ހަފުތާރެސް ޕްރޮގްރާމްގެ ތެރެއިން "އަމާން ބަދަހި މުޖްތަމައުއެއް ބިނާކުރުމުގައި ޒުވާނުންގެ ދައުރު" މިނަގުމައި ދ.އަތޮޅުގެ ޒުވާނުންނަށް އަމާޒުކޮށްގެން ދ.ކުޑަހުވަދޫގައި ޚާއްސަ ވޯކްޝޮޕެއް ބާއްވައިފިއެވެ.
މިއީ ޒުވާނުންނަށް އަމާޒުކޮށްގެން ޔޫތު މިނިސްޓްރީއާއި ނޭޝަނަލް ކައުންޓަރ ޓެރަރިޒަމް ސެންޓަރު ގުޅިގެން ބޭއްވި މައުލޫމާތު ދިނުމުގެ ޙަރަކާތެކެވެ.
1 ދުވަހުގެ މުއްދަތަކަށް ބޭއްވި މި ވޯކްޝޮޕުގައި ދ.އަތޮޅުގެ އެކި ރަށްރަށުން 40 ޒުވާނުން ވަނީ ބައިވެރިވެފައެވެ. މި ވޯކްޝޮޕްގައި މައިގަނޑު ގޮތެއްގައި އަލިއަޅުވާލާފައިވަނީ ސްޓްރެސް މެނޭޖްކުރާނެ ގޮތްތަކާއި، ޖަމްޢިއްޔާތަކުގެ ދައުރާއި، މުޖްތަމައުގެ ތެރޭގައި ސުލްހަ މަސަލަސްކަން ޤާއިމްކުރުމުގައި ޒުވާނުންގެ ދައުރާއި، ކްރިޓިކަލް ތިންކިންގއާއި، ލައިފް ސްކިލްސްފަދަ ކަންކަމުގެ މައްޗަށެވެ. މީގެ އިތުރުން ޔޫތު މިނިސްޓްރީން ޒުވާނުންނަށް ފަހިކޮށްދޭ އެކިއެކި ފުރުސަތުތަކާއި ގުޅޭގޮތުން މަޢުލޫމާތު ދީފައިވެއެވެ.
މި ވޯކްޝޮޕްގެ ތެރެއިން ޒުވާނުން ވަނީ މިހާރު މުޖްތަމައުއަށް ދިމާވެފައިވާ މައްސަލަތަކާއި އެމައްސަލަތައް ހައްލުކުރުމަށް ކުރެވިދާނެ ކަންކަމާ ގުޅޭގޮތުން ޚިޔާލު ހުށަހަޅާފައެވެ.
ޕީއެސްއެމް ނިއުސްއަށް މައުލޫމާތުދެއްވަމުން ޕްރޮގްރާމްގައި ބައިވެރިވި ބައެއް ޒުވާނުން ބުނީ މިއީ އެމީހުން ވަރަށްބޮޑަށް އެދިއެދިތިބި ފުރުސަތެއްކަމަށެވެ. އަދި މިފަދަ ފޯރަމެއް އިންތިޒާމްކޮށްދެއްވީތީ ޔޫތު މިނިސްޓްރީއާއި އެން.ސީ.ޓީ.ސީއަށް ޒުވާނުން ވަނީ ޝުކުރު އަދާކޮށްފައެވެ.
ހަފްތާރެސް ޕްރޮގްރާމްގެ ތެރެއިން ޔޫތު މިނިސްޓްރީއާއި އެން.ސީ.ޓީ.ސީ ގުޅިގެން ވަނީ ދ.އަތޮޅުގެ އެކިއެކި ފަރާތްތަކަށް އަމާޒުކޮށްގެން ވޯކްޝޮޕްތައް ބާއްވާފައެވެ. އެގޮތުން ކައުންސިލްތަކާއި، ޗީޓަރުންނާއި ބެލެނިވެރިންނަށްވެސް ވަނީ މައުލޫމާތު ދިނުމުގެ ސެޝަންތައް ބާއްވާފައެވެ.