ނޭނގި ސިޔާސީ ޕާޓިއެއްގައި ރަޖިސްޓްރީކޮށްފައިވާނަމަ އެކަމުގެ ޝަކުވާ ހުށައެޅުމަށް އިލެކްޝަންސް ކޮމިޝަނުން ހުޅުވާލައިފިއެވެ.
ޞައްޙަ ނޫން ފޯމް ހުށައަޅައިގެން ސިޔާސީ ޕާޓީތަކަށް ވައްދާ މައްސަލަ ބޮޑުވެފައިވާތީ އެކަން ހުއްޓުވުމަށް އިލެކްޝަންސް ކޮމިޝަނުން ވަނީ ފިޔަވަޅުތަކެއް އަޅަން ފަށާފައެވެ. އެގޮތުން ޞައްޙަ ނޫން ފޯމް ހުށައަޅައިފިނަމަ، ކޮންމެ ފޯމަކަށް އެ ސިޔާސީ ޕާޓިއެއް 10000 ރުފިޔާއިން ޖޫރިމަނާކުރުމަށް އިލެކްޝަންސް ކޮމިޝަނުން ވަނީ ނިންމާފައެވެ. އަދި އެފަދަ ފޯމް ހުށައަޅައިފިނަމަ އެ ސިޔާސީ ޕާޓިއެއްގެ ރަޖިސްޓްރާ ފުރަތަމަ ފަހަރު 5 ހާސް ރުފިޔާ، ދެވަނަ ފަހަރުން ފެށިގެން 10000 ރުފިޔާއިން ޖޫރިމާނާކުރަންވެސް އެކޮމިޝަނުން ވަނީ ނިންމާފައެވެ.
އިލެކްޝަންސް ކޮމިޝަނުން ވިދާޅުވީ، ސިޔާސީ ޕާޓީއެއްގެ މެންބަރުކަމަށް ގަވާއިދާ ޚިލާފަށް ރަޖިސްޓަރީ ކޮށްފައިވާނަމަ އެކަމުގެ ޝަކުވާ ހުށަހެޅުމުގެ ފުރުޞަތު މިހާރު ހުޅުވާލާފައިވާކަމަށެވެ. އަދި އެފަދަ ކޮންމެ ޝަކުވާއެއް ބެލުމަށްފަހު އެކަންކުރި ފަރާތަކާމެދު އެއްވެސް އިސްތިސްނާއެއް ނެތި ޤާނޫނީ ފިޔަވަޅު އެޅުމަށް ނިންމާފައިވާކަމަށްވެސް އިލެކްޝަންސް ކޮމިޝަނުން ވިދާޅުވިއެވެ.
ނޭނގި ސިޔާސީ ޕާޓީތަކަށް ވެއްދުމުގެ ބޮޑެތި މައްސަލަތަކެއް ދާދި ފަހުން ވަނީ ފެންމަތިވެފައެވެ. އެހެންކަމުން އެފަދަ މައްސަލަ ހައްލުކުރުމުގެ ގޮތުން ޕާޓީތަކުން ހުށައަޅާ ފޯމުގައި ސޮއިކުރާ މީހުންގެ ވަނަވަރު ޢާންމުކުރަންވެސް އިލެކްޝަންސް ކޮމިޝަނުން ވަނީ މިހާރު ފަށާފައެވެ.
ޞައްޙަ ނޫން ފޯމް ހުށައަޅާ ޕާޓީތައް ޖޫރިމަނާކުރުމަށް އިލެކްޝަންސް ކޮމިޝަނުން ނިންމާފައި މިވަނީ ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ޙުސައިން ޒިޔާދަށް އެނގިވަޑައިނުގެން، މޯލްޑިވްސް ނޭޝަނަލް ޕާޓީ، އެމްއެންޕީއަށް ވައްދާފައިވާ މައްސަލައެއްވެސް ފެންމަތިވެފައިވަނިކޮށެވެ.