އިޓަލީގައި ރާއްޖެ އިސްތިހާރުކުރުމަށް އެމްއެމްޕީއާރުސީން އައުޓްޑޯ އެޑްވަޓައިޒިން ކެމްޕެއިނެއް ފަށައިފިއެވެ. މިކެންޕެއިން ކުރިއަށްގެންދަނީ މީޑިއާމޮންޑާ ގުޅިގެންނެވެ.
މި ކެމްޕެއިން ކުރިއަށް ގެންދިއުމަށް ހަމަޖެހިފައިވަނީ ދެ ބަޔަކަށް ބަހާލައިގެނެވެ. މި ކެމްޕެއިންގެ ހަރަކާތްތައް އަންނަ އަހަރުގެ ޖެނުއަރީ މަހުގެ ނިޔަލަށް ކުރިއަށްދާނެއެވެ.
މީޑިއާމޮންޑަކީ އިޓަލީގައި އެންމެފުޅާ ދާއިރާއެއްގައި ޑިޖިޓަލް މާކެޓިން ޙަރަކާތްތައް ހިންގާ އެއް ކުންފުންޏެވެ. މިކުންފުނިން މަސައްކަތް ކުރަނީ އިޓަލީގެ މީޑިއާ ގްރޫޕް، މީޑިއާސެޓް އަދި ލީޑިން ޕަބްލިޝިން ހައުސް އޮންޑަޑޯރީއާއާއެކުއެވެ. މީޑިއާމޮންޑްގެ އިސްތިހާރާއި، ކެމްޕެއިންތައް ބްރޯޑްކާސްޓުކޮށް، ޝާއިޢުކުރާ ފަރާތްތަކުގެ ތެރޭގައި އިޓަލީގެ މަޝްހޫރު 70 މީޑިއާ ބްރޭންޑެއް ހިމެނެއެވެ. މިއީ އެންމެ ފުޅާ ދާއިރާއެއްގައި އިޓަލީގައި ޕްރިންޓް އިންޓަރނެޓް، މޯބައިލް، ރޭޑިއޯ އަދި ޑިޖިޓަލް އެކި ޕްލެޓްފޯމްތަކުގެ ޒަރިއްޔާއިން އިސްތިހާރާއި، މާކެޓިން ޙަރަކާތްތައް ހިންގާ އެއް ފަރާތެވެ.
ވިޒިޓް މޯލްޑިވްސްއާއި މީޑިއާމޮންޑްއިން ކުރިއަށް ގެންދާ ކެމްޕެއިންގެދަށުން މިލާންގެ 6 ސަރަހައްދެއްގައި ރާއްޖޭގެ ފޮޓޯ، ވީޑިއޯ ހިމެނޭ ޑިޖިޓަލް އިސްތިހާރުތައް ދައްކާނެއެވެ. މިކެމްޕެއިންގެ މަޤްސަދަކީ ރާއްޖެއަކީ އިޓަލީގެ ފަތުރުވެރިން ޒިޔާރަތްކުރުމަށް އެންމެ ރައްކާތެރި މަންޒިލްގެ ގޮތުގައި އިސްތިހާރުކޮށް، އެޤައުމުގެ ފަތުރުވެރިންގެ މެދުގައި ރާއްޖޭގެ ބްރޭންޑް ޕްރެޒެންސް އިތުރުކުރުމެވެ. އަދި ރާއްޖެއަކީ އިޓަލީގެ ފަތުރުވެރިންގެ މެދުގައި އެންމެމަޤުބޫލު މަންޒިލްގެ ގޮތުގައި ޕްރޮމޯޓުކޮށް، ފިނި މޫސުމުގައި އެޤައުމުގެ ފަތުރުވެރިން ދަތުރުކުރުމަށް އިޚްތިޔާރުކުރާ މަންޒިލެއްގެ ގޮތުގައި ހެދުމެވެ.