއް މި ސްޓޭންޑުގެ ޑިޒައިންގައި ވަނީ ހިމަނާފައެވެ.
އޭޓީއެމްގެ ރާއްޖޭގެ ސްޓޭންޑްގައި 90 ކޯ އެގްޒިބިޓަރ ކައުންޓަރާއި، 53 ބީ2ބީ މީޓިންގ މޭޒު ހިމެނެއެވެ. ދިވެހިރާއްޖޭގެ ސްޓޭންޑުގައި، ރާއްޖެއިން ފަތުރުވެރިންނަށް ލިބެން ހުރި ތަފާތު ތަޖުރިބާތަކާ ގުޅޭ ހަރަކާތްތަކާއި، ރާއްޖޭގެ ރީތި މަންޒަރުތައް ދައްކުވައިދޭ އެލްއީޑީ ސްކްރީނެއް ވަނީ ބަހައްޓާފައެވެ. ރާއްޖޭގެ ސްޓޭންޑުގައި ހަދާފައިވާ 360 ޑިގްރީ ވީޑިއޯ ބޫތުގައި ވީޑިއޯ ނެގުމަށް ސްޓޭންޑަށް ޒިޔާރަތްކުރާ ފަރާތްތައް ވަރަށް ބޮޑަށް ޝައުގުވެރިކަން ފާޅުކޮށްފައިވާކަމަށް އެމްއެމްޕީއާރުސީން ބުނެއެވެ.
އަރަބިއަން ޓްރެވަލް މާކެޓަކީ މެދުއިރުމަތީގެ އިންބައުންޑް އައުޓްބައުންޑް ޓްރެވަލް އިންޑަސްޓްރީގެ ލީޑިންގ އިވެންޓެވެ. ދުބާއީ ވޯލްޑް ޓްރޭޑް ސެންޓަރުގައި ކުރިއަށްދިޔަ މި ފެއަރގައި އެމްއެމްޕީއާރުސީއިން މި އަހަރު ބައިވެރިވެފައި ވަނީ މިހާތަނަށް މި ފެއަރގައި ރާއްޖެއިން ބައިވެރިވި އެންމެ ބޮޑު ވަފުދާ އެކުއެވެ.
ޓްރެވަލް އަދި ޓޫރިޒަމް ދާއިރާގެ 90 ކުންފުންޏެއް ތަމްސީލުކުރާ 200އަށް ވުރެ ގިނަ ޕާޓްނަރުން އެމްއެމްޕީއާރުސީ އާއެކު އޭޓީއެމް 2023 ގައި ވަނީ ރާއްޖެ ޕްރޮމޯޓްކޮށްފައެވެ. މިއީ ދުނިޔޭގެ އެންމެ ޝަރަފުވެރި ފަތުރުވެރިކަމުގެ ލަގަބު "ވޯލްޑްސް ލީޑިންގ ޑެސްޓިނޭޝަން"ގެ މަގާމު ޖެހިޖެހިގެން ތިން އަހަރު ކާމިޔާބު ކުރުމަށްފަހު ރާއްޖެއިން އޭޓީއެމްގައި ބައިވެރިވާ ފުރަތަމަ ފަހަރެވެ.