ކައުންސިލްތަކަށް އަދިވެސް އޮތް އެންމެ ބޮޑު ދައްޗަކީ މާލީ ދަތިކަންކަމަށާއި، އެކަމަށް ވަޒީރުންގެ މަޖިލީހުގައި މަޝްވަރާކޮށް ހައްލެއް ހޯއްދަވައި ދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވައިފިއެވެ.
ރައީސުލްޖުމްހޫރިއްޔާ މި ޔަޤީންކަން ދެއްވާފައިމިވަނީ ލާމަރުކަޒީ ޤާނޫނުގެ ދަށުން، ދައުލަތުގެ ޑޮމެސްޓިކް ބަޖެޓުގެ 5 އިންސައްތަ ކައުންސިލްތަކަށް ކަނޑައަޅާފައިވީނަމަވެސް ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ހިންގުމުގައި އޮތް އެންމެ ބޮޑު ދައްޗަކީ މާލީ ގޮތުން އޮތް ދަތިކަންކަމަށް ކައުސިލްތަކުގެ ރައީސުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސުން ފާހަގަކުރެއްވުމާއި ގުޅިގެންނެވެ.
އއ.އުކުޅަހުގައި ދެދުވަހުގެ މުއްދަތަށް ކުރިއަށްދިޔަ ވިޔަވަތި ރާއްޖެ ކޮންފަރެންސް ނިންމުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، މި ކޮންފަރެންސްގައި ކުރެވުނު މަޝްވަރާތަކާއި ހުށައެޅުނު ހުށައެޅުންތަކަކީ ވަރަށް ބިނާކުރަންނިވި ބޭނުންތެރި މައުލޫމާތުތަކެއްކަމަށެވެ. އެގޮތުން ފުނިޖެހިފައި ހުރި އެތައް ކަންބޮޑުވުމަކާއި މައްސަލަތަކަށް މި ބައްދަލުވުންތަކުގައި މަޝްވަރާކުރެވިފައިވާކަމަށާއި، އެކަންކަމަށް އޮތް ހައްލުވެސް ފެނިގެންސްފައިވާކަމަށެވެ.
ރައީސްގެ ވާހަކަފުޅުގައި ލާމަރުކަޒީ ޤާނޫނު އުފަންކުރީ ވަރަށް މުހިންމު ބޭނުމެއްގައިކަމަށް ވިދާޅުވިއެވެ. އެއީ މައި ސަރުކާރުގެ ބާރުތައް ދޫކޮށްލައި ރައްޔިތުންނާއި ވީހާވެސް ގާތުން ޚިދުމަތްކުރުމަށްކަމަށް ވިދާޅުވިއެވެ. ރައްޔިތުންނަށް ބޭނުންވާ ޚިދުމަތްތައް ފަސޭހައި އަވަހަށް ދެވޭނީ ރަށުގައި ރައްޔިތުންނާ ކައިރީގައި ތިބިބަޔަކަށްކަމަށް ރައީސް ފާހަގަކުރެއްވިއެވެ.
ލާމަރުކަޒީ ޤާނޫނަށް އަމަލުކުރަން ފެށިތާ އަހަރެއް ފާއިތުވީފަހުން، އެ ޤާނޫނުގައި އިޞްލާހުކުރަން ހުރި މައްސަލަތަކާއި ގުޅޭގޮތުން މަޝްވަރާކުރުމަށް ބޭއްވި ކޮންފަރެންސްއިން އެ ޤާނޫނުގައި އިޞްލާހުކުރުމަށް ހުރި ގިނަ މައްސަލަތައް ފާހަގަކުރެވިފައިވާކަމަށާއި، ޚާއްޞަކޮށް މާލީ ގޮތުން ކައުންސިލްތަކަށާއި، އަންހެނުންގެ ތަރައްޤީއަށް ކުރުމަތިވާ ދަތިތަކާއި އުނދަގޫތައް ފާހަގަވެގެން ހިނގައްޖެކަމަށް ރައީސް ވިދާޅުވިއެވެ.
ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ރައީސުން ފާހަގަކުރި މާލީ މައްސަލައަށް ހައްލު ގެނެސްދޭނެ ކަމުގެ ޔަޤީންކަން ދެއްވަމުން ރައީސް ވިދާޅުވީ އެ މައްސަލައަކީ މުޅި ދައުލަތުގެ ބަޖެޓަށް އަސަރުކުރާނެ ކަމެއްކަމަށެވެ. އެހެންކަމުން ވަޒީރުންގެ މަޖިލީހުގައި އެކަމަށް މަޝްވަރާކޮށް ހައްލު ގެނެސްދެއްވާނެކަމަށް ރައީސް ވިދާޅުވިއެވެ.
"ޖުމްލަގޮތެއްގައި ހުރިހާ ކައުންސިލްތަކުންވެސް އަދި ޑަބްލިއުޑީސީތަކަށްވެސް ކުރިމަތިވެފައިވަނީ ހަމަމަ އެއް މައްސަލަތަކެއް. އެންމެ ފުރަތަމަކަމަކަށް ފާހަގަވީ ކުރިއެކޭވެސް އެއްގޮތަށް މާޅީ ފުދުންތެރިކަމަށް ހުރި ދަތިތައް. ބަޖެޓުން ދޫކުރާ ގްރާންޓް މަދުކަމުގެ ވާހަކަ. އޭގެ އިތުރުން އިހްތިސާސް ކަނޑައެޅުމުގައި ހުރި ދަތިތަކުގެ ވާހަކަ. ލޭންޑު ޔޫސް ޕްލޭން ހެދުމުގައި ހުރި ގޮންޖެހުންތައްވެސް. މާލީ ބާރުވރިކަން މިހާރަށްވުރެ ބޮޑު ބަޖެޓެއް ދޭއިރު މުޅި ދައުލަތުގެ އާމްދަނީއަށް ވިސްނަނަން ޖެހޭ. އެކަމަށް ވަޒީރުންގެ މަޖިލީހުގައި މަޝްވަރާކޮށް ގޮތްތަކެއް ހޯދައިދޭނަން" ރައީސް ވިދާޅުވިއެވެ.
ރައީސްގެ ވާހަކަފުޅުގައި ކޮންމެ ރަށެއްގެ ތަރައްޤީއަށްވެސް ލޭންޑުޔޫސް ޕްލޭނަކީ މުހިންމު ޕްލޭނެއްއްކަން ފާހަގަކުރައްވާ ކައުންސިލްތަކަށް 1 އަހަރު ވީއިރުވެސް އެ ޕްލޭން ހެދިފައިނުވުމަކީ ގޮންޖެހުމެއްކަމަށް ވިދާޅުވިއެވެ. ރައީސް ވިދާޅުވީ މި ކޮންފަރެންސްއިޮން ލޭންޑު ޔޫސް ޕްލޭން ހެދުމަށް ގޮތްތަކެއް ހޯދިފައިވާކަން ފާހަގަކުރައްވާ ވީހާވެސް އަވަހަށް އެ ޕްލޭން އެކުލަވާލުމަށް ކައުންސިލްތަކަށް އިލްތިމާސްކުރައްވާފައެވެ. އަދި އެ ޕްލޭންތައް ފިނުވުމުން ވީހާވެސް އަވަހަށް ފާސްކޮށްދީ، ރަށުގެ ތަރައްޤީއަށް ހުރި ގޮންޖެހުންތަކަށް ހައްލު ހޯދައިދެއްވާނެކަމަށްވެސް ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.