ކުރިއަތް އޮތް ރިޔާސީ އިންތިޚާބަށް ރާއްޖެއިން ބޭރުން އަންނަ ފަރާތްތަކަށް ވިސާ ހަމަޖެއްސުމާއި ގުޅޭގޮތުން އިލެކްޝަންސް ކޮމިޝަނާއި، މޯލްޑިވްސް އިމިގްރޭޝަނުން މަޝްވަރާކޮށްފިއެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވީ، ސެޕްޓެމްބަރު މަހުގެ 9ގައި އޮންނަ ރިޔާސީ އިންތިޚާބަށް ރާއްޖެއިން ބޭރުން ވަޑައިގަންނަވާ ފަރާތްތަކަށް ވިސާގެ އިންތިޒާމުތައް ހަމަޖެއްސުމާ ގުޅޭގޮތުން ކޮންޓްރޯލަރ ޖެނެރަލް އޮފް އިމިގްރޭޝަން، މުޙައްމަދު އަޙްމަދު ޙުސައިނާއެކު ބައްދަލުކުރައްވާ މަޝްވަރާކުރައްވާފައިވާކަމަށެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކޮށްފައިވަނީ ވިސާ ލިބުމަށް ފަސޭހަ ގޮތްތަކެއް ހޯދައި ދިނުމާއި ގުޅޭގޮތުން ކަމަށް ހަބީބް ވިދާޅުވިއެވެ.
ރިޔާސީ އިންތިޚާބު އޮބްޒާވްކުރަން ބޭރުން އަންނަ މޮނީޓަރުންނާއި އޮބްޒާވަރުންނަށް އެޕްލިކޭޝަން ފޯމް ހުށަހެޅުމަށް އީސީން މިހާރު ވަނީ ހުޅުވާލާފައެވެ. އެ މުއްދަތު ހަމަވާނީ ޖުލައި މަހުގެ 25އަށެވެ އީސީން ވިދާޅުވީ މިހާތަނަށް އެއްވެސް ފަރާތަކުން އެޕްލިކޭޝަން ފޯމް ހުށަހަޅާފައިނުވާ ކަމަށެވެ.
މި މަޝްވަރާގެ ސަބަބުން މި ފަސޭހައިން ވިސާގެ ކަންކަން ހަމަޖެހިގެންދާނެކަން އީސީން ފާހަގަކުރައްވައެވެ. އިލެކްޝަންސް ކޮމިޝަނުން ވިދާޅުވީ ރިޔާސީ އިންތިހާބަށް އީސީއިން ދައުވަތު ދީގެން 30އަށް ވުރެ ގިނަ ފަރާތުން ރާއްޖެއަށް އައުމަށް ހަމަޖެހިފައިވާކަމަށެއެވެ.
ރިޔާސީ އިންތިޚާބަށް ވާންޖެހޭ ތައްޔާރީތައް އިލެކްޝަންސް ކޮމިޝަނުން މިހާރު ވަނީ ފަށާފައެވެ. އިންތިޚާބުގައި ވޯޓު ފޮށި ބަހައްޓައިދިނުމަށް އެދި 50 ރިސޯޓުކުން ހުށަޙަޅާފައިވާ ކަމަށް އެ ކޮމިޝަނުން ވަނީ ވިދާޅުވެފައެވެ،
މިއަހަރު ރިޔާސީ އިންތިޚާބު އޮންނާނީ ސެޕްޓެމްބަރު 9ގައެވެ. އަދި ދެވަނަ ބުރެއް ބާއްވަން ޖެހިއްޖެނަމަ ދެވަނަ ބުރުގެ ވޯޓުލުން އޮންނާނީ ސެޕްޓެމްބަރު 30ގައެވެ.