މޫސުމަށް އަންނަމުންދާ ނޭދެވޭ ބަދަލުތަކުގެ އަސަރު ކުޑަކުރުމަށް ޤައުމުތަކުން އެއްބަސްވެ، ވަރަށް ތާރީޚީ އެއްބަސްވުމެއްކަމަށްވާ "ޕެރިސް އެގްރީމެންޓް" ފާސްކޮށްފިއެވެ. ފަރަންސޭސި ވިލާތުގެ ވެރިރަށް ޕެރިހުގައި މިހާރު ކުރިޔަށްދާ އ.ދ.ގެ މޫސުމަށް އަންނަމުންދާ ބަދަލުތަކާއި ބެހޭ ސަމިޓު ކޮޕް ޓުވެންޓީ-ވަންގައި ""ޕެރިސް އެގްރީމެންޓް"ގައި ސޮއިކޮށްފައިވަނީ މިރޭ ރާއްޖެ ގަޑިން 11:30 އެހާއިރުގައެވެ.މި އެއްބަސްވުމުގެ ދަށުން 2050 ވަނަ އަހަރާއި ހަމައަށް، ދުނިޔެ ހޫނުވަމުން އަންނަ މިންވަރު ދޭއް ޑިގްރީ ސެލްސިއެސްއަށްވުރެ ދަށުގައި ހިފެހެއްޓުމަށް ޤައުމުތަކުންވަނީ އެއްބަސްވެފައެވެ. މިއީ، ޖައްވަށް ބޭރުކުރާ ވިހަ ގޭސްތަކުގެ މިންވަރު ކުޑަކުރުމަށް ހުރިހާ ޤައުމަކުން އެއްބަސްވި ފުރަތަމަ ފަހަރުކަން ފާހަގަކޮށްލެވެއެވެ. ނަމަވެސް، މި އެއްބަސްވުމުގެ ހުރިހާ މާއްދާތަކަކީ ޤާނޫނީ ގޮތުން ބާރު ލިބިފައިވާ މާއްދާތަކެއް ނޫނެވެ. މި އެއްބަސްވުމަށް ތާޢީދުކޮށްފައިވާ ބޮޑެތި ޤައުމުތަކުގެ ތެރޭގައި އެމެރިކާ، ޗައިނާ، އިންޑިޔާ އަދި ޖީ-ހަތްދިހަ ހަތެއްގެ ޤައުމުތައް ހިމެނެއެވެ.މީގެ އިތުރުން، ތިމާވެއްޓަށް އަންނަމުންދާ ނޭދެވޭ ބަދަލުތަކުގެ ސަބަބުން ޤައުމުތަކަށް ކުރާ އަސަރު ކުޑަކުރުމަށް ސަތޭކަ ބިލިޔަން އެމެރިކާ ޑޮލަރުގެ ބަޖެޓެއް އެކުލަވާލުމަށްވެސް މި އެއްބަސްވުމުގައި ހިމަނާފައިވެއެވެ. ސަމިޓްގެ ރިޔާސަތު ބަލަހައްޓަވާ ފަރަންސޭސިވިލާތުގެ ޚާރިޖީ ވަޒީރު ލޯޣޯން ފެބިއުސްވަނީ، މި އެއްބަސްވުމަކީ ޤާނޫނީ ބާރު ލިބިފައިވާ، އަދި ހަމަހަމަ އެއްބަސްވުމެއްގެ ގޮތުގައި ސިފަކުރައްވާފައެވެ. އަދި މިއީ މޫސުމަށް އަންނަމުންދާ ނޭދެވޭ ބަދަލުތަކުގެ ސަބަބުން ދުނިޔެއަށް ކުރިމަތިވެފައިވާ ނުރައްކާތެރިކަމުން ދުނިޔެ ސަލާމަތްކުރުމުގެ މުހިއްމު މަސައްކަތްތަކުގެ ފެށުންކަމަށް އޭނާ ވިދާޅުވިއެވެ.ކޮޕް ޓްވެންޓީ-ވަންގައި ދިވެހިރާއްޖެ ތަމްޞީލް ކުރައްވަމުން ގެންދަވާ ވަފްދުގައި އިސްކޮށް ހުންނެވީ ތިމާވެއްޓާއިބެހޭ ވަޒީރު ތާރިޤް އިބްރާހީމްއެވެ.