ގްރޭޓަރ މާލޭ ކަނެކްޓިވިޓީ ބްރިޖްގެ މަސައްކަތްކުރަމުން ދާތީ، އެސަރަހައްދުން ކަނޑު ދަތުރުކުރާ އުޅަނދުފަހަރު ސަމާލުވުމަށް ޓްރާންސްޕޯޓް މިނިސްޓްރީން އެދިއްޖެއެވެ.
ޓްރާންސްޕޯޓް މިނިސްޓްރީން ވިދާޅުވީ، މާލެ، ތިލަފުށި ލިންކް މަޝްރޫޢުގެ ދަށުން މިމަހުގެ 26އިން ފެށިގެން މާލޭގެ ހުޅަނގު ދެކުނު ފަރާތުން ފެށިގެން ވިލިނގިއްޔާއި ގުޅީފަޅުގެ ދެކުނު ފަރާތުގެ މޫދާއި އަދި ތިލަފުށީގެ އިރު ދެކުނު ކޮޅާއި ދެމެދުގެ ސަރަޙައްދެއްގައި ޕްލެޓްފޯރމްތަކެއް ބަހައްޓައިގެން މަސައްކަތްތަކެއް ކުރަމުންދާކަމަށެވެ. އެ ސަރަޙައްދުން ދަތުރުކުރާ އުޅަނދުފަހަރު އެ ޕްލެޓް ފޯމުތަކަށް ކައިރި ނުކުރުމަށާއި އެ ޕްލެޓް ފޯމްތަކަށް ސަމާލުކަންދީގެން ޕްލެޓްފޯމްތަކަށް އުނދަގޫ ނުވާނެގޮތަކަށް ރައްކާތެރިކަމާއެކު ދަތުރުތައްކުރުމަށް އުޅަނދުފަހަރުގެ ކެޕްޓަނުންނަށާއި އުޅަނދު ފަހަރުގެ ވެރިންނަށް އަދި އުޅަނދުފަހަރު އޮޕަރޭޓް ކުރާ ފަރާތްތަކަށް އެމިނިސްޓްރީންވަނީ އިލްތިމާސް ކުރައްވާފައެވެ.
ގްރޭޓަރ މާލޭ ކަނެކްޓިވިޓީ ބްރިޖް މަޝްރޫޢުގެ ދަށުން މިހާރު ކުރިއަށްދަނީ އެންމެ ފަހުގެ ޖިއޯ ޓެކްނިކަލް ސަރވޭގެ މަސައްކަތްތަކެވެ. ޖިއޯ ޓެކްނިކަލް ސަރވޭއަކީ ތަނބުތައް ޖަހާ ބިމުގެ ވެލިގަނޑުގެ ޙާލަތު ބެލުމަށް ހަދާ ސަރވޭއެކެވެ. މި ސަރވޭގެ މަސައްކަތްތައް އެއްގަމުން ތަނބުތައް ޖަހާ ސަރަޙައްދާއި، އަދި ތަނބުތައް ޖަހާ ކަނޑުގެ ސަރަޙައްދުތަކުގައިވެސް ކުރިއަށްދާނެއެވެ.
ގްރޭޓަރ މާލެ ކަނެކްޓިވިޓީ ބްރިޖް މާލެއާ ގުޅޭނީ، މާލޭގެ އިންޑަސްޓްރިއަލް ވިލެޖް ސަރަޙައްދުންނެވެ. މަސައްކަތް ފެށުމަށް އިންޑަސްޓްރިއަލް ވިލެޖުން ބައެއް ކަނޑައަޅާ، ސައިޓް ތައްޔާރުކުރުމުގެ މަސައްކަތް ފެށީ، މީގެ ހަފްތާއެއްހާ ދުވަސް ކުރިންނެވެ. އަދި މިހާރު މިވަނީ ސައިޓުގައި ސަރވޭގެ މަސައްކަތްތައް ފަށާފައެވެ.
ސަރވޭގެ މަސައްކަތް ކުރިއަށްގެންދަނީ ގްރޭޓަރ މާލެ ކަނެކްޓިވިޓީ ބްރިޖްގެ ޢަމަލީ މަސައްކަތް ހަވާލުކޮށްފައިވާ އިންޑިއާގެ އެފްކޮންސް ކުންފުނިންނެވެ. ބްރިޖްގެ މަސައްކަތް އެފްކޮންސް ކުންފުންޏާ ހަވާލުކުރީ މިދިޔަ އަހަރުގެ އޮގަސްޓުމަހުގެ 16ވަނަ ދުވަހުއެވެ. އަދި ބްރިޖްގެ ސަރވޭގެ މަސައްކަތްތައް، މިދިޔަ އަހަރުގެ އޮގަސްޓްމަހުން އޮކްޓޯބަރުމަހަށް ފެށިގެން އަންނަނީ ކުރަމުންނެވެ. އެގޮތުން ބްރިޖްގެ ބޮޑުމިނާއި، ފަރުމާއާއި ބްރިޖް އަޅާ ސަރަޙައްދުގެ އެކިއެކި ސަރވޭތައްވެސް މީގެކުރިންވެސް ކުރިއަށްގެންގޮސްފައިވެއެވެ.
ޕްލޭނިންގ މިނިސްްޓްރީއިން މީގެ ކުރިން ހާމަކޮށްފައިވާ ގޮތުގައި، އަންނަ މަހުން ފެށިގެން ބްރިޖްގެ ސައިޓް މަސައްކަތްތައް އިންޑަސްޓްރިއަލް ވިލެޖް ސަރަޙައްދުގައި ފަށާނެއެވެ.
މި ބްރިޖަކީ މާލެ، ވިލިމާލެ، ގުޅީފަޅު އަދި ތިލަފުށި ގުޅާލުމަށް ހަދާ ބްރިޖެކެވެ. މި ބްރިޖްގެ އެންމެ ބޮޑު ބޭނުމަކީ، ގްރޭޓަރ މާލެ ސަރަޙައްދުގެ އިޤްތިޞާދީ ހަބްތައް ގުޅާލާ، ވިޔަފާރިއާ ގުޅުންހުރި މަސައްކަތްތަކަށް ފަހިކޮށްދިނުމެވެ.
މި ލިންކްގައި ހިމެނޭނީ ބްރިޖާއި ކޯޒްވޭގެ މަސައްކަތްތަކެވެ. 6.7 ކިލޯ މީޓަރު ދިގު މި ލިންކްގެ، ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 ކިލޯ މީޓަރު ހުންނާނެއެވެ. އަދި ފުން ފަޅުތަކުގައި 1.45 ކިލޯ މީޓަރަށް މެރިން ވިއަރޑަކްޓް، އަދި މޫދު ގޮނޑުދޮށުގައި 2.32 ކިލޯ މީޓަރަށް މެރިން ވިއަރޑަކްޓް އަދި ބިމާ އެއްހަމައެއްގައި 2.96 ކިލޯ މީޓަރުގެ މަގު ހެދުން ހިމެނެއެވެ.