މޯލްޑިވްސް އިސްލާމިކް ބޭންކުގެ 2020 ވަނަ އަހަރުގެ ފައިދާއިން ހިއްސާއަކަށް 1 ރުފިޔާ 20 ލާރި ފާސްކޮށްފިއެވެ.
މޯލްޑިވްސް އިސްލާމިކް ބޭންކުގެ ހިއްސާއަކަށް 1 ރުފިޔާ 20 ލާރި ފާސްކުރީ އިއްޔެ ބޭއްވި އެ ކުންފުނީގެ 11 ވަނަ އަހަރީ އާންމު ޖަލްސާގައެވެ.
ހިއްސާއަކަށް 1 ރުފިޔާ 20 ލާރި ބަހަން ފާސްވެފައިވަނީ އަހަރީ އާންމު ޖަލްސާގައި ބައިވެރިވި %99.94 ހިއްސާދާރުންގެ ވޯޓުންނެވެ. މި ޖަލްސާ ބާއްވާފައިވަނީ މޯލްޑިވްސް ސެކިއުރިޓީ ޑިޕޮސިޓަރީގެ ފަހިވޯޓު މެދުވެރިކޮށެވެ.
އެމްއައިބީގެ ޑިރެކްޓަރުންގެ ބޯޑުން ނިންމާފައިވަނީ 2020 ވަނަ އަހަރު ކުންފުނީގެ ފައިދާގެ ތެރެއިން 27.5 މިލިއަން ރުފިޔާ ހިއްސާދާރުންގެ މެދުގައި ބެހުމަށެވެ. މިދިޔަ އަހަރު ކުންފުނީގެ ފައިދާ އެހެން އަހަރުތަކާއި އަޅާބަލާއިރު ވަނީ ދަށްވެފައެވެ. ސަބަބަކީ ކޯވިޑް19އާ ގުޅިގެން އިޤްތިޞާދަށް އައި ހީނަރުކަމުގެ ސަބަބުންނެވެ.
އަހަރީ އާންމު ޖަލްސާގައި ކުންފުނީގެ ޑިރެކްޓަރުންގެ ބޯޑަށް 3 އަހަރު ދުވަހުގެ މުއްދަތަކަށް ހަސަން މުޙައްމަދު ވަނީ އައްޔަންކޮށްފައެވެ. އޭނާ ބޯޑަށް ހޮވިފައިވަނީ ޖަލްސާގައި ބައިވެރިވި ހިއްސާދާރުންގެ %99.99 ވޯޓުންނެވެ. މީގެއިތުރުން މިއަހަރުގެ އޮޑިޓެއްގެ ގޮތުގައި ކޭޕީއެމްޖީ ވަނީ އައްޔަންކޮށްފައެވެ.