އިސްލާމިކް ޑިވެލޮޕްމަންޓް ބޭންކް(އައިއެސްޑީބީ)ގެ އަހަރީ ބައްދަލުވުމުގައި ބައިވެރިވެ ވަޑައިގަތުމަށް ރާއްޖޭގެ ވަފުދެއް އުޒްބަކިސްތާނަށް ހިނގައްޖެއެވެ. މި ބައްދަލުވުމުގައި ބައިވެރިވުމަށް ދިޔަ ރާއްޖޭގެ ވަފުދުގައި 5 ބޭފުޅުން ހިމެނިވަޑައިގަންނަވައެވެ.
މި ވަފުދުގައި އެންމެ އިސްކޮށް ހަރަކާތްތެރިވެވަޑައިގަންނަވަނީ އިކޮނޮމިކް މިނިސްޓަރ އަލްއުސްތާޛު ފައްޔާޒު އިސްމާޢީލެވެ. މިނިސްޓަރ ފައްޔާޒުގެ އިތުރުން އެސްޓީއޯގެ އެމްޑީ ހުސައިން އަމްރުވެސް ބައިވެރިވެވަޑައިގަންނަވައެވެ.
އިސްލާމިކް ޑިވެލޮޕްމަންޓް ބޭންކްގެ އަހަރީ ބައްދަލުވުމުގެ ތެރެއިން އެ ބޭންކުގެ 2020ވަނަ އަހަރުން 2028ވަނަ އަހަރަށް ކަނޑައަޅާ ސްޓްރްޓެޖިކް އެކްޝަން ޕްލޭން އިފްތިތާހުކުރުން އޮންނާނެއެވެ. އަދި އެ ބޭންކުން ރާއްޖެއަށް ދޭ އެހީއާ ގުޅޭ ކަންކަން މިއެކްޝަން ޕްލޭންގައި ހިމެނާނެއެވެ. އިސްލާމިކް ޑިވެލޮޕްމަންޓް ބޭންކްގެ އެހީތެރިކަމާއިއެކު މިހާރުވެސް ރާއްޖޭގައި 4 މަޝްރޫއެއް ދަނީ ހިންގަމުންނެވެ.
މި ދަތުރުގެ ތެރެއިން އެކިއެކި ދާއިރާތަކުގެ ކަމާގުޅުންހުރި ފަރާތްތަކާވެސް ރާއްޖޭގެ ވަފުދު ދަނީ ބައްދަލުކުރަމުންނެވެ. އެގޮތުން ރާއްޖޭގެ ތަރައްޤީއާއި އެކިއެކި މަޝްރޫއުތަކަށް ފައިސާ ހޯދުމާއި ރާއްޖޭގެ އިޤްތިޞާދުގައި އެކިއެކި ސިނާއަތްތައް ކުރިއެރުވުމާ ގުޅޭގޮތުން ކަމާގުޅުންހުރި ފަރާތްތަކާވަނީ ބައްދަލުކޮށް މަޝްވަރާކޮށްފައެވެ. މި ދަތުރު ކުރިއަށްދާނީ މިމަހުގެ 1އިން 7އަށެވެ.