ވާރޭނުވެހި ގިނަ ދުވަސްވުމުގެ ސަބަބުން ފެން ލިބުން ދަތިވެފައިވާ ގދ.ހޯނޑެއްދޫއަށް ބޭނުންވާ ފެން ފޯރުކޮށްދެއްވަމުން ގެންދަވާކަމަށް ފެނަކަ ކޯޕަރޭޝަން ލިމިޓެޑުން ވިދާޅުވެއްޖެއެވެ.
ހޯނޑެއްދޫ ވާރޭ ނުވެހާތާ ގާތްގަނޑަކަށް ދެމަހެއްހާ ދުވަސްވުމުން އެ ރަށުގެ ބޯފެން ލިބުން ދަތިވެ، އެ ރަށުން ކައުންސިލު ވަނީ ފެން ހަދިރާކުރަންވެސް އެދިފައެވެ.
ހޯޑެއްދޫ ކައުންސިލުން ވިދާޅުވީ ބޯފެން ހަދިޔާކުރުމަށް އެދެން ޖެހުނު މައިގަނޑު ސަބަބަކީ ވާރޭ ނުވެހި ގިނަ ދުވަސްވެފައިވުމުގެ ސަބަބުން އާންމު ތާނގީތަކުންނާއި ބައެއް ގެތަކުން ފެން ހުސްވުމުންކަމަށެވެ. އަދި ވާރޭ ފެން ހުރި ގޭގެއިންވެސް ވާރޭ ފެން ހުސްވަމުންދާކަމަށްވެސް ކައުންސިލުން ވިދާޅުވެއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން ފެނަކަ ކޯޕަރޭޝަންގެ މީޑިއާ އޮފިޝަލް ވިދާޅުވީ ހޯނޑެއްދޫގެ އިތުރުން ފެނަށް ޖެހިފައިވާ އިތުރު ރަށްތަކަށްވެސް ފެން ފޯރުކޮށްދިނުމުގެ މަސައްކަތް ކުރަމުންދާކަމަށެވެ. އަދި ހޯނޑެއްދޫ ކައުންސިލުގެ އެދުމުގެ މަތިން ދިޔަ ބުރާސްފަތި ދުވަހު އެރަށަށް 20 ޓަނުގެ ފެން ފޯރުވައިދެއްވާފައިވާކަމަށްވެސް ފެނަކައިން ވިދާޅުވެއެވެ.
ހޯނޑެއްދޫ ކައުންސިލުގެ ރައީސް ހުސައިން ވާރިޝް ޕީއެސްއެމް ނިއުސްއައް މައުލޫމާތު ދެއްވަމުން ވިދާޅުވީ މިވަގުތަށް ބޭނުން ކުރެވޭވަރަށް ރަށުގައި ފެން އެބަހުރިކަމަށެވެ. ފެނަކައިގެ އިތުރުން ޖަމުއިއްޔާއަކުންވެސް 300 ފެން ކޭސް ހަދިޔާކޮށްފައިވާކަމަށް ކައުންސިލްގެ ރައީސް ވިދާޅުވިއެވެ.
މި އެޕްރީލް މަހަކީ، މިއަހަރު ރާއްޖެއަށް ކުރިމަތިވާނެ އެއްމެ ހޫނުގަދަ ދުވަސްވަރެވެ.