އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުން ފަދަ ނަފުރަތުގެ އަމަލު ހިންގުން ޖިނާއީ ކުށަކަށް ހެދުމަށް ޤާނޫނުލް އުގޫބާތަށް އިޞްލާހު ގެނައުމުގެ ބިލަށް ޢާންމުންގެ ޚިޔާލު ހޯދުމަށް ހުޅުވާލައިފިއެވެ.
އެ އިޞްލާހަކީ ސަރުކާރުގެ ފަރާތުން، ތުޅާދޫ ދާއިރާގެ މެންބަރު ޙިސާން ޙުސައިން ހުށައެޅުއްވި އިޞްލާހެކެވެ. ޙިސާން ހުށައައެޅުއްވީ ޤާނޫނުލް އުގޫބާތަށް ނަފްރަތުގެ އަމަލު ހިންގުމުގެ ކުށުގެ މާއްދާއެއް އިތުރުކުރުމަށެވެ.
މި ބިލު މަޖިލީހަށް ބަލައިގަނެ މިހާރު ވަނީ ދިރާސާކުރުމަށް ޖުޑީޝަރީ ކޮމިޓީއަށް ފޮނުވާފައެވެ. އެ ބިލަށް އާންމުންގެ ޚިޔާލު ހުށައެޅުމުގެ ފުރުޞަތު އަންނަ އަންގާރަ ދުވަހުގެ މެންދުރު 12:00އާއި ހަމައަށް ވަނީ ހުޅުވާލާފައެވެ. މިގޮތުން ޖުޑީޝަރީ ކޮމިޓީގެ މެއިލް [email protected]އަށް ނުވަތަ މަޖިލީހުގެ އިދާރާއަށް ލިޔުމުން ހުށައެޅުމުގެ ފުރުޞަތު ވަނީ ހުޅުވާލާފައެވެ. މި ބިލަށް ޢާންމުގެ ޚިޔާލު ހޯދުމުގެ އިތުރުން އިސްލާމިކް މިނިސްޓްރީ އާއި ޕްރޮސެކިއުޓާ ޖެނެރަލްގެ އޮފީހުންނާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ ލަފާ ހޯދުމަށްވެސް ނިންމާފައިވެއެވެ.
ޢާންމުންގެ ޚިޔާލު ހޯދުމަށްފަހު މިމަހުގެ 23 ވަނަ ދުވަހުގެ ނިޔަލަށް މި ބިލުގެ ކޮމިޓީ މަރުހަލާގެ މަސައްކަތް ނިންމުމަށް ވަނީ ކަނޑައަޅަފައެވެ.
މަޖިލީހަށް ހިސާން ހުށައެޅުވި ބިލާއި ގުޅިގެން ދީނީ ބައެއް އިލްމުވެރިންނާއި އާއްމުންވެސް ދަނީ މި ބިލާއި މެދު ކަންބޮޑުވުން ފާޅުކުރަމުންނެވެ. ބިލާއި މެދު ކަންބޮޑުވުން ފަޅުކުރާ ފަރާތްތަކުން ބުނަމުން އަންނަނީ މި ބިލް ފާސްވެއްޖެނަމަ އިސްލާމް ދީނާއި ދެކޮޅަށް ވާހަކަ ދައްކާ މީހުންނަށް ބޮޑު މިނިވަންކަމެއް ލިބި އެކަން ކުރުމުގެ ފުރުސަތު ފަހިވެގެންދާނެކަމަށެވެ. އަދި މިކަމުގައި ސަބަބުން މުޖުތަމަޢުގެ ހަމަޖެހުން ޤާއިމުކުރުމަށް ހުރަސް އެޅުމާއި، އިޖުތިމާޢީ ޙާލަތު އިތުރަށް ގޯސްވެ ޞުލްޙަ މަސަލަސްކަން ގެއްލިދާނެ ބައެއް ކަންކަން ހުރިކަން ވަނީ ފާހަގަކޮށްފައެވެ.
މި ބިލު ޙުށަހަޅުއްވަމުން ތުޅާދޫ ދާއިރާގެ މެމްބަރު ޙިސާން ޙުސައިން ވިދާޅުވީ މި ބިލް ހުށައެޅުއްވީ ރާއްޖޭގައި އިސްލާމްދީން ނައްތާލައި ޣައިރު ދީންތަކަށް މަގުފަހިކުރަންކަމަށް ބުނެ ދައްކަމުންދަނީ ހަޤީޤަތާއި ހިލާފު ވާހަކަތަކެއްކަމަށެވެ.
ޙިސާން ވިދާޅުވީ އިންސާނާގެ ލެއަކީ ހުރުމަތްވެގެންވާ އެއްޗެއްކަމަށާއި މީހަކު މަރަން ގޮވައި މީހެއްގެ ފުރާނަ ނުރައްކަލެއް ހުށައެޅޭ އަމަލެއް ހިންގުމަށް ފުރުސަތު ދެވިގެން ނުވާނެކަމަށެވެ. ޙިސާން ވިދާޅުވީ މި ބިލު ހުށައެޅުގެ އެންމެ ބޮޑު ބެނުމަކީ ޤާނޫނުގެ ބޭރުން މީހުން މެރުން ފަހަކަށް އައިސް އިތުރުވެ އެކަމުގެ ނުރައްކާ ބޮޑެވެފައިވާތީކަމަށެވެ. އަދި މިއީ ދިވެހިން އެދޭކަމެއް ނޫންކަންވެސް ޙިސާން ފާހަގަކުރެއްވިއެވެ.
ޙިސާން ހުށައެޅުއްވި ބިލުގައި ނަފްރަތުގެ އަމަލުތަކުގެ ގޮތުގައި ގިނަ ކަންތައްތަކެއް ވަނީ ހިމަނާފައެވެ. އޭގެތެރޭގައި އާންމު ތަނެއްގައި ވަކި މީހަކީ އިސްލާމްދީނާ ޚިލާފަށް ނޫނީ އިސްލާމްދީނާ ދެކޮޅު މީހެއްކަމަށް ތުހުމަތު ކުރުމާއި، މީހެއްގެ އިސްލާމީ އަގީދާއާ ގުޅުވައި އެ މީހަކާ މެދު ނަފްރަތު އުފެއްދުމުގެ އިތުރުން، މުސްލިމަކު ކާފަރެއްގެ ގޮތުގައި ސިފަކުރުމާއި އެކަމުގައި ބައިވެރިވުމަކީ ކުށެއްގެ ގޮތުގައި އެ އިސްލާހުގައި ކަނޑައަޅާފައިވެއެވެ. ގާނޫނުލްއުގޫބާތުގެ ދަށުން އެފަދަ ދަރަޖައިގެ ކުށަށް ދެވޭނެ އެންމެ ބޮޑު އަދަބަކީ އެއް އަހަރުގެ ދުވަހަށް ޖަލަށްލުމެވެ. އަސާސީ މިންގަނޑުން އަދަބު ދޭނަމަ ހަތަރު މަހާއި 24 ދުވަހުގެ ޖަލު ހުކުމެކެވެ.