އެއްޗެއް ގޮއްވާލި ހާދިސާގައި ލިބިވަޑައިގެންނެވި ޒަޚަމްތަކާއި ގުޅިގެން ރައީސް ނަޝީދުގެ ގިނަ ސާޖަރީތަކެއް ހަދާފައިވާއިރު، އެމަނިކުފާނުގެ ހާލު އަދިވެސް ސީރިއަސްކަމަށް އޭޑީކޭ ހޮސްޕިޓަލުން ހާމަކޮށްފިއެވެ.
ރައީސް ނަޝީދަށް ފަރުވާދެއްވަމުންދާ އޭޑީކޭ ހޮސްޕިޓަލުން ބުނީ އެމަނިކުފާނަށް ލިބިވަޑައިގެންނެވި ޒަޚަމްތަކާއި ގުޅިގެން މިއަދު މެންދުރާއި ހަމައަށް އައިރު ގިނަ ސާޖަރީތަކެއް ހަދަންޖެހުނުކަމަށެވެ. އެގޮތުން ރައީސް ނަޝީދުގެ އިސްތަށިފުޅާއި، މޭފުޅާއި، ބަނޑުފުޅުގެ އިތުރުުން، އަތްޕުޅާއި ފައިންޕުޅުގެ އަނިޔާތަކާއި ގުޅިގެން ގިނަ ސާޖަރީތަކެއް ހަދާފައިވާކަމަށް އޭޑީކޭ ހޮސްޕިޓަލުން ބުނެއެވެ.
އޭޑީކޭ ހޮސްޕިޓަލުން ބުނީ ސާޖަރީތަކަށްފަހު ރައީސް ނަޝީދު އޮންނެވީ އައިސީޔޫގައި، ސީރިއަސް ހާލަތެއްގައިކަމަށެވެ. އަދި ރައީސް ނަޝީދުގެ ޢާއިލާއިން އެދިފައިވާގޮތަށް އެމަނިކުފާނުގެ ހާލުކޮޅާއި ގުޅޭ ތަފްސީލު މަޢުލޫމާތު އެކަށިގެންވާ ވަގުތެއްގައި ހާމަކުރާނެކަމަށްވެސް އޭޑީކޭ ހޮސްޕިޓަލުން ބުނެއެވެ.
ރޭ އިރާކޮޅުގެ ވަގުތެއްގައި ރައީސް ނަޝީދަށް ހަމަލާ ދީފައިވަނީ އެމަނިކުފާނު ގެކޮޅުން ނުކުނަވައިގެން ނީލޯފަރުހިނގުމުން ހިންގަވާފައި ވަޑައިގެން މަޖީދީމަގުގައި އޮތް ކާރުކޮޅަށް އަރާވަޑައިގަންނަވަނިކޮށެވެ. މި ހަމަލާދީފައި ވަނީ ސައިކަލެއްގައި ގޮވާ އެއްޗެއް ހަރުކޮށް ގޮއްވާލައިގެންނެވެ.